Arctic Circle Businessip pisortaq nutaaq ilisaritippaa
Naasunnguaq Beck Arctic Circle Businessip Sisimiuni Maniitsumilu allaffiini pisortanngussaaq.
Naasunnguaq Beck februaarimi Arctic Circle Businessimi pisortanngussaaq.
Assiliisoq: Arctic Circle Business
Aggustip qaammataani saqqummiunneqarpoq Arctic Circle Businessimi pisortaasimasoq Jesper Schrøder ukioq manna oktobarip naanerani tunuassasoq.
Maanna taanna taarserlugu Naasunnguaq Beck, ilaatigut Namminersorlutik Oqartussani naalakkersuisumut allatsitut atorfeqarsimasoq, atorfinitsinneqarpoq.
Arctic Circle Business tusagassiuutinut nalunaarummi taama allappoq:
Naasunnguaq februaarip pingajuanni 2025-mi atorfinissaaq, tamannalu qilanaaraa:
- Qeqqata immikkoortortaqarfiani atorfittaara inuussutissarsiornermullu nukittorsaanissannut peqataanissara nuannaarutigeqaara. Namminersorlutik Oqartussanit misilittakkakka aammalu Maniitsumit sorlaqarnera tunngavigalugit suliffeqarfiit suleqatigisartakkallu qanimut suleqatiginissai qilanaareqaara. Nunattalu attaveqaatitigut aaqqissuussaanerata nutaajusup iluani periarfissat nutaat atorluarnissaat aammalu politikkikut suliani nutaajusuni suleqatigisartakkat suliffeqarfiillu peqatigalugit sumiissusersiornissaq qilanaareqaara, Naasunnguaq Beck oqarpoq.
Arctic Circle Businessimi siulersuisuni siulittaasoq Sofie Frydenrejn Johansen atorfinitsitsineq pillugu ima oqarpoq:
- Qeqqata immikkoortortaqarfiani suliatsinni Naasunnguup aqutsisuunissaa eqqortuusoq upperaarput. Piginnaasai sumiiffimmillu sorlaqarnera uagutsinnut annertuumik nukittoqqutaapput. Suleqatigiilluarnissatsinnut nunallu immikkoortortaqarfiata inuussutissarsiornerata tapersersornissaanut qilanaarpugut.
