Nunatta
oqaluttuarisaanerani nutaanerusumi inuit ilarpassui nalaatsornerinnakkut Nunatsinnut
tikittarsimapput sivikitsuinnarmik maaniinnissartik naatsorsuutigalugu —
inuunermilli annersaani Nunatsinni sulisarlutik.
Nuna
Advokaterini eqqartuussissuserisoq piginneqataasorlu Peter Schriver tamatumunnga
assersuutissaalluarpoq.
Nunatta
oqaluttuarisaanerani nutaanerusumi inuit ilarpassui nalaatsornerinnakkut Nunatsinnut
tikittarsimapput sivikitsuinnarmik maaniinnissartik naatsorsuutigalugu —
inuunermilli annersaani Nunatsinni sulisarlutik.
Nuna
Advokaterini eqqartuussissuserisoq piginneqataasorlu Peter Schriver tamatumunnga
assersuutissaalluarpoq.
Nunatsinnut tikinneranit januaarip arfernanni ukiut
25-t qaangiutissapput, taamanimiilli Nunatsinni inuussutissarsiornermut pingaaruteqartumik
inissisimavoq – ingerlalluarnerani aamma ingerlanerliortoqarnerani.
Tassami eqqartuussissuserisoq
69-inik ukiulik akiliisinnaajunnaarnernut tunngasunik qulaajaanissamut sulianik
immikkut ilisimasaqarpoq, ajornartorsiuteqartoqaleraangat aaqqiissutissarsiortarluni.
Peter Schriverip akiliisinnaajunnaarnermut akiliisinnaajunnaarnermilu inatsisinut
tunngasut immikkut ilisimasaqarfigilerpai Københavnimi Dania Advokater-imi 1990-ikkunni
eqqartuussissuserisuutilluni piginneqataatillunilu. Suliffeqarfik Nuummi taamanikkut
allaffeqarfeqarpoq – tamatumalu kingunerisaanik Peter Schriver 2000-imi Nuummut
aallartinneqarpoq.
- Nuummi
allaffitsinni ilungersunartorsiortoqarami, Peter Schriver oqaluttuarpoq.
- Paasiniagassara
tassaalerami allaffipput matuinnartariaqassaneripput imaluunniit
iliuuseqarfigisinnaaneripput. Arlaleriarlunga Nuummiittarninni paasivara,
iliuuseqarfiginissaanut tunngavissaqartoq — sulisuvut pikkorissut eqqartuussissuserivimmik
ingerlatsinissaminnut inatsisilerinermik ilisimasalimmik aqutsisussaminnik
pisariaqartitsipput.
Suliassaqarluartoq
- Suliassat
amerlaqaat – unammillertivullu annerusumik tassaallutik qallunaat
eqqartuussissuserinermik ingerlatsivii soqarfii, suliassanik pitsaasunik
tamanik tigooraasut. Tamanna iliuuseqarfigisinnaallugulu
iliuuseqarfigisariaqarparput, Peter Schriver oqarpoq.
-
Allaffimmi pisortamik naleqquttumik nassaarnissatta tungaanut allaffimmi
aqutsisuugallarpunga, taamaattorli ingerlaqqikkama maannalu Nuna Advokaterini
ukiunik 25-nngortorsiorlunga akunnaalliliillunga.
Akiliisinnaajunnaarnernik
suliassanik immikkut ilisimasaliulluni suliassarpassuaqarpoq. Taamanikkut
aalisarneq ullutsinnisut ingerlalluartarlunilu ingerlanerliortarpoq – Peter
Schriverillu ilaatigut suliaralugit Qatanngutigiit Lyberthikkut Maniitsumeersut,
saattuarniarnermik tunisassiorfiit (5-6-iusut, 19-inik saattuarniutinik angallatillit
aamma Nanortalimmi saattuanik tunisassiorfik), Qaqortumi Aasiannilu amutsiviit,
kuultisiorfik aamma rubinisiorfik kiisalu sanaartornermik ingerlatsiviit soorlu
Viking Byg Upernavik Aps aamma S&G (Tasiilaq) pillugit suliaqarluni.
Suliaq Puisimut
tunngasoq
Suliat
tusaamaneqarnersarigunarpaat suliaq Puisimut tunngasoq. Namminersornerullutik
Oqartussat puisimit pølsilianik allanillu Kinamut tuniniaanissamik pilersaarut
isumalluarfigisorujussuugaluarpaat. Puisilli suleqataa, Kinami
tunisassiornermik tuniniaanermillu akisussaasussaq peqquserluttuusoq paasineqarmat,
pilersaarutit tamarmik piviusunngunngitsoorput. Tamakku tamarmik
piviusunngunngitsoornerisa kingunerannik suliaq Namminersornerullutik
Oqartussanut annaasaqaataangaatsiarpoq.
Pisoq alla
pingaarutilik Tasiilami pivoq, tassa Bygge-Hans, illoqarfimmi tassani matadorimik
taaneqartartoq, 2005-imi tassanngaannartumik toqummat. Suliffeqarfiup
aallaqqaammut annaanniarneqarnera iluatsinneqarpoq, kingusinnerusukkulli
akiliisinnaajunnaarluni.
- Pigisanik
suliarinnikkiartorlunga Tasiilaliarpunga - ingerlaannarlu paasivara
illoqarfimmiut tamarmik suliffeqarfik taanna pisariaqartikkaat. Illoqarfimmi
pisartut tamarmik Bygge-Hansip suliffeqarfiutaanit ingerlanneqarput.
Illuliortarlunilu illunik aserfallatsaaliuisarpoq, aqquserngit suliffeqarfiillu
suliarisarlugit, biilit maskiinallu iluarsaattarlugit, qulimiguulimmik
assartuisarluni, inunnik toqusunik ilisisarluni umiarsuarlu siulleq/kingulleq
tikikkaangat/aallaleraangat qummoroortartitsisarluni, Peter Schriver
oqaluttuarpoq.
-
Tasiilamut pigama suliffeqarfik tamaat uannut tunniunneqarpoq. Ullormi
siullermi ilisisoqarnissaanut tunngasoq isummerfigisariaqarpara – umiarsuullu
kingulliup aallarnissaanut atatillugu qummoroortartunik
pissarsiniartariaqarlunga.
Nannut akornanni qasujaallisarluni arpanneq
- Suut tamangajaasa
misilittarpakka. Piffissap ilaani Kulusummi ulluni arfinilinni sapernuvugut.
Ulluni siullerni piffissat neriffissat akunnerini asimi arpattarpunga, taavali uumassusilerisut
arlallit tikiukkamik oqaatigaat tamaani nannut 73-iusut kisissimallugit.
Taamaalillunga asimi arpattarnera unitsippara!
Kalaallit
Nunaanni eqqartuussissuserisutut sulinissaq soqutiginartuusoq ineriartornartuusorlu
Peter Schriver isumaqarpoq.
- Sullitatsinnut
qanittuararsuugajuppugut, aalajangiinernullu akuusarluta “inatsisinik misissueqqissaarnissat“ piinnarnagit.
Aammattaaq
Nunatsinni inuiaqatigiit ineriartorfiulluarput soqutiginartorpassuarnillu suliassarpassuaqarluni.
Ingammik aatsitassarsiornermik ingerlatsisut Peter Schriverip
soqutigisarilluinnarpai.
- 2000-ip
kingornagut aatsitassarsiornerup iluani annertuumik ineriartortoqartoq maluginiarparput.
Nalunami kuultisiorfik ammarneqarpoq matuneqariarlunilu maanna aallarteqqilerluni.
Saffiugassanik aamma uuliamik gassimillu ujaasineq ingerlanneqarluni –
ineriartorneq tamanna peqataaffigilluinnarsimavarput, tamannalu nunat tamalaat
akornanni isiginnittaaseqalernitsinnut aallaaviulluni, tamannalu Nuna
Advokaterinut suli ilisarnaataalluni.
Ineriartupiloorneq
Inuiaqatigiit
ineriartornerisa nunanullu tamalaanut malinnaatinneqarnerisa kingunerinik,
sulisutta amerlassusiisigut piginnaasatsigullu aamma ineriartortitsivugut.
Maanga tikikkama eqqartuussissuserisut marluupput, fuldmægtigi ataasiulluni
aamma eqqartuussissuserisut allattaat pingasuullutik, ataaseq kisimi pinnani
tamarmik qallunaajusut - Nuna Advokater ullutsinni suliffeqarfiuvoq 18-inik
sulisoqartoq – taakkunannga eqqartuussissuserisut arfineq-pingasuullutik,
tallimanik ilinniakkaminnik naammassisoqartussaalluni aamma eqqartuussissuserisunut
allatsit tallimaallutik – sulisunit arfinillit qallunaajupput aqqaneq-marlullu
nunaqavissuullutik – taamaattumik ineriartortoqarsimaqaaq.
Ineriartorneq
taama ingerlaannassasoq, Peter Schriver isumaqarpoq.
- Nuummi
mittarfissap nutaap kingunerissavaa kalaallit inuiaqatigiit
inuussutissarsiortullu nunanit tamalaanit soqutigineqarnerulissapput. Nunanit
allanit soqutiginninneq malugineqareersimavoq – mittarfilli aamma kalaallit
inuussutissarsiortut ineriartornissaannut periarfissanik nutaanik
pilersitsissaaq.
- Nuummi
mittarfiup nutaap kinguneranik kalaallit inuiaqatigiit inuussutissarsiortullu
nunanut tamalaanut attaveqarnerulissapput. Nunanit allanit soqutiginninneq
malugineqareersimavoq – mittarfilli aamma kalaallit inuussutissarsiortut
ineriartornissaannut periarfissanik nutaanik pilersitsissalluni.
Peter
Schriverip Nunarput nuannaraa.
- Kalaallit
Nunaat tupinnanngitsumik nuannarilluinnarpara. Inuit tikilluaqqusiuaannartut – peqatigalugillu
nuannarilersimasakka nunalu silagitsillugu nunarsuarmi alianaannerpaasarpoq.
Aamma
ikinnguterpassuaqalerpoq, ingammik arpattartut akornanni.
- Arpanneq
nuannareqaara, uummatimalu tillerneq tamanna nuannaraa – soorlumi aamma Kalaallit
Nunaannut tillertuusoq.
- Naape-mi
nuannersumik arpaqataalluartarpunga, ilaatigut Nuummit – Kapisilinnut sisamariarlunga
arpaqataasimallunga, soorlumi aamma Kangnu, Nuummi marathonip affaa, Leifip Iluanaarajuup
Marathonia allarpassuillu peqataaffigisimavakka.
Peter
Schriverip Kalaallit Nunaanni sulisimanermini ukiunik 25-nngortorsiornera, Nuna
Advokatip ukiumoortumik ukiortaami sassaallertarneranut atatillugu januaarip
qulinganni nalliussineqassaaq. Ukiortaarsiorluni ilassinnittarneq 80-ikkunnili
ukiut tamaasa aaqqissuunneqartarpoq.
