Arctic Umiaq Line A/S (AUL) aamma
Namminersorlutik Oqartussat ukiuni tallimani piffissami 2021-miit 2025
ilanngullugu atuuttussamik ilaasunik kiffartuussinermut
isumaqatigiissuteqarput. Nuummi, Qaqortumi Ilulissanilu suluusalinnut
mittarfissat nutaat 2024-mi atuutilernissaat pilersaarutaanikuuvoq, tamatumalu
kingorna Arctic Umiaq Linep siunissaa naliliiffigineqassasoq
pilersaarutaanikuulluni.
2021-mili nunarsuaq tamakkerlugu coronap
ajornartorsiutaanerata kingunerisaanik mittarfissualiorluni sanaartornerit kinguaattoorfiupput,
taamaalilluni Qaqortumi Ilulissanillu mittarfissat aatsaat aappaagu 2026-mi
ukiup aaffaata kingulliup ingerlanerani atulertussatut
naatsorsuutigineqalerlutik.
Arctic Umiaq Line A/S (AUL) aamma
Namminersorlutik Oqartussat ukiuni tallimani piffissami 2021-miit 2025
ilanngullugu atuuttussamik ilaasunik kiffartuussinermut
isumaqatigiissuteqarput. Nuummi, Qaqortumi Ilulissanilu suluusalinnut
mittarfissat nutaat 2024-mi atuutilernissaat pilersaarutaanikuuvoq, tamatumalu
kingorna Arctic Umiaq Linep siunissaa naliliiffigineqassasoq
pilersaarutaanikuulluni.
2021-mili nunarsuaq tamakkerlugu coronap
ajornartorsiutaanerata kingunerisaanik mittarfissualiorluni sanaartornerit kinguaattoorfiupput,
taamaalilluni Qaqortumi Ilulissanillu mittarfissat aatsaat aappaagu 2026-mi
ukiup aaffaata kingulliup ingerlanerani atulertussatut
naatsorsuutigineqalerlutik.
Nuummi mittarfik siorna 2024-mi novemberimi
atulerpoq. Mittarfissuit pingasut taakku atulerpata Arctic Umiaq Line
atorunnaassasoq umiarsuarlu sinersortaat Sarfaq Ittuk tunineqassasoq
politikkikkut siunertaasimagaluartoq, umiarsuaatileqatigiiffik suli
pisariaqartinneqartoq, taamaattumillu nutaamik sinersortaatitaarnissaq siunertaralugu
suliniutit ingerlasut Arctic Umiaq Linep pisortaa Taatsiannguaq Olsen oqarpoq.
Isumaqatigiissut nutaaq
Mittarfiliornerit kinguaattoorfiunerisa
kingunerisaanik Arctic Umiaq Linep Namminersorlutik Oqartussanut
kiffartuussinissamut isumaqatigiissutaata ukioq manna ukiup naanissaanut
atuuttup, immaqa ukiumik ataatsimik marlunnilluunniit sivitsoqqinneqarnissaa
siunertaralugu oqaloqatigiinnerit piffissami aggersumi aallarteqqissasut,
Taatsiannguaq Olsen erseqqissaavoq. Ukioq manna januarimiit juli ilanngullugu
Sarfaq Ittummut ilaasut 10.696-iupput ukiullu naaneranut ilaasut 20.000-it
missaaniinnissaat naatsortuutigineqarpoq. Sarfaq Ittuk Ilulissat Qaqortullu akornanni sapaatip akunnikkaartumik
ukioq manna ingerlaarpoq, pisortallu oqarnera naapertorlugu Sarfaq ittuk suli
annertuumik pisariaqartinneqarpoq.
Annertuumik amigartoortoq
Arctic Umiaq Linep 2024-mi akileraarutit
ilanngaatigereerlugit 10 millionit koruuninik amigartooruteqarpoq, tamanna
nunaqavissut ikinnerusut angalasimanerannik, kiisalu umiarsuarmi ineeqqat
paarnaartartut takornarianut akiliiumanerusunut siunniussat naatsorsuutigisamiit
ikinnerusunit piumaneqarsimanerat pissutaasut suliffeqarfik nassuiaavoq. Sarfaq
Ittummut ilaasut 2023-mi 21.780-iupput, 2024-mili 16.780-inut
ikileriarsimallutik, taamaalilluni ilaasut 5.000-nik ikinnerusimallutik.
Kisiannili Kalaallit Nunaata avataaneersut amerliallalaarsimapput, tassa
2023-mi 3.227-usut 2024-mi 3.807-iullutik. Ukioq 2023-mi taannalu sioqqullugu
Sarfaq Ittuk 246-nik siniffeqarnikuuvoq, 2024-mili ineeqqat
allanngortiterneqareernerisa kingorna siniffiit 203-nut ikilinikuullutik.
AUL pillugu nalilersuisoqartoq
Sineriak sinerlugu ilaasunik imaatigut
angallassinermi periarfissaasinnaasut pillugit nassuiaammi 2024-mi
saqqummiunneqartumi Arctic Umiaq Line 2025-p kingorna qanoq pineqassanersoq
sammineqarpoq. Tassani periarfissat tallimat assigiinngitsut taaneqarput,
ilaatigut umiarsuaatileqatigiiffiup matuneqarnissaa imaluunniit
ineriartortinneqarnissaa periarfissatut taaneqarlutik. Sineriak sinerlugu
imaatigut ilaasunik angallassineq umiarsuaatileqatigiiffinnit allanit
maannakkut ingerlanneqanngilaq, taamaattumik Arctic Umiaq Linep siunissaa
pillugu politikkikkut ersarissumik suli isummertoqanngikkaluartoq,
ineriartortinneqarnissaa pillugu misissuinerit suliniutillu ingerlasut
Taatsiannguaq Olsen.
Umiarsuaq nutaaq
Sarfaq Ittuk 1992-imi sanaajuvoq ukiunillu
34-nik pisoqaatigaluni. Kingornatigut 2000-imi nutarterneqarpoq, 2024-milu
iluatsitsiffiuallaanngitsumik ineeqqat ikilisinneqarlutik. Sinersortaatilli
nutaaliaasumik, anginerusumik, sukkanerusumik amerlanerusunillu
ilaasoqarsinnaasumik siunissami taarserneqarsinnaanissaa siunertaralugu
titartaasitsisoqarnikuuvoq. Sarfaq Ittuk diesilitortuuvoq, 73 meterinik
takitigaluni 11 meterinillu silitsigaluni, kiisalu 12,5 knobimik sukkatigisumik
ingerlasinnaalluni, sinersortaalli nutaaq 300-t missaannik ilaasoqarsinnaasoq
diesilimik kallerullu inneranik ingerlatilik, 93 meterivoq 17,8 meterinillu
silitsigaluni, kiisalu 15 knobimik sukkatigaluni ingerlasinnaalluni
containerillu 20 fodit arfineq pingasut usisinnaallugit.
Sapaatip akunneranut ataasiarluni Ilulissat
Qaqortullu akornanni angalasarneq uterfigineqaqqimmat billetsillu
akikillineqarmata Sarfaq Ittummut ilaasartut amerliartoqqilersut, Taatsiannguaq
Olsen oqarpoq.
- Kiffartuussinissamut
isumaqatigiissut ukiuni arlalinni nutarterneqaqqissappat nutaamik
sinersortaatitaarnissarput pilerigisinnaagaluarparput.
- Pingaartumik
Nuummik kujammut aamma Ilulissaniik kujammut ulikkaaqqasaajaarpugut,
umiarsuarmilu siniffiit amerlanerusut maannakkut pisariaqartippagut, taanna
oqarpoq.
Arctic Umiaq Linellu pisariaqartinneqarnera
suli annertummat umiarsuarmik nutaamik, anginerusumik tulluunnerusumillu
titartaasitsinikuullutik, kisiannili imaatigut ilaasunik angallassineq pillugu
politikkikkut qanoq aaliangertoqassanersoq apeqqutaajumaartoq, pisortaq
oqarpoq.
Imaatigut ilaasunik angallassineq
pisariaqartoq
Marloqiusamik tassa silaannakkut
imaatigullu angallassisarneq suli pingaaruteqarpoq, Taatsiannguaq Olsen
nammineq inuttut isumaqarpoq.
- Silaannakkut
angallannermi unammilligassat qanoq amerlatigisut maannakkumut takoreerparput,
taamaammat siunissami timmisartut kisiisa isumalluutigilissagutsigu ilaasunik
kiffartuussinermut pitsaanngitsumik kinguneqarnissaa ernummatigaara, taanna
naqissusiivoq.
Sinersortaatip titartagartaa naapertorlugu
ilaatigut elevatoreqarpoq, saunaqarpoq, timigissartarfeqarpoq aammalu
neriniartarfeqarlunilu caféqarluni, kiisalu aquani angisuumik
isersimaartarfeqarluni, taannalu millionilikkaanik pingasunik kisitsisitalimmik
akeqassasoq missingersuunneqarpoq. Taamaakkaluartoq sinersortaat nutaaq imminut
akilersinnaasumik ingerlasinnaasoq Arctic Umiaq Linemiit nalilerneqarpoq.
Iluatsilluartoq – siunissarli nalunartoq
Arctic Umiaq Line angalatitsivimmik
Ilulissaneersumik Sea Greenlandimik Ilulissat, Uummannap Upernaviullu akornanni
aasakkut ukiakkullu angallassinissamut isumaqatigiissuteqarpoq. Uummannami eqqaani nunaqarfinnut ilaasartut
ikippallaarneri pissutaalluni ukioq manna nunaqarfiit minillugit
angallassisoqartalissasoq Taatsiannguaq Olsen oqarpoq.
- Ukioq
manna 15. junimiit 31. Julip tungaanut ilaasut 140-t missaaniipput,
taamaattumik iluatsilluartutut oqaatigisariaqarpoq.
- Periuseq
taanna siunissami ingerlaannassanersoq naluara, isumaqatigiissut ukioq manna
taamaallaat atuuppoq, tamannalu politikkikkut piumasaanikuulluni, taanna
oqarpoq.
Sea Greenland Ilulissat Uummannap
Upernaviullu akornanni ilaasunik assartuinera siunissami ingerlaannassanertoq
suli qularnaatsumik oqaatigineqarsinnaanngitsoq, Arctic Umiaq Linep pisortaa
oqarpoq.
Sullissinissamut isumaqatigiissut nutaaq
qaqugu suliarineqassanersoq ukiunilu qassini atuutissanersoq pillugu
Attaveqaasersuutinut, Isorliunerusunullu Naalakkersuisoq Aqqaluaq B. Egede,
Inuit Ataqatigiit, paasissutissanik pissarsiffigineqarsinnaasimanngilaq.
