Arfanniarneq taperserneqarpoq
Danmarks Fikeriforeningip aamma Landbrugsrådip siulittaasuinit Kalaallit Nunaata arfanniarnera tapersersorneqarpoq.
Kalaallit Nunaat arfanniarnissaminut pisinnaatitaaffeqartigaaq, Danmarkip aalisarsinnaaneratut aammalu nersussuarnik puulukinillu uumasuuteqarsinnaaneranut, tamanna nungusaataanngitsumik pippat.
Taamatut aalajangersaavoq Danmarks Fiskeriforeningip siulittaasua Flemming Ebey Kristensen. Tamatumanilu Landsbrugsrådip præsidentia Peter Gæmelke isumaqataavoq.
- Isumaqanngilanga arfanniarneq unitsinneqassasoq. Nunalerinertut aalisarnertullu inuussutissarsiutaavoq, pinngortitap pisuussutaanik inuussuteqarfiusoq. Taamaattumik soorunami nungusaataanngitsumik ingerlanneqassaaq, Peter Gæmelke oqaaseqaammini Sermitsiamut oqarpoq. Taassumali erseqqissarpaa kalaallit arfanniarnerat nalinginnaasumik nammineq oqartussaaffeqarfimmi ataaniinngitsoq.
Danmarks Fiskeriforeningip siuttuisa aamma kalaallit arfanniarnerat oqaloqatigiissutigisimanngilaat. Siulittaasullu nammineerluni Kalaallit Nunaata arfanniarsinnaanera tapersersorpaa.
- Takusinnaanngilara sooq Kalaallit Nunaata arfanniarnini ingerlatiinnarsinnaanngikkaa. Nungusaataanngitsumik ingerlanneqartillugu, Flemming Ebey Kristensen oqarpoq.
Apeqqummi tamatumani misigissutsit aalajangiisuunissaat mianersoqqussutigaa.
- Uanga aamma arferit angisuut alutoreqaakka. Tamattali pinngortitap pisuussutaanik inuussuteqarpugut. Danmarkimi nersussuit puulukillu toqorartarpavut. Aamma ilaanneeriarluni nersussuaaqqamik toqutsinissaq ajornakusoorsinnaagaluartoq, Flemming Ebey Kristensen oqarpoq.