Aalisarneq
Atassut: Savalimmiut nunatsinnut Islandimullu sumiginnaavoq
EU-p avaleraasartuunik aalisarnissamut isumaqatigiissuteqarnera pillugu Atassutip Naalakkersuisut iliuuseqaqquaat
- Ajuusaarutigeqisatsinnik aammalu uissuummissutigisatsinnik Atassummit paasivarput Savalimmiut, Norge aamma EU avaleraasartoorniarneq pillugu 2014-miit 2018-ip tungaanut atuuttussamik isumaqatigiissuteqarsimasut.
Atassutip siulittaasua Gerhardt Petersen Atassutillu Inatsisartut gruppianni siulittaasoq Knud Kristiansen ataatsimut tusagassiutinut nalunaaruteqarput.
Kalaallit Nunaanni Sulisitsisut Kattuffiata GA, KNAPK Inuit Ataqatigiillu EU-p avaleraasartuunik aalisarnissamut isumaqatigiissutaa isornartorsiorpaat, tassani Island nunarpullu avaleraasartuunik aalisarnissamut peqataatinneqanngimmata kiisalu Savalimmiormiut annertuumik pisassinneqarlutik.
- Atassummit pingaartumik pakatsivugut Savalimmiut isumaqatigiissummut taamaattumut nammineq imminut iluaqutissinnissani piinnarlugu peqataammat! Isumaqarpugut Savalimmiut sakkortuumik avaqqutaarniagassaanngitsumillu naalakkersuinikkut avoqqaarineqartariaqartoq.
Nangippullu:
- Eqqaasitsissutigiinnassavarput 2013-mi ukiakkut Savalimmiormiut imminnut ammassassuarnik pisassissimanerat pissutigalugu EU-p Savalimmiut mattummagu nunatta Savalimmiut tapersingaarnikuummagu, massakkullu Savalimmiormiut qanoq namminissarsiortiginertik nunatsinnillu aammalumi Island-imik suleqatiginninnertik qanoq sumiginnartigisinnaanerlugu uppernarsarpaat, tamannalu ajorluinnarpoq.
- Savalimmiormiut Nunat Avannarliit Killiit suleqatigiinneranni annertuumik peqataasoq Kalaallit Nunatta, Savalimmiut aamma Island-ip pisuussutaasa illersorneqarnissaat pillugu isumaqatigiissutini puiguinnarlugit alloriarnera imaannaanngitsuuvoq, suleqatigisatullu ilumut tatiginartuunersoq apeqquserneqarujussuartariaqarpoq, Gerhardt Petersen Knud Kristiansenilu Atassut sinnerlugu oqarput.