Arctic Circle Business: Inuit 32-t suliffimminnik annaasaqareersimapput
Qeqqata Kommuniani takornariartitsisartut corona pissutigalugu ajornartorsiortupilussuanngorsimapput, Arctic Circle Businessip misissuisimanerata tamanna takutippaa
Kaaviiaartitassat 2,6 millioner koruunit missaanniittut annaaneqarput sulisullu 32-t aningaasarsiaqartinneqaratik angerlartinneqarsimanngikkunik soraarsitaasimasut. Tassa taakkua coronap ajornartorsiortitsinerata Qeqqata Kommuniani takornariartitsisartunut kinguneqaatit ilagaat.
Soqutigisaqaqatigiit Arctic Circle Businessip sapaatip akunnerata naanerani ilaasortaminik misissuilluni apersuisimanerata tamanna takutippaa, suliffeqarfiit 14-it apeqqutinut akissuteqarsimapput.
Arctic Circle Businessimi ilaasortat tamarmik apersorneqarsimapput, pingaartumillu takornariartitsisartunut tamanna ajornartorsiortitsivoq, Arctic Circle Businessimi pisortaq Louise Lynge Berthelsen ilisimatitsivoq.
Suliffeqarfiit sisamat akissuteqarlutik oqaatigaat, ajornartorsiortoqarnera pissutigalugu akiliiisinnaajunnaariaannaallutik. Suliffeqarfinnit taamatut ilungersunartunik nalunaaruteqartoqartoqarmat, Arctic Circle Businessip Namminersorlutik Oqartussat qinnuigai ikiuuteqqulugit.
- Qeqqata Kommuniani takornariartitsisartut akiliisinnaajunnaarlutik matoorannginnissaat anguniarlugu Naalakkersuisut pilersaarusiorlutik iliuuseqarnissaat ujartorparput, Arctic Circle Businessimi pisorta Louise Lynge Berthelsen oqarpoq.
Aningaaseriviit ikiuussinnaassaut neriuutigigaa
Pisortaq ilaasortani sinnerlugit ataasinngormat ammasumik allagaqarpoq, tassanilu aningaaseriviit qinnuigai takornariartitsisartut ajornartorsiorneranni ikiuuteqqullugit:
- Aallartisaasutta innuussutissarsiummillu ingerlatsisutta taarsigassarsisimasut ernianut akilrsuiunnaarallarnissaat naafferaallutillu akilersuiunnaarallarnissaat eqqarsaatigalugu aningaaseriviit arlaatigut iliuuseqarnissaat amigaatigaarput, ilaasortavummi Covid-19 pissutigalugu maannakkorpiaq annaasaqarnertik pissutigalugu akilersuisinnaanngillat.
Arctic Circle Business apersuimmat, suliffiqarfinnit 14-iusunit arfineq-pingasut akissuteqarlutik oqaatigaat, akileraarutinut akiliiniarnissartik taarsigassarsiaminnullu naafferaallutik akilersuiniarnissartik piffissami aggersumi ajornartissallugu. Suliffeqarfiillu taakku aamma oqaatigaat, akiligassat taakku marluk kinguartinneqarsinnaasuuppata, ajornartorsiornerminnik qaangiiniarnerminnut iluaqutaassasoq.
Kaaviiaartitsinermi 14 mio. koruuninik annaasaqarsinnaasut
Suliffeqarfinnit naatsorsuutigineqarpoq, ajornartorsiorneq aasap tungaanut ingerlassappat, 14 millioner koruunit missaannik kaaviiaartisinermini annaasaqassallutik.
Suliffeqarfinnik missuineq ingerlanneqarsimavoq, nunami maani coronavirusimik tunillatsissimasoq siulleq ataasinngormat ullaap tungaani suli paasinqanngitsoq.