Aningaaserivik kvartalimi siullermi angusarissaarpoq

Grønlandsbanken 2024-mi aallartilluarpoq, akileraarutit suli ilanngaatiginagit 61,8 millionit koruuninik angusaqarami, ukiup siulianut piffissamut tassunga sanilliullugu 12,4 millionit koruuninik pitsaanerusumik.

2024-mi kvartali siulleq pillugu nalunaarusiamik Grønlandsbanken tamanut saqqummiussinerminut atatillugu taama ilisimatitsivoq.

Ilanngaateqareerluni ernianit isertitat 19 millionit koruunit missaannik qaffassimasut nalunaarusiami erseqqissarneqarpoq, tassa imaappoq 25 procentit missaannik qaffariarsimapput.

- 2023-mi erniat qaffakkiartorneri taarsigassarsiarititallu amerliartorneri ingerlalluartitsipput, nalunaarusiami allassimavoq.

Akitsuutinilli atuisullu sullinneqarnerminnut akiliutaannit isertitat ikilisimapput, 2024-milu kvartalimi siullermi ilanngaateqareerluni ernianit akiliutinillu isertitat katillugit 15,5 million koruuninik qaffariarput.

Aningaaseriviup pisortaa mianersorluni neriulluarpoq

Aallartilluarneq pissutigalugu aningaaseriviup pisortaa Martin Kviesgaard 2024-mut tunngatillugu mianersorluni neriulluarpoq:

- Ukioq aallartipparput 2023-p naaneratut, taarsigassarsiarititat qaffasissut erniallu qaffasissusaat tunngaviusumik ingerlatsinermik kivitsipput. 2022-mi 2023-milu takusatsinnit ukiumut tamarmut sammisat appasinnerulaarnissaat naatsorsuutigaarput, ukiullu ingerlanerani erniat apparialaassasut aamma naatsorsuutigineqassaaq, aningaaseriviup pisortaa oqarpoq nangillunilu:

- Maannakkorpiarli tunngaviusumik isertitat qaffasinnerusumi inissisimassasut naatsorsuutigaara, kvartalilu siulleq pitsaasorujussuarmik naavoq.

Aningaaseriviup 2024-mi suli akileraaruteqarnani ukiumut inernerusussat 180 – 230 millionit koruuniussasut naatsorsuutigalugit aalajangiusimavaa.