Arctic Umiaq Linemi pisortaq soraarpoq

Umiarsuaatileqatigiiffik Arctic Umiaq Line, Royal Arctic Linep ataaniittoq, nutaamik pisortassarsiortussanngorpoq.

Pisortaasimasoq Jens-Jakob Sandgreen Facebookimi allappoq atorfimminit tunuarniarluni:

- Arctic Umiaq Linemi sulinera naammassivoq.

- Umiarsuaatileqatigiiffik inuiaqatigiillu sinerissamiittut pissanganartumik siunissaqarput periarfissagissaartunik. Neriuppunga piginnaasaqarluartut tunniusimasuullu amerlasuut Arctic Umiaq Linemi pisortatut tullinnguuttussatut qinnuteqassasut. Atorfik innersuulluarsinnaavara, Jens-Jakob Sandgreen Facebookimi allappoq.

Amigartoorneq annikitsoq

Jens-Jakob Sandgreen septembarip 15-ianni 2022-mi Aviâja Lyberth Lennert taarserlugu pisortaanertut atorfinitsinneqarpoq. Anders B. Larsen pisortaanerup nutaap atorfinitsinneqarnissaata tungaanut pisortaagallareersorlu. Anders B. Larsen Royal Arctic Linemi umiarsuarnik ingerlatsinermut pisortaavoq.

Arctic Umiaq Line 2023-mi 306.746 koruuninik amigartooruteqarpoq, 2022-mi 5,6 millionit koruuninik sinneqartooruteqarluni. Kaaviiaartitat aamma 3 millionit koruunit sinnerlugit apparsimapput.

Ukiumoortumik nalunaarusiaq naapertorlugu angusat ajorseriarnerannut pissutaavoq umiarsuarnut orsussamut aningaasartuutit qaffakkiartornerat, aammali umiarsualivimmut tikinnermut aningaasartuutit annertusinerat, aamma ingerlatseqatigiiffiup allanngortiterineranut atatillugu aningaasartuutit assigiinngitsut.

Jens-Jakob Sandgreen ingerlatseqatigiiffiup aningaasaqarnerata ajorseriarnera soraarnerminut pissutaanngitsoq Sermitsiamut oqarpoq, tuniniaanermimi angusat qaffasinnerpaat avammut aningaasartuutinit qaffasinnerusunit ipitinneqarput, aamma soraarnini pillugu itinerusumik oqaaseqarsinnaanngilaq:

Pisortaasimasoq soraartoq: Sinersortaat killeqartitsivoq

- Oqaannarsinnaavunga Arctic Umiaq Line mittarfiit ammarpata pissanganartumik siunissaqartoq.

- Ingerlatseqatigiiffiup pisortassaata tulliata sulisunik, siulersuisunik soqutigisaqaqatigiinnillu suleqateqarnissani qilanaarisinnaavaa.

Sarfaq Ittuup sinersortaammik nutaamik taarserneqarnissaa Arctic Umiaq Linep siunissaanut pingaaruteqartoq Jens-Jakob Sandgreenip ilanngullugu oqaatigaa.

Umiarsuup ukiunik 32-nik pisoqaassusillip ineriartortitsinissamut periarfissat killeqartippai, Arctic Umiaq Linellu unammilligassaraa umiarsuarmut tunngasoq, oqarpoq.

Nammineq suliffeqarfimmi pisortaanermini misigisani naammagisimaarlugit ilanngullugu oqaatigaa:

- Suliffeqarfik nutarterpara, Arctic Umiaq Linelu nutaamik pisoqalerpoq, Jens-Jakob Sandgreen oqarpoq.

Unneqqarissumik pilersaarutinik qulakkeerisimavoq

Pisortap soraarneranut atatillugu Royal Arctic Line tusagassiuutinut nalunaarummi ima allappoq:

- Nioqqutit ingerlatseqatigiiffiup umiarsuaataani Sarfaq Ittummi ullumikkut neqeroorutigineqartut ineriartortinneqarnerat Jens Jakob Sandgreenip pisortaanermini siuttuuffigaa.

- Ingerlatseqatigiiffiup siunissami atuuffigisassaata isumaliutigineqarneranut aallaaviusussanik periarfissaasinnaasunut nassuiaatit maanna pigineqalernerat Jens Jakob Sandgreenimit aamma qulakkeerneqarpoq. Siulersuisut Jens Jakob Sandgreenip ingerlatseqatigiiffimmut sullissineranut qujaffigerusuppaat siunissamilu ingerlalluarnissaanik kissaallugu.