Atisaliat akuutissartaqanngitsut
Silap pissusaanut eqqummaarinninneq, peqqissuseq akisussaaqataanerlu inuusuttorpassuarni atugaalersimavoq, tamannalu Nuummi atornikuerniarfimmi Pikuminimi pingaartinneqarpoq.
Atuisartut ingammik arnat inuusuttut ukiuni kingullerni atisanik tunisassiorneq silap pissusaanut ajoqutaanerpaajusutut isigilersimavaat. Atisanik tunisassiortuinnaat nunarsuarmi CO2-mik aniatitsinerup 10 procentia pilersitaraat, qarliillu koorbut tunisassiariniaraanni imeq 10.000 literi atorneqartariaqarluni tujuuluaqqamillu tunisassiornermi imeq 3.000 literi. Taamaattumik atueriaatsitta allanngulaarneriluunniit sunniuteqartarput.
Atuisartuni silap pissusaanut eqqummaarinnerulernerup kinguneraa atoqqiineq immikkuullarillunillu ujaasineq mutiunerujartortoq. Taamaattumik Nivé Lynge Biilmann nammineq iliuuseqarniarluni aalajangerpoq, 2021-milu decembarimi niuertarfini Pikumini ammarlugu, tassani meeqqanut inersimasunullu atisat atoqqitat tuniniarlugit. Atoqqiinerup pingaarlunilu pitsaassusaa amerlanernit eqqumaffigineqalernissaa kissaatigaa, naak inuppassuit taamaalereersimagaluartut.
ARNANUT nr. 77-imi atornikunik pisinermi iluaqutaaneranik soorlu peqqinnarnerullunilu avatangiisinut iluaqutaanera pillugu Nivé Lynge Biilmannip isumaa atuaruk.