Aningaaserivik kaammattuuteqartoq: Aalisarneq pillugu Ataatsimiititaliarsuup inassuteqaatai malinneqarlik

Naalakkersuisut aalisarneq pillugu inatsisissamut nutaamut ilassutissanik amerlanerusunik pissarsiniarlutik ulluni makkunani innuttaasunik ataatsimiisitsisarneranni, Grønlandbankenimit politikkerinut erseqqissumik kaammattuisoqarpoq.

Aningaaserivik naapertorlugu Alisarneq pillugu Ataatsimiititaliarsuup inassuteqaatai malinneqartariaqarput politikkikkullu iliuuseqarfigineqarlutik. Aningaaserivik ukiumoortumik nalunaarusiamini Kalaallit Nunaata aningaasaqarneranik naliliilluni allappoq:

- Set fra GrønlandsBANKENip isaanit isigalugu aqqutissaq ataasiinnaavoq, tassalu Aalisarneq pillugu Ataatsimiititaliarsuup inassuteqaataanik malinninnissaq. GrønlandBANKENimit ukiut arlallit ingerlaneranni oqaatigisarsimavarput nungusaataannitsumik ingerlatsisoqarnissaa pisariaqartoq aamma sineriammut qanittumi aalisarneq ajalusooriaannaasoq, aningaaserivik allappoq.

Aningaaserivimmit isumaqarput, tamanna aalisartut inuiaqatigiillu soqutigisarigaat:

Aalisapilunneq unitsinneqarli

- Akerlianik ilisimaneqarluarpoq nungusaataanngitumik aqutsisoqartillugu aalisarnermik inuussutissarsiuteqarnerup ineriartortinneqartarnera, aningaasaliiffigineqarsinnaanera ingerlallualersinnaaneralu.

Nungusaataanngitsumik aqutsisoqassppat, biologit inassuteqaatai sinningaatsiarlugit Naalakkersuisut pisassiisarnertik unitsittariaqaraat, Grønlandsbankenimit isumaqarput:

- Sineriammut qanittumi qaleralinniarnermi saarullinniarnermilu suli aalisapiluttoqarpoq. Biologit qaleralittassiissutissatut saarullittassiissutissatullu inassuteqaataat 2021-mut sanilliullugit 2022-mi ikinnerulersimapput. Tassa sineriammut qanittumi qaleralittassiissutit biologit inassutigisimasaanni 94%-imik qaffasinnerupput, saarullittassiissutigineqarsimasullu 120%-imik qaffasinnerullutik, aningaaserivik allappoq.

Grønlandsbankenimit oqaatigineqarpoq, Aalisarneq pillugu Ataatsimiititaliarsuarmit naatsorsuutigineqartoq aqutsineq allanngortinneqanngippat, ukiut tallimat tulliuttut ingerlaneranni sineriammut qanittumi qaleralinniartarneq ajalusuussasoq. Tamanna pippat aalisartut inuiaqatigiillu aningaasatigut annaasaqassapput, naliliineq taamatut nipeqarpoq.

Aningaasatigut imminut napatissinnaanngitsoq

Aningaaserivimmit nassuerutigineqarpoq, sineriammut qanittumi pisassiissutit ikilisinneqarpata aalisartut ataasiakkaat ilungersunarluinnartumik inissisimalissasut, aningaaserivimmiilli oqaatigineqarpoq, ullumikkut aalisarneq aalisartorpassuarnut pitsaanngitsumik ingerlareersoq:

- Pisassiissutit ikilisinneqarpata aalisartut ataasiakkaat aalisarnermik inuussutissarsiuteqarnertik unitsittariaqassavaat. Tamanna aaliasartunut ataasiakkaanut taakkulu ilaqutaannut ajorluinnartumik kinguneqassaaq, aalisartorpassuilli sineriammut qanittumi aalisarnermmi isertitarisartagaat annikillingaatsiareersimapput, aningaaserivik allappoq.

Aningaaserivimmit sineriammut qanittumi qaleralinniarnermi akitsuut pillugu ukiaq oqallittoqarnera aalisarnermi ajortumik aningaasaqartoqarneranut takussutissatut isigineqarpoq:

- Imminnut akerleriilluinnartut

- Qaleralinniarluni aalisarnermi ullumikkut isertitarineqartartut ima annikitsigipput, allaat aalisarnermut assunga akitsuusiisinnaaneq periarfissaajunnaarsimalluni. Inatsisissatut siunnersuut nutaaq Inatsisartut 2022-mi Ukiakkut ataatsimiinneranni naatsorsuutigineqartutut saqqummiunneqarpat, isumalluutinut akitsuusiisarnerup ataavartumik allanngortinneqarnissaa siunertaralugu akitsuusiisoqassanngitsoq naatsorsuutigineqarpoq, aningaaserivik allappoq, nangillunilu:

- Aalajangernerli avataani nungusaataanngitsumik aningaasaqarnikkullu isaatitsilluarfiusumik qaleralinniarnermut akerliulluinnapoq, taamalu inuiaqatigiinnut iluaqutaasussamik annertuumik akitsuuserneqarsinnaalluni.

Aalisarnermut Piniarnermullu Naalakkersuisupq Aqqaluaq B. Egedep (IA), aalisarneq pillugu isumasioqatigiissitsinerata tullia pingasunngonermi Nuummi ingerlanneqassaaq, tassa Nuummi, Kujataani Tunumilu aalisartut 70-it missaanniittut peqataassapput.