Ataatsimiititaliami amerlanerussuteqartut uranimut inatsit taasissutigeqqugaat
Inuussutissarsiornermut Aatsitassanullu Ataatsimiititaliami amerlanerussuteqartut uranimik piiaanissamut inerteqqummi paragraffi to akerleriissutaasoq peerneqassasoq piumasaraat, aamma innuttaasut inatsisissatut siunnersuut pillugu taasiteqqaarlugit inatsit atuutsinneqalissasoq piumasaraat.
Naalakkersuisut inatsisissatut siunnersuutaat, uranimik piiaasoqarnissamik misissuisoqarnissamillu inerteqquteqartussaq Inatsisartuni aporaaffioriaannaavoq.
Inatsisissatut siunnersuut akerleriissutigineqaqaaq, maannalu Inuussutissarsiornermut Aatsitassanullu Ataatsimiititaliami amerlanerussuteqartut, tassalu Atassut Siumullu siunnersuutip pingajussaanik suliarineqannginnerani allannguutissatut marlunnik siunnersuuteqarput.
Allannguutissatut siunnersuutigineqartut marluk naatsumik imatut saqqummiunneqarput:
- Uranimut inerteqquteqarnissaq pillugu inatsisissatut siunnersuut siusinnerpaamik atuutsilerneqarsinnaavoq, najoqqutaasiviusumik innuttaasunik taasititsisoqareernerata kingorna sapaatip akunnerisa sisamat qaangiunneranni.
- Paragraf to inatsisissatut siunnersuummit peerneqassaaq. Paragraffip Naalakkersuisut aatsitassanik radiop qinngorneranik akulinnik misissuisoqarnissaanik piiaasoqarnissanilluunniit inerteqquteqarnissaannut piginnaatippai.
Inuit Ataqatigiit ataatsimiititaliami ikinnerussuteqarput, partiimilli allannguutissatut siunnersuutigineqartut marluk itigartitsissutigineqarnissaat inassutigineqarpoq aamma inatsisissatut siunnersuut taamatut isikkoqartillugu akuerineqassasoq inassutigineqarpoq.
Innuttaasut tusarfigerusunneqartut
Paasissutissat Inuussutissarsiornermut Aatsitassanullu Ataatsimiititaliap isumaliutissiissutaani, arfinginngornermi Inatsisartut nittartagaatigut tamanut saqqummiunneqartumi atuarneqarsinnaapput.
Atassummi siulittaasup Aqqalu Jerimiassenip siunnersuutip sapaatip akunnerani matumani aappassaanik suliarineqarnerani innuttaasut taasitinneqarnissaat piumasaraa. Aqqalu Jerimiassen allannguutissatut siunnersuuteqartuuvoq, maannalu ataatsimiititaliami Siumut sinnerlugit ilaasortaasunit taperserneqarluni.
Siunnersuummut nassuiaatini allassimavoq, inatsisip atuutsinneqalinnginnerani innuttaasut taasitinneqarnerisigut qulakkeerneqassasoq innuttaasut tusarneqarnissaat. Taasititsineq to millioner koruunit missaannik akeqassasoq missingerneqarsimavoq.
Amerlanerussuteqartut: Paragraffi akerleriissutaasoq peerneqassaaq
Paragraf to peerneqarnissaanik allannguutissatut siunnersuut Siumumit Atassummiillu saqqummiunneqarpoq. Paragraffi oqallisaalersimavoq, Naalakkersuisut uraniinnaanngitsumik aatsitassanilli radio qinngornerinik akulinnik allanik inerteqquteqartissinnaammagit.
Isornartorsiuisut isumaqarput, Naalakkersuisut aatsitassanik amerlanerusunik misissuisoqarnissaanut piiaasoqarnissaanullu Inatsisartut avaqqullugit inerteqquteqarnerisigut aatsitassarsiortut qularnerulersinneqassasut.
Naalakkersuisulli akerlianik kissaatigaat, radiop qinngornerinik akulinnik suliniuteqarneq unitsinneqarsinnaassasoq.
Inatsisissatut siunnersuut marlunngornermi pingajussaanik Inatsisartuni suliarineqalerpat sakkortuumik oqallittoqaqqinnissaa ilimanarluinnarpoq. Tassani IA Nalerarlu Inatsisartuni 16-inik ilaasortaatitaqartut inerteqquteqarnissaq akuerissaneraat imaluunniit partiit taakku marluk allannguutissatut siunnersuuteqassanersut paasinarsiumaarpoq.