Aquttut akissarsiaat qaffapput
Naalagaaffiup angallataani naalakkat aquttullu akissarsiaat 12,6 procentimik qaffapput.
Atorfillit Kattuffiat Kalaallit Nunaanni naalagaaffiup angallataanni Naalakkat Aquttullu Peqatigiiffiat, MALIK, sinnerlugu Naalagaaffimmut isumaqatigiinniarpoq martsip ulluisa pingajuanni. Isumaqatigiinniarnermi isumaqatigiissutigineqartut 4. marts 2009 atsioqatigiissutigineqarput.
Isumaqatigiisutigineqartut illua-tungeriit tunuliaqataannit manna akuersissutigineqarsimalerput. Isumaqatigiissut nutaassaq Danmarkimi Personalestyrelsemi allaqqissaarneqareerpat atsioqatigiissutigineqassaaq, akissarsiallu pitsanngoriaataat atsioqatigiinneq naammasineqarpat kingumoortumik tunniunneqarsinnaalissallutik.
Isumaqatigiissut ullumikkumut atuuttoq ukiuni pingasuni atuuttussamik nutarserneqarpoq, tassalu 1. april 2008-miit 31. marts 2011-ip tungaanut.
Nalinginnaasumik akissarsiat qaaffaatisaattut aningaasarsai tamarmiusut 10,5 procentit ukiunut pingasunut agguarlugu isumaqatigiissutigineqarpoq.
Taakkua saniatigut soraarnerussutisiassatut katersanut aninagaasarsiat tamarmiusut 2,1 procentiat qaffaatigineqassasoq isumaqatigiissutigineqarluni.
Taamaasilluni aningaasarsiat tamarmiusut 12,6 procentiat isumaqatigiinniarnermi angusarineqarluni.
Soraarnerussutisiassat 1. april 2009-miit 4,5 procentimiit ataatsikkut 7 procentimut qaffanneqassapput.