Arnat assassortartut takornarianut umiarsuarnut takornariartaatinut ilaasunut assassukkaminnik tuniniaasartut

Takornariarpassuit “Norwegian Star”-imeersut, pisiniarfinni tallimani arfinilinniluunniit imerfinnik, tujuuluaqqanik, teqqialinnik, juullerpaluttunik, pinnersaatinik eqqumiitsulianillu kalaalerpaluttunik eqqaassutissaminnik pisiniarlutik Nuummi umiarsualiviup eqqaani takornarianut sullissiviup mikisup saavaniipput.

Nerriviusat tunuiniipput tuniniaasut inuusuttut, pisiniartut apeqqutaannik, immaqa nioqqutissap sananeqaataanut tunngasunik, akisartut.

Nioqqutissanik immikkuullarissunik taakkuninnga ilaannik sanasut tassaapput arnat marluk suliumatuut — Sascha Steinbacher aamma Kunngu Sørensen — taakkualu tamarmik immikkut isumassarsiullaqqissuunermikkut, assassornermikkut najukkamilu suleqateqarnikkut inuussutissarsiuteqalersimasut.

Sunngiffimmi sammisartakkamiit ulloq naallugu suliffeqalerneq

Sascha Steinbacher sunngiffimmi soqutigisatut suliaqartarluni aallartippoq. Puisit amii Great Greenlandimeersut atortarlugit, kusassaasersortarlugit, ilaatigullu ilisarnaatiminik, qalersaaqqamik, pinnersartarlugit, ukiut tallimat matuma siorna juullimut pinnersaatissanik sanasalerpoq.

- Sunngiffimmi soqutigisatut aallartippoq, kisianni inuit suliannik soqutiginnilermata ingerlatiinnarnissaanut kajumissusinippunga. Siaruapallappoq, maannalu imminut akilersinnaavoq, Sascha Steinbacher oqaluttuarpoq, taannalu ullumikkut nammineq suliffeqarfimmik, Crea by Saschamik, ingerlatsivoq takornarianullu sullissivimmi pisiniarfimmik ingerlatsilluni.

Nioqqutissaatini umiarsuarnut takornariartaatinut siorna tuninialerpai. Assigiinngitsunik tuniniagaqarpoq: qipisat assammik mersukkat, nissiaqqat, qilertat juullimullu pinnersaatit - tamarmik assigineqanngitsut assammik mersorneqarlutillu nunaqavissunit sanaat.

– Suut tamarmik Kalaallit Nunaanni assammik sanaajussasut isumassarsivunga. Sanaluttartut nunaqavissut suleqatigisarpakka, taakkulu aamma eqqumiitsuliaminnik pisiniarfinni tuniniaasarput. Assassukkat sumik sananeqarsimanersut ilisimassallugu uannut pingaaruteqarpoq, tassami pisisartunnut oqaluttuarisarpakka, taakkualu Kalaallit Nunaat pillugu oqaluttuarsiarisarpaat, oqarpoq takornariallu nunaqavissut eqqumiitsuliaannik angerlaassiumanerusut ilanngullugu oqaluttuarpoq.

Pinnersaatit Kujataaneersut

Arnap assassortartup aappaa tassaavoq Kunngu Sørensen, taassumalu nuannarisaminik inuussutissarsiuteqarnerup, pinnersaatinillu eqqumiitsuliornerup niuernermik ineriartortitsinera aamma misigisimavaa. Taanna ujaqqanik nunatsinneersunik pinnersaasianik, soorlu safirinik, kryolitinik tugtupitinillu, Nuummi Narsarsuarmilu nammineq sannavimmini kigartukkaminik, sanasarpoq.

– Pinnersaatikka siorna tuniniartalerpakka kingusinnerusukkullu aamma aallarnisaasunit pinnersaatinik pisisalerlunga. Soqutiginnittoqartorujussuuvoq, Kunngu Sørensen oqarpoq, taannalu Narsami Narsarsuarmilu kuultinik saffiortunik eqqumiitsuliortunillu suleqateqarpoq.

Nioqqutissap oqaluttuassartaa pingaaruteqartoq erseqqissarpaa.

– Ujarak pinnersaammiittoq Nuup Kangerluaneernersoq Kujataaniluunniit kigartorneqarsimasoq oqaluttuarisinnaagaanni, tamanna takornariat oqaluttuatut angerlamut nassartarpaat, oqarpoq.

Assassullaqqissut

Nioqqutissat kusanartuuginnarnatik aammali nunaqavissunit sananeqartariaqartut Sascha Steinbacher isumaqarpoq, tassami sanaluttartut tamarmik allanit ilaarneqarsinnaanngitsumik immikkut ilusilersueriaaseqarlutillu isumassarsioriaaseqarput,

- Pisisartuma eqqumiitsuliortut assassullaqqinneri pillugit nersualaartartorujussuuaat, oqarpoq nassuiarlugulu tuttut nassuinik puisillu amiinik sanaanik tuniniaasarluni, maleruagassallu – soorlu CITES-imik uppernarsaatit – nioqqutissat nunamit aninneqarnissaasa ajornannginnissaat qulakkeerniarlugu malittarisassat malinneqarnissaat qulakkeertarlugu.

Aasaanerani ulapaarneq umiarsuarsuillu

Umiarsuit takornariartaatit tulakkaangata ulapaartoqarpoq. Umiarsuarmik Norwegian Starimik ilaasut 2000-it sinnerlugit ullormi ataatsimi tulakkaangata unillatsiarnissarluunniit ajornartarpoq, Taamaakkaluartoq Sascha Steinbacher uinilu qungujulallutik nioqqutissarpassuaateqarlutillu piareersimasarput.

- Ulapinnartaqaaq, aammali nuannertaqaaq. Tamatigut qilanaartarpugut, ullullu arlallit sioqqullugit piareersartarpugut. Kisimiilluni tamarmik angumerineqarsinnaanngimmata ilaquttaniit ikiorneqartarneq iluaqutaasaqaaq.

- Umiarsuit ilaat, soorlu Norwegian Star, uivertutut ittunik pisiniartoqarfiusarput, Kunngu Sørensen oqaluttuarpoq allallu - ingammik tyskit takornariat - mianersornerusut eqqarsarluaqqaarlutillu pisisartut, Amerikamiulli qallunaallu takornariat pisiumanerpaat ilagigaat, nassuiarpaa.

Aallarnisaasut tapersersorneqarnissartik inissaqarnissartillu pisariaqartikkaat

Nuummi eqqumiitsuliortut aallarnisaasullu pitsaanerusumik tapersersorneqartariaqartut arnat taakku marluk isumaqataapput.

- Umiarsualivimmi takornarianut sullissiveqartoq ilisimaneqarpianngilaq, Kunngu Sørensen nassuiaavoq.

- Pisiniarfeqarnissaq suli ajornarpoq, assassortartorpassuillu utaqqiisaasumik pisiniarfeqartariaqarlutilluunniit nittartakkatigut tuniniaasariaqartarput, taanna oqarpoq.

- Tuniniaaffigisinnaasatsinnik nutaaliortunut najugaqartunulluunniit ornittagaqartariaqaraluarpugut. Nunatsinni piginnaanilippassuaqarpoq, taakkulu siammarteriffissaqartariaqarput, Kunngu Sørensen oqarpoq.

Isumalluarpulli. Siorna tunisinerat ilimagisamit annertuneruvoq, marluullutillu siunissaq isumalluarfigaat — tunisassianik amerlanerusunik tuniniagaqarlutik, suleqateqarlutik immaqalu ullut ilaanni namminneq pisiniarfittaarsinnaallutik.

Eqqumiitsuliorneq, ataatsimoorneq oqaluttuallu

Sascha Steinbacherip Kunngu Sørensenillu ilusilersuisinnaanertik kisiat pinnagu, aammali pinnersaatinik ilusilersuisartunik imaluunniit sanaluttartunik suleqatigisaminnik pisiniarfigisatakkaminnillu tapersersuinertik ataatsimoorutigaat.

Kunngu Sørensenip eqqumiitsuliortut innarluutillit suleqatigai, inuusuttumiillu ADHD-limmit imilersarissanik qalipakkat pisiarisimagamigit taakku atorlugit postkortinik takornariat pisiarisinnaasaannik angerlaassisinnaasunillu naqitertitsivoq.

– Ikittunnguuvugut ikioqatigiittarlutalu. Postkortit affaat Nanortalimmiittumut, imilersarissanik qalipaasumut, tunniuppakka, Kunngu Sørensen naggasiivoq.