Aningaaserivinni atorfillit aningaasarsiamik qaffannissaat piumasaraat
Pingasunngorneq 4. februaari Finansforbundet aamma Kalaallit Nunaanni Sulisitsisut Peqatigiiffiat, GA, Grønlandsbankenimi atorfillit isumaqatigiissutaat nutarterniarlugu isumaqatigiinniarlutik aallartipput.
Atorfilinnut pingaarnerpaaq tassaavoq aningaasarsiat qaffanneqarnissaat. Illuatungeriillu isumaqatigiissutigaat aningaasarsiat qaffannissaat kiisalu killiliussatut aningaasarsiat annertussusiat isumaqatigiinniarnermi pingaarnerpaajusut. Finansforbundet nutaarsiassatut allakkamini Finansimi Taamatut allappoq.
- Qularutissaanngilaq aningaasaqarneq aamma aningaasarsiat qaffanneqarnissaat apeqqutini pingaarnerpaajusoq. Piumasaqaatitsinni pingaarnerpaajuvoq, aningaasarsiat qaffanneqarnissaat. Tamatumani inuiaqatigiinni aningaasartuutit ineriartornerat nalimmassaavigineqassaaq, Finansforbundimi siulittaasup tullia, Kent Petersen nutaarsiassatut allakkamut, Finansimut oqarpoq.
Isumaqatigiinniarnermi ataqatigiissaarisoq Svend Kronborg peqatigalugu kiisalu Grønlandsbankenimi sulisut peqatigiiffianni siulittaasoq Allan Damsgaard aamma siulttaasup tullia Jacobine Poulsen peqatigalugit, Finansforbundimiit isumaqatigiinniarnermi aallartitaapput.
Ukiup kingulliup ingerlanerani inuiaqatigiit aningaasat pisissutaasinnaanerisa nalikilliartornerat annertuumik misigivaat, ilaatigut inuussutissat akiisa annertuumik qaffannerisigut kiisalu viinnit, tupap aamma immiaaqqat akitsuutaasa qaffannerisigut.
Tamakku saniatigut atorfillit aamma kissaatigaat illoqarfigisaminnut sulinngiffeqarnermi akiliunneqarluni angalasarnerup ukiut marlukkaartunngortinneqarnissaa ullumikkut ukiut tallimakkaarput.
Illuatungeriit Nuummi 3. aamma 4. marsi isumaqatigiinniarnitik nangeqqissavaat.