Aqutsisoqarfik: Akileraarutit eqqaamasigit – aamma taxanik ingerlatsinermi
Akiliisitsilluni inunnik angallassinerit tamarmik akileraarnissamut pisussaaffeqartut, Akileraartarnermut Aqutsisoqarfiup eqqaasitsissutigaa. Folketingimut ilaasortap susassaqartut tamarmik ataatsimoorlutik inatsimmik nutaamik pisariaqartitsineq qulaajassagaat kaammattuivoq.
Annonse
Maleruagassat inatsisillu taxanut akinut amerlassusaannullu aalajangersaanermut atorneqartut pisoqalisimanerat pissutigalugu taxartitsisartut akornanni eqqissiviilliortoqarpoq.
Politiit ilaatigut Sermitsiamut ilisimatitsissutigaat siornatigut taxanik angallassinermik unioqqutitsilluni angallassinermik taaneqartartoq inerteqqutaajunnaarmat pinngitsoortinneqarsinnaajunnaartoq.
Suliap oqaluuserineqarnerani akiliisitsilluni inunnik angallassinernit isertitat akileraarutaasussaasut Akileraartarnermut Aqutsisoqarfiup eqqaasitsissutigaa, angallassineq taxanik ingerlatsinissamut allagartaqarluni allagartaqaraniluunniit pinera apeqqutaatinnagu:
- Isertitat tamarmik Akileraartarnermut Aqutsisoqarfimmut nalunaarutigineqartussaapput. Tamanna aamma suliffeqarfimmit sinneqartoorutinut atuuppoq, tassani akiliisitsilluni inunnik angallassineq (taxartitsineq) ilanngullugu.
- Angallassinerup taxamik akuersissummik assigisaanilluunniit peqarnani pinera akileraarutinut akiliisussaatitaanermut sunniuteqanngitsoq erseqqissaatigineqassaaq, Akileraartarnermut Aqutsisoqarfik Naalakkersuisut.gl-imi nalunaarummi allappoq.
Kalaallit Nunaat utaqqineqartoq
Danmarkimi angallannermut ministeriaqarfik taxanik angallassinermut inatsisinut pisoqaavallaartunut akisussaasuuvoq.
Inatsisilli nutarterneqartinnagit maleruagassallu atulersinneqalersinnagit, Naalakkersuisut erseqqissumik nalunaaruteqartariaqarput Kalaallit Nunaanni taxanut tunngatillugu sunik kissaateqarlutik.
Folketingimut ilaasortaq Aaja Chemnitz (IA) Sermitsiamut oqaluttuarpoq ukiup ataatsip missaa matuma siornatigut angallannermut ministerimut apeqquteqarsimalluni.
Kalaallit oqartussaat utaqqineqartut taamanikkut akissutigineqarpoq:
- Tamanna tunngavigalugu attaveqaqatigiinnermut ataatsimiititaliami aamma Kalaallit Nunaanni oqartussaasut peqataasut isumaqatigiissutigaat, taxartarnermut tunngasunik malittarisassaliornissamik pisariaqartitsinerup kommunini oqartussaasut attuumassuteqartut peqatigalugit oqaloqatigiissutiginissaa. Pisariaqartitsineq paasinarsippat, Kalaallit Nunaanni oqartussaasut kissaateqarpata attaveqaqatigiinnermut ataatsimiititaliami sulineq aallarteqqinneqarsinnaavoq, angallannermut ministeri Thomas Danielsen februaarimi 2023-imi akissuteqarluni oqarpoq.
Ersarissumik oqariartuuteqarnissamut kaammattuisoq
Suliaqarfimmi tamatumani pisariaqartitatik pillugit suliaqartut kommunillu erseqqissumik nalunaaruteqassasut Aaja Chemnitzip kissaatigalugu Sermitsiamut oqaatigaa, Naalakkersuisut danskit naalakkersuisuinut erseqqissumik nalunaaruteqarniassammata.
Allaaserisap matuma saqqummiunneqarnissaa sioqqutilaarlugu, taxanik ingerlatsisarnermut tunngatillugu inatsisit aaqqinneqarnissaannut Naalakkersuisut Danmarkimut saaffiginnissimasut, taamaalilluni inatsisit Kalaallit Nunaanni pisariaqartinneqartunut naapertuutilissammata, attaveqaasersuutinut naalakkersuisoq Hans Peter Poulsen (S), ataasinngornermi ullaap tungaani tusagassiortunik katersortitsisoqarnerani oqarpoq.
Suliaq nukinginnartutut suliarineqarpoq, naalakkersuisoq oqarpoq. Hans Peter Poulsenimit ersarinnerusumik oqaaseqartitsinissamik Sermitsiaq sulissuteqarpoq.
