Aningaaserivik pitsaasumik angusaqareerluni angusaminik annertusiliisoq
Grønlandsbankenimit maanna naatsorsuutigineqarpoq, 2021-mi akileraarutit suli peernagit 158 millioner koruuninik sinneqartooruteqarnissaq.
2021-p qaammataani pingasuni kingullerni pitsaasumik ingerlasoqareersoq annertusiliisoqarpoq:
- Tunngaviusumik ingerlatsinermi naammaginartumik ineriartortoqarsimanera, aningaasat nalingisa iluarsineqarsimanerat annikitsumillu nalikilliliisoqarsimanera tunngavigalugit angusassatut naatsorsuutit iluarsineqarput, aningaaserivik aningaasanik pappiaqqanillu nalilinnik niueruteqartarfimmut nalunaaruteqarluni allappoq.
Aningaaseriviup siorna oktobarip qaammataani nalunaarutigaa, 135 millioner koruunit aamma 150 millioner koruunit akornanni angusaqarnissamik naatsorsuuteqartoqartoq, maannali aningaasanik pappiaqqanillu nalilinnik niueruteqartarfimmut nalunaarut naapertorlugu suli annertunerusumik angusaqartoqarnissaa naatsorsuutitigineqarpoq.
2020-mut naatsorsuutini aningaaserivik akileraarutit suli peernagit 130,9 millioner koruuninik sinneqartooruteqarpoq, taamaammat 158 millioner koruuninik sinneqartooruteqarnissamik naatsorsuuteqarneq aningaaserivimmut malunnaatilimmik siuariarneruvoq.
Aningaaseriviullu nalunaarummi aamma 2022-mut naatsorsuutini saqqummiuppai, Grønlandsbankenillu tassani naatsorsuutigaa, akileraarutit suli peernagit 120-140 millioner koruunit akornanni sinneqartooruteqarnissaq.
- Aningaasat nalinginik iluarsiissutit nalikilliliinerillu Covid-19-imut atatillugu nalikilliliinertaqanngitsut tunngavigalugit taamatut inerniliisoqarpoq. Angusat annikinnerpaaffiata takutippaa, pappiaqqanik nalilinnik annaasaqangaatsiartoqarsimanera, aningaaserivik naatsorsuutit pillugit allappoq.
2021-mu ukiumoortumik naatsorsuutit martsip aappaani tamanut saqqummiunneqassapput.