- Arfertasseeqqinnissaq iluaqqutaanngilaq

IWC'p juulip aappaanit arfernganut ataatsimiinnissaa sioqqullugu Videnskabskomité Panamami ulluni makkunani ataatsimiippoq. Kalaallit Nunaata taamalu Danmarkip arfattassaasa amerlineqarnissaannik piumasaqaataat tyskit uumasunik illersuiniaqatigiivisa kamaammissutigalugulu tupaallaatigeqaat.

Danskit naalakkersuisui kalaallinit folketingimut ilaasortanit ilungersortinneqarput taamaattumillu kalaallit arfanniartarnerannik tapersersuillutik, Europa-Parlamentimi ilaasortaq Margrethe Auken, SF isumaqarpoq.

Miluumasunik imarmiunik piniarneq akerleriissutaavoq. Nunat Japanitut Islanditullu ittut akuttunngitsumik ilungersornartorsiortitaasarput. Maanna Danmarkip Kalaallit Nunaanni "nunap inoqqaavisa" arfattassaasa amerlineqarnissaat piumasarilerpaat. Uumasunik illersuiniaqatigiit annilaanngatigaat nunat allat aamma taamaaliornialissasut, tyskit aviisiat Der Spiegel allappoq.

Tyskit pisortaat taamatulli Der Spiegelimut oqaaseqaateqarput danskillu piumasaqaataat paasiuminaatsillugu.

Danmark pinngitsaalisaavoq

- Uagut tungitsinnit paasiuminaappoq assersuutigalugu Danmarki tikaagulliusaanik pisassaqartut arfattassamik amerlineqarnissaannik piumasaqarmat, naak maannamut pisassarineqartut qalleqqajarnagit pisaqartarlutik, forbundsministeriummimit akisussaasuulluni oqaaseqartoq Der Spiegelimut oqarpoq.

Aamma Danmark ilungersortinneqartoq, Margrethe Auken oqarpoq.

- Danskit naalakkersuisuisa piumasaqaat tapersersorpaat pissutiagalugu kalaallit folketingimut ilaasortaatitaannit tapersersorneqarnissartik pinngitsoorsinnaannginnamikku, kisianni kalaallit arfattassaasa amerlineqarnissaat iluaqqutaanngilaq, taakkua neqi pissarsiassartik anneq qeritiinnartussaagunarmassuk. Takorlooruminaappoq arferup neqaa annermik piumaneqalersimanissaa, ilaasortaq Auken oqarpoq.

Danmarkip IWC-mi isumaqatigiinniartartua, Ole Samsing, oqarpoq arferit piumasarineqartut 5 procentiinnarmik amerlanerusut.