Arctic Umiaq Linep ulluinnarlugu billetsit atuutsilissavai
Sinersortaammut Sarfaq Ittummut ilaasartut aappaagumiit ulluinnarlugu angalasutut akikinnerusumik akiliisinnaalissapput. AUL-ip naatsorsuutigaa ulluinnarmut billetsit aappaagu angallassilernermi soqutigineqarluassasut.
Arctic Umiaq Line 2024-mi angallassinissanut inniminniinissat ammarpai. Inniminniiniartunullu billetsitut pisiassat periarfissat arfinillit toqqarneqarsinnaalerput. Unnuinertaqanngitsumik angalasunut, innarfissaqanngitsumik billetsisisoqarsinnaalerpoq.
Sarfaq Ittummi ilaasartut tallimaagaangata ataaseq unnuinertaqanngitsumik angalasarpoq. Taamaammat sinersortaammik piginnittut naatsorsuutigaat billeti unnuinertaqanngitsoq soqutigineqarluassasoq.
- Nunaqavissuulluta umiarsuarmut billetserseriaaserput aallarnissamut qanittuaraasarnera ersarippoq, taanna kulturi nunatsinni taamaallaat ilisarnanngilaq, nunanili allani aamma atuummat, soorlu København Hovedbanegård-mi billetseerniarnukaraangatta massakkuusumut qimutsuitsorniarluta, takornarialli qaammaterpassuit siorna isumannaareertartut, AUL-imi pisortaq Jens-Jakob Sandgreen oqarpoq.
Tamanut inissaqartitsineq
Angalanermi periarfissat assigiinngitsut saniatigut billetsip atornissaanut, allanngortinnissaanut utertissinnaanissaanullu periarfissiisoqarpoq, billetsit pisinnaasai assigiinngitsut pingasunngortinneqarlutik.
- GO billeti nunaqqatitsinnut inersimasunut angalanissaminnut allannguinissamut pisariaqartitsinngitsunut tulluarsagaavoq. STANDARD FLEX-illu suli aalajangiusimavinnginnissaminnut pisariaqartitsisunut tulluarsagaapput, pisortaq ilisimatitsivoq.
Jens-Jakob Sandgreenip erseqqissaatigaa takornariat Sarfaq Ittummut ilaasartut amerliartulereersimasut, taamaattumillu billetsisinermi angalanerup piffissamut allamut nuutsissinnaanissaanik periarfissaq takornariat aappaagumiit ajornannginnerusumik atorsinnaalissagaat.
- Arctic Umiaq Line anguniarpaa ilaasuni assigiinngissinnaaqisut aamma periarfissanik
assigiinnginnerusunik neqerooruteqarsinnaaneq.
AUL-ip angalanermi periarfissai neqeroortusaalu, nittartagaani takusinnaavatit.