Arctic Hubermiut suleqatiminnik pisortartaarput
Jula Maegaard-Hoffmann, Anna-Sofie Skjervedal ukiakkut 2023-mi atorfimmiit tunuartoq taarserlugu, Arctic Hubimi allattoqarfimmi pisortanngorpoq. Jula Maegaard-Hoffmann allattoqarfiup aallartisarneqarneranili peqataasimavoq.
Arctic Hub allattoqarfimmi pisortartaarpoq, tassaasoq Jula Maegaard-Hoffmann, 2021-miilli allattoqarfimmi sulisoq.
Arctic Hub tusagassiuutinut nalunaarummi taama allappoq.
- Kalaallit Nunaanni ilisimatusarneq aatsaat taama soqutigineqartigaaq, ukiunilu takkuttuni soqutigineqarneruleraluttuinnartussaavoq. Suliniutivut pingaarnerit siulliit aallartereernikuuavut, allattoqarfimmilu pisortatut Arctic Hubimi siunissami suliassatsinnik sammiviilinissara qilanaaraara, Jula Maegaard-Hoffmann atorfittaani pillugu taama oqarpoq.
Anna-Sofie Skjervedal 2023-mi ukiakkut pisortatut tunuarmat allattoqarfimmi pisortaagallartuuvoq, maannalu januaarip aallaqqaataani 2024-mi atorfimmi tassani aalajangersimasumik atorfeqalerpoq.
Kingornussarsiaq angingaartoq
- Arctic Hubip ullumikkut peqatigiiffittut pingaaruteqalernissaa Anna-Sofiep sulissutigingaatsiarsimavaa. Qujamasuppugut Arctic Hub peqatigiiffittut nutaajugaluartoq ilisimatusarnermik sulialinnit tikilluaqquneqarluarmat.
- Taamaammallu ataqqinningaarlunga sulinera aallartippara – Arctic Hubimi siulersuisut allattoqarfimmiullu qanimut suleqatigalugit. Tunngaviliilluartoqareerpoq, suliarlu tamanna ingerlateqqissavarput Kalaallit Nunaanni ullut tamaasa ilisimatusarfigineqartartorpassuit soqutiginaqisut nunatsinni nunanilu tamalaani suli iluaqutigineqarnerulerniassammata, allattoqarfimmi pisortanngortoq oqarpoq.
Arctic Hubip allattoqarfia Nuummiippoq, massakkorpiarlu piffissaq tamaat sulisut sisamaapput ataatsimillu praktikkertoqarluni. Arctic Hubip pilersinneqarneranut siunertarineqarpoq Kalaallit Nunaanni ilisimatusarfigineqartut malinnaavigiuminarnerulersinnissaat ilisimatusarnermilu paasineqartut innuttaasunut tamanut ammasuutinnissaat.
Siulersuisut iluarisimaarinnipput
Arctic Hubimi siulersuisuni siulittaasup, tassa DMI-mi pisortaq tulliata, Ulrik Korsholmip, allattoqarfimmi pisortanngorlaamik suleqateqarnermi ingerlatiinnarnissaa qilanaaraa:
- Jula nalunngereeratsigu taassuminnga suleqateqarnitta ingerlatiinnarnissaa qilanaaraarput. Jula Arctic Hubimik aallarnisaaqataasimavoq suliarineqartunillu siullernik iluatsisitseqataasimalluni. Siulersuisut qularutiginngilaat Julap piginnaaneqarluarluni allattoqarfik suliassanut nutaanut siulersussagaa, Arctic Hub ilisimatusarnerup inuiaqatigiillu sunniivigeqatigiinnerannik naleqarnerulersitsiartortuarluni, siulersuisuni siulittaasoq Ulrik Korsholm oqarpoq.
Arctic Hubip suliaannut ilaavoq ilisimatusarfigisanik saqqummiussillaqqinneqqisaanneq Paasisavut. Aamma Arctic Hub workshoppertitsisarpoq ilisimatusartut ilisimatusaatigalugu suliaminnik ataqatigiissaariffigisinnaasaannik Greenland Science Weekimillu aallarnisaasunut pingaarnernut ilaalluni.