kajumissaarut
Assit takukkit: Aajuna mittarfitsialattut toqqarneqartoq
Uummannap eqqaani Qaarsuni mittarfik, Mittarfeqarfiit mittarfinni ingerlataani 13-init, ukiup mittarfitsialaatut toqqarneqarpoq
Mittarfeqarfiit mittarfinnit 13-init ingerlataanit ukiup mittarfitsialaatut pingasunngormat toqqaasoqarpoq mittarfiit pisortaasa tamarmik najuuffigisaanni.
Ukioq manna mittarfitsialattut toqqarneqarpoq Qaarsuni mittarfik, taamatullu toqqaanermut aningaasaqarnikkut aqutsilluarneq, mittarfimmik ineriartortitsineq sumiiffimmillu aallaaveqarneq toqqaanermut aallaaviuvoq.
Taama Mittarfeqarfiit tusagassiuutinut nalunaaruteqarput.
Mittarfeqarfiit nalunaarutaat naapertorlugu Qaarsuni mittarfik nunaqarfimmiunit tapersersorluarneqarnermigut, sulisummi tamangajammik nunaqarfimmeermata, angusilluarsimavoq.
- Nunaqarfimmiunik sulisoqarluarnerup aallaavigaa mittarfiup pisortaata siunissaq ungasinnerusoq isigalugu sulisussaqarniarnikkut pilersaarusiorsimanera, Mittarfeqarfeqarfiit taama allapput.
Atuaruk: Mittarfitsialak toqqarneqartoq
Taamaammat mittarfitsialattut toqqarneqarpoq
Qaarsuni mittarfiup pisortaata Ib Larsenip 2014-mi mittarfitsialattut toqqarneqarnerminnut uppernarsaat Mittarfeqarfiit pisortaanerannit Jens Lauridsenimit pingasunngornermi tiguaa.
Jens Lauridsenip aamma toqqaanermi pingaartinneqartutut taavaa Qaarsuni mittarfimmi aningaasaqarnikkut aqutsilluartoqarsimanera.
- Ib Larsenip suliassaminik suleqatiminut agguaasinnaasarsimavoq sulisunullu akuutitsilluni, taamaalilluni mittarfiup sutigut tamatigut ineriartortinneqarneranik kinguneqartumik. Tamannalu siunissaq ungasinnerusoq isigalugu iliuuseqarneruvoq, ilaatigut Qaarsut mittarfiata nunatsinni mittarfinni ingerlalluarnerpaanut ilanngutsinneqarneranik kinguneqartoq, Jens Lauridsen oqarpoq.
Mittarfitsialattut toqqarneqarnermi pokaali ingerlaartoq tunniunneqarpoq, ukiut tamaasa mittarfimmut ukiup siuliani immikkut maluginiarneqartumut tunniunneqartartoq.
Aasiaat aamma Qaanaap mittarfii 2014-imi mittarfitsialattut toqqarneqartussatut aamma piukkunneqarsimagaluarput.
Paamiuni mittarfik 2013-imi mittarfitsialattut toqqarneqarpoq.
Assit allaaserisap ataani takukkit