Anorersuareernerani: Biilit igalaajarsimasut arlallit sullivinni iluarsaanneqartut
Nuummi sulliviit biilileriffiusut marluk ulluni tulliuttuni suliassaaleqinngillat. Ataasinngornermi anorersuareernerani biiliutillit arlallit biiliminni igalaajartoorsimallutik nalunaaruteqareersimapput.
Nuummi anorersuartoqarsimanera suli malugineqarsinnaavoq. Biilinillu sullivinni tamanna pingaartumik malugineqarpoq.
Biilit arlallit anorersuarnerani, anoraasuarujussuartut sakkortutingisumik anoraarsuartoqartartillugu, igalaajartitersimapput.
- Biilit 15-it, immaqaluunniit 20-nut qaninnerupput, ataasinngornermi anorersuarnerani igalaajarsimasut maanngaanneqarput. Anorersuarnerani igalaajarsimanerat qularutissaanngilaq, Deres Automi aserortoqarsimatillugu iluarsaassisarfimmi pisortaq, Ronnie Olsen ilisimatitsivoq.
Nuuks Automi biiliutillit tallimanit amerlanerusut aamma nalunaaruteqarput biilit igalaajarsimasut iluarsaaqqussummik saaffiginnissuteqarlutik.
Suliat allat unitsinneqartariaqartut
Nuummi innuttaasut ilaat Facebookimi ilisimatitsinernut quppernerni nalunaaruteqartarput biilit igalaajarsimasut pillugit - ilaatigut mittarfeqarfiit biilinut unittarfiani aseruatiternerit nalunaarutigineqarsimallutik.
Nuuks Automi maluginiarneqarpoq pingaartumik aqquserngit marluk biilinit igalaajarfiunerusimasut.
Tassa Qinngorput aamma Nuussuup akornanni Stanislawip nalaani, kiisalu pinerluuteqarsimasunut inissiisarfiup tungaanut aqqusinermi. Aqquserngit taakku marluk tamarmik mittarfiliornermik suliaqarfiup sanianiipput.
Anorersuarnerani ujaraaqqat sanaartorfinnit teqqaasinnaanerat pillugu KAIR-imut naammagittaalliortoqarsimanngitsoq ilisimatitsissutigineqarpoq. Ilanngullugu ilisimatitsissutigineqarpoq ujaraaqqat pujoralaallu teqqalannginniassammata sanaartorfik masatserneqakkajuttoq.
- Biilit igalaajarsimasut taama amerlatigitillugit suliassaraluagut allat unitsikkallartariaqarpagut. Suliassammi pinartut siulliuttariaqarpagut, biilit ingerlassutaaleqqissinnaaniassammata, Deres Automiit Ronnie Olsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...