Arferit mikisut qanoq amerlatigisut ukiumut toqusarpat?

Sofia Rossenip aalisarnermut mministeri Hans Chr. Schmidt paasissutisseeqquvaa, EU-mi aalisarnermut atatillugu arferit mikisut (niisat, aarluarsuit il.il.) qanoq amerlatigisut ukiumut ipillutik toqusarnersut. Aamma paaserusuppaa EU-Kommissioni siunnersuuteqarsimanersoq aalisarnerup suulluunniit, annertuumik saniatigut pisaqarani arfernillu kigaatsumik ipititsilluni ingerlanneqartup, inerteqqutigineqalernissaanik.

Sofia Rossen: – EU-mi avatangiisinut aalisarnermullu kommissærit Nunat Tamalaat Arfanniarnermut Ataatsimiititaliarsuata eqqissisimatitsinissamik iluarsaassisuunani piniarnermik iluarsaassisutut kattuffinngorniarneranut qallunaat isumaat sapaatip akunnerani kingullermi isornartorsiorsimavaat.

– Danmarki isumaqarpat siunissami IWC-mi aalajangiunneqartoq arferit ilaat ima amerlatigilersimasut nungusaataanngitsumik piniarneqarsinnaasut, taava tamanna aqqutissiuunneqassaaq. Periuseq tamanna imaani pisuussutinut uumassusilinnut allanut tamanut EU-mi atorneqarpoq, kommissærillu tamakkua isumaqarsimagunarput periuseq tamanna EU-p atorunnaarsittariaqaraa, imaani pisuussutit EU-p nammineq atunngisai pineqartillugit.

– EU arferit eqqissisimatineqarnissaanut immikkut isumaqaruni taamaattumik oqallinnermut tamatumunnga pingaaruteqassaaq paasissallugu EU-p aalisarnermut politikkiata qanoq akuersaarneraa arferit qanoq amerlatigisut EU-p nammineq malittarisassaani pilliutigineqartussatut akuerineqarnersut, Sofia Rossen isumaqarpoq.