Arctic Umiaq Line A/S nutaamik pisortartaassaaq

Jens-Jakob Sandgreen Arctic Umiaq Line A/S-imi septembarip 15-iani 2022-mi atuutilersumik pisortassatut sulilissaaq.

Arctic Umiaq Line A/S-ip siulersuisuinit toqqarneqarpoq. Arctic Umiaq Linemi maanna pisortaasup Aviâja Lyberth Lennertip Royal Arctic Linep piujuaannartitsinissamik attaveqaqatigiinnermillu suliaqarnerata annertusarnissaanik suliaqarnini aallukkumallugu toqqarsimavaa. Tamanna tusagassiutinut nalunaarutigineqarpoq.

Siulersuisuni siulittaasup Verner Hammekenip Aviâja Lyberth Lennert Arctic Umiaq Line-mi ukiuni kingullerni tallimani sulisimaneranut qutsavigaa:

- Arctic Umiaq Linep ukiuni kingullerni tallimani iluatsitsiffiulluartumik ingerlaneranut tunniusseqataasimaneranut Aviâja qutsavigaarput. Aviâja pissutigerpiarlugu nunap immikkoortuini ingerlatseqatigiiffiup atuuffigisaani Arctic Umiaq Linep soqutigineqarnera annertusiartorsimavoq. Arctic Umiaq Line innuttaasut akornanni atassuteqaataavoq pingaarutilik, aamma timersornermut piorsarsimassutsimullu tunngatillugu, soorlu tamanna aamma assersuutigalugu Sarfaq City Runip ingerlanneqartarnerani takuneqarsinnaasoq. Ingerlatseqatigiiffik pitsaasumik inissisimavoq ineriartorteqqinneqarnissaminullu toqqammavissaqarluarluni”, siulersuisuni siulittaasoq Verner Hammeken oqarpoq.

Pisortatut toqqarneqarlaap ajornartorsiutinik aaqqiiniarnermik nutaanillu inerisaanermik annertuumik misilittagaqarnera pissutigalugit Arctic Umiaq Line ineriartorluaqqissinnaasoq Verner Hammekenip upperaa.

Nunanut tamalaanut sammisoq

Sullitallu sullinneqartarnerisa immikkut tappiffiginiarneqarnerat atorfittaanimut nassassavai, taamaattumillu siulersuisut isumaqarput mittarfinnik nutaanik pingasunik peqalernerani takornariartitsinikkullu periarfissat malunnaatilimmik annertusineranni Arctic Umiaq Linep siuttuuffiginissaanut piginnaasassat pisariaqartut pigigai.

Aammattaaq Jens- Jakob Sandgreen nunanut tamalaanut sammisumik isiginnittaaseqarpoq tassuunalu nunatsinnit isiginnittaaseq aamma saqqummiunneqarsinnaalluni, Verner Hammeken oqarpoq.

Sulilernissani qilanaaraa

Ukiuni qulikkuutaani nunani tamalaani aallarnisaasutut aammalu Qaanaamit Nanortalimmut inuussutissarsiutinik ingerlatalinnut siunnersortitut sulereerluni siunissap qanoq immersornissaa alaatsinaaffigalugu Jens-Jacob Sandgreenip Arctic Umiaq Line suliffigilertussanngorpaa.

- Takornariartitsisarneq angalariaaserlu allanngorput, Arctic Umiaq Linemilu suleqatigiit peqatigalugit sinerissami inuussutissarsiutinik ingerlatallit takorluuisinnaasut suleqatigalugit nunarsuarmi nioqqutinik pilerinarluartunik qanoq pilersitsisinnaanerput angalanermilu misigisassanik nutaanik Nunatsinnullu periarfissanik ilusilersuinissaq misissussallugu qilanaarivara, Jens-Jakob Sandgreen oqarpoq.

Ingerlatseqatigiiffik Arctic Umiaq Line A/S Royal Arctic Line A/S-imit tamakkiisumik pigineqarluni suliffeqarfiutigineqarpoq.