Aqqusinerni nanoqartarnersoq inuit paaserusuttaraat

Aalborgimi Europap avannaani aalisarnermik nittarsaassinerit annersaanni Danfishimi Sapaatip-akunnerani kingullermi ingerlanneqartumi kalaallit aalisartut suliffeqarfiillu peqataalluarput.

Inersuarni arfinilinni tamani inuppassuit Kalaallit Nunaanneersut – aalisartut, aammali Danmarkimi najugallit amerlasuut, nittarsaassineq ilaquttaminnik ikinngutiminnillu ilassinninnissamut atorpaat.

Kalaallit ataatsimut nittarsaassiffigisaat naapiffiuvoq, tassanilu Tusass, Raatioqarnermut aqutsisoqarfik, Avannaata Kommunia, Qalut Vónin, KNAPK, KONFIFA, Royal Arctic Line aamma Aalisarnermut Piniarnermullu Naalakkersuisoqarfik nittarsaassipput. Ataatsimut nittarsaassivinik nutaajuvoq, Kalaallillu Nunaat pillugu saqqummersitsineq nittarsaassinermik aaqqissuisut Aalborg Kongres og Kulturcenterip Aalborgimi Kalaallit Illuutaat suleqatigalugu aaqqissuussaraa.

Pitsaanerusinnaasoq

Ataatsimut nittarsaassivik ataatsimut isigalugu naammagisimaarneqarpoq, aammali pitsaanerusinnaasoq Cuno Jensen Qalut Vónin-imeersoq isumaqarpoq.

- Siornatigut Vóninip immikkoortortaqarfiani suliffeqarfiit allat peqatigalugit nittarsaassisarpugut, ukiorli manna Kalaallit Nunaata nittarsaassiviani immikkut nammineq nittarsaassivugut. Iluaqutaavoq.

- Immaqa inuit amerlanngitsut nittarsaassivipput ornippaat, kisiannili inuit eqqortut takkupput. Sullittalersinnaasatsinnik oqaloqateqarnissamut piffissaqarneruvugut — neriuutigisanniillu pitsaanerungaarpoq.

- Ukiut marluk qaangiuppata peqataaqqikkumaarpugut. Neriuppungali kalaallit suliffeqarfii namminersortut amerlanerusut ataatsimut nittarsaasseqatigiinnermut tapersersuissasut. Amerlanerugutta nukittunerussaagut, Cuno Jensen oqarpoq, taassumali Kalaallit Nunaat qitiunerusumik inissinneqassasoq kissaatigigaluarpaa.

Tamanna ukiut marluk qaangiuppata allanngortinneqassanersoq Aalborg Kongres og Kulturcenterip neriorsuutigisinnaanngilaa.

- DanFish Internationalip ingerlanneqarnera, aamma Kalaallit Nunaannit peqataasoqarnera nuannaarutigeqaarput. Nittarsaassisut oqaloqatigisagut nuannaarlutillu naammagisimaarinnipput, maannalu DanFish 2027 pitsaanerpaamik pilersaarusiorsinnaaniassagatsigu soorunami nittarsaassisunit naliliiffissaassaaq, Lars Rønnov, AKKC-mi niuernermut pisortaq oqarpoq.

Nagguteeqqat Araballu

Nikoline Eugen Sørensen Aalborgimi Kalaallit Illuutaanneersup kalaallit saqqummersitsiviat, Aalborg Kongres og Kulturcenterimit kajumissaarneqarnikkut piviusunngortoq, naammagisimaarpaa.

Saqqummersitsivimmi kalaallit ulluinnarni inuunerannik takutitsisoqarpoq – Nagguteeqqat, Araba, sanalukkat avittallu. Aamma tiimik nilalerlugu nillorsikkamik kalaallit naasuinik sanaamik raajanillu uuliamut qalaassanik ussiisitsisoqarpoq – saqqummersitsiviullu immikkoortuani allami takuniaasut piviusungatitamik qimussimik angalaarnissaminnut periarfissaqarput.

Nannup amia Kalaallit Illuutaanniit takussutissatut saqqummersinneqarpoq – takuniaasullu arlallit Bamse ornillugu attorsinnaavaat.

- Kalaallit kulturiat inooriaasiallu saqqummersipparput – inuppassuillu Kalaallit Nunaat pillugu paasisaqarnerorusuttut oqaloqatigaagut.

- Takuniaasut ataatsimut isigalugu alapernaaqaat, inuppassuilli illuikkani najugaqanngitsugut – aqqusinernilu nanoqanngitsoq - paasigaangamikku tupaallattarput.

- Kalaallit Nunaat maanna soqutigineqaqaaq. Tamanna ajunngitsuuvoq, pissutsilli piviusut qanoq innersut nassuiassallugit suliassaqangaatsiarpugut.

- Takuniaasulli amerlanerpaat aalisarnermut arlaatigut attuumassuteqartut ilanngullugu oqaatigineqassaaq – Kalaallit Nunaallu aalisartoqarfissuusoq kialluunniit qularinngilaa.

Pisiortornermi ikiorneqarneq

Kalaallit takuniaasut amerlasuut nittarsaassisuniit pisiortoriartorlutik nittarsaassinermut peqataapput – matumanilu ingammik oqaatsit aporfiusinnaapput. Taamaammat KNAPK siunnersuisartullu Aapisi Danfishimi peqataapput.

KNAPK sisamanik peqataatitaqarpoq – Vittus Qujaukitsoq, Mikael Petersen, Lars Dahl maannalu siulittaasuujunnaartoq Nikkulaat Jeremiassen.

- Ilaasortagut ikiorniarlugit tamatigut peqataasarpugut, Mikael Petersen oqaluttuarpoq.

- Oqaluttaaneq, aalajangersimasut, soorlu akilersuinissamut periarfissat aningaasaqarnerlu, pillugit siunnersuineq isumagisarpagut.

- Ilaasortattali nittarsaassivitta naapiffittut atussagaat aamma pingaaruteqarpoq. Taamaammat ingilluni oqaloqatigiilaartoqarsinnaaniassammat kaffiuteqartuaannarlutalu tamulugassaateqartarpugut.

KNAPK-p nittarsaassiviattaaq nittarsaassinissamut aqaguttoq Danmarkimut timmisartuussineq taamaatinneqarsimammat ulloq siulleq inoqanngilaq.

Danfish sisamanngormat ualikkut matummat inuit nunanit 49-neersut 13.708-it takuniaasimapput.