– Arssarnerit pisiarineqarusulluarput

Suliffeqarfik Nunatsinni innaallagissamik ikkussuisartut annersaat Arssarnerit ukioq manna nutaamik piginnittoqalissaaq. Piginnittup qallunaat sanaartornermik suliakkerneqartartut suliffeqarfissuata MT Højgaard Holdingip tamanna kissaatigaa.

Suliffeqarfissuup suliffeqarfik Nunatsinni innaallagissamik ikkussuisartoq, siorna akileraarutit ilanngaatigereerlugit 82 millionit koruuninik amigartooruteqartoq tuninialerpaa.

- Arssarnerit pisiarinissaannut soqutiginnittunit saaffiginnittoqarluartoq maluginiarparput. Oqaloqatigiinnerit aallartinneqareerput. Arssarnerit pillugit kikkut oqaloqatiginerivut erseqqissumik oqaatigisinnaanngilara, børsenimi nalunaarsorneqarsimasumi MT Højgaard Holdingimi aningaasaqarnermut pisortaq Rasmus Untidt Sermitsiamut oqarpoq.

Arssarnerit teknikikkut ilisimasanillu ingerlatsiviuvoq nersornaaserneqartarsimasoq, aningaasaqarnikkullu ajornartorsiuteqartoq, ingammik 2022-23-mi, ingammik isumaqatigiissutini arlalinni annaasaqangaatsiarsimanini pissutigalugu.

Danmarkimi sanaartornermik ingerlatsisut annersaasa tulliat, MT Højgaard Holding, siorna oktobarimi aalajangerpoq nunani tamalaani MT Højgaard Internationalimik ingerlatsinini, ilaatigut tassaasut Arssarnerit aamma MT Højgaard Grønland, tuniumallugit.

Nunani tamalaani suliffeqarfiit Kalaallit Nunaanni, Savalimmiuni, Maldivernemi Portugalimilu ingerlataqartut, 2023-mi 557 millionit koruuninik kaaviiaartitaqarput akileraarutillu ilanngaatigereerlugit 238 millionit koruuninik amigartooruteqarlutik. MT Højgaard Holdingip naatsorsuutaani tamanna takuneqarsinnaavoq.

- MT Højgaard aamma Arssarnerit malunnaateqarluartumik amigartooruteqarput, aap, katillugit millioninik pingasunik kisitsisitalinnik amigartooruteqaramik. Kalaallit Nunaanni niuernikkut ingerlatatsinni aningaasanik annaasaqarpugut, ingammik ukiuni kingullerni pingasuni. Taamaattumik ingerlatavut unitsinniarlugit aalajangerpugut, Rasmus Untidt oqarpoq.

Nunani tamalaani niuerneq sanaartornermik suliffeqarfissuup isertitaqarnissamik piumasaqaataanut naapertuutinngitsoq nassuiaatigaa.

- Danmarkimi niuerneq pingaarnerpaatikkutsigu isertitaqarnerusinnaavugut. Danmark qitiusumik ingerlatsivigaarput, aningaasaqarnermut pisortaq oqarpoq.

Siorna qaammatini qulingiluani siullerni MT Højgaardip nunani tamalaani ingerlataa, MT Højgaard Grønlandip aamma Arssarnerit peqataaffigisaat, ingerlatsinermigut amigartooruteqarpoq. Eqqortumik oqaatigalugu 185 millionit koruuninik.

2023-mi amigartoorutit pingaartumik Kalaallit Nunaanni suliniutit pingasut, tassa Nuummi mittarfiliornermut aamma aallartarfimmik tikittarfimmillu sanaartukkanullu allanut marlunnut mittarfissuartaassamut atatillugu sanaartorneqartut kiisalu Nuummi Qaqortumilu kollegialiornermut tunngasut amigartooruteqarnermut pissutaapput.

MT Højgaardip Danmarkip avataani ingerlataminik tuniniaanissaminik aalajangernermi kingorna nunani tamalaani ingerlatani tunisimavai imaluunniit taamaatissimallugit, Arssarnerit MT Højgaardilu kisiisa pinnagit.

Arssarnerit Nunatsinni innaallagissamut tunngasunik aaqqiissutissanik pilersuisartutut siuttutut toqqarneqarumanerpaasussatullu takorluugaqarpoq, namminersortut, inuussutissarsiortut pisortallu suliffeqarfiutaat sanaartornermik suliakkiinermik kiffartuussinermillu suliakkiisarnerini.

MT Højgaard Holdingip aningaasaqarnermut pisortaa Rasmus Untidt nassuiaavoq, Arssarnerit tuniniarneqalersinnaanngortinniarlugit piareersaallutik.

- Piginnittunut nutaanut Arssarnerit ingerlataannik ingerlatitseqqissinnaasunut ineriartortitsisinnaasunullu tunerusupparput, oqarpoq.

Ingerlatseqatigiiffik naammaginartunik suliassaateqartoq, ukiuni tulliuttuni suliarineqartariaqartunik ilisimatitsissutigaa.

- Suliffeqarfiup ukiut tulliuttut ingerlaneranni naammassineqartussanik amerlasuunik suliassaqarnissaa isumagereerparput, taamaalilluta suliffeqarfik pitsaanerpaamik akilersillugu tunisinnaaniassagatsigu.

- - Arssarnerit ukiuni tulliuttuni ingerlatseqatigiiffiup siornatigut angusarisimasaatut angusarissaarnissaa naatsorsuutigaarput, Rasmus Untidt oqarpoq.