Atuakkat: Nunatsinni nunalerinerup aallarteqqaarera pillugu atuakkat arlallit saqqummingajalersut
Atuakkiortoq Cecilie Vahl, Qassiarsummi inunngortoq peroriartortorlu, piariilerpoq atuakkiaminik arlalinngorlugu avitamik saqqummersitsinissaminut, atuakani pineqarpoq nunatsinni nunalerinermik inuussutissarsiuteqarnerup aallartisarnera. Maanna naqiterivik utaqqisaaginnarpoq atuakkap siulliup saqqummernissaanut.
Qilaap nunallu akornanniittoqarpoq, arlaatigullu oqariartuummik piffissami atuuttumi nunami inooqataanngitsunit apuussisoqaraangat ammasumik asissuinertaqanngitsumillu akuerigaanni, tamanna aallarniutaasinnaavoq annertuumik isumaqarluartumillu aallussilernermut.
Taamak isumaqarpoq atuakkiortoq Cecilie Vahl. Tassami taanna nangittussiamik atuakkiorluni aallartinnikuuvoq anersaanik attaviginnissinnaanermut tunngassuteqartunik pikkorissareernermi kingorna. Tassami atuakkiortup nammineq oqaluttuaa naapertorlugu taassuma ittua, Otto Frederiksen, pikkorissaasortik anersaanik attaviginnissinnaasoq aqqutigalugu oqaassisimavoq ernuttani suliassaqartoq pingaarutilimmik:
- Aallaqqaammut paatsuungavunga oqaluttuunneqarama inummik annertuumik pissaanilimmik akunnitsinniittoqartoq, taannalu uannut apuussassaqartoq. "Aatanuna" oqaluttuunneqarpunga, oqaatigisaali naapertorlugit paasinarsivoq ittora pineqartoq, taannalu uannut oqaasissaqartoq, anersaanillu attaviginnissinnaasup pissutit ilisimasaqarfiginngilluinnakkani oqaluttuarilerpai aammalu arlaannaatigulluunniit sumiluunniillu atuarsinnaanngisani pillugit saqqummiussivoq, Cecilie Vahl oqaluttuarpoq nangillunilu:
- Assorsuaq misigissutsikkut attortippunga allaallu apeqqutiginngitsoorpara suliassara taanna pingaarutilik suunersoq. Kingusinnerusukkulli nammineerlunga paasivara unnuami sininnaveerninni erseqqissorujussuarmik isumassarsitinneqarama nunalerinerup nunatsinni aallartinnera pillugu atuakkiussasunga, Cecilie Vahl Sermitsiaq.AG-mut oqaluttuarpoq.
Tassa taamaalilluni Cecilie aallartippoq nunatsinni nunalerinermik inuussutissarsiuteqarnerup nangittussiatut atuakkiarinissaanut.
Ilisimasanik paasissutissanillu annertuumik katersisimavoq
Anersaakkut misigisamiit suliassap pingaarutillip taassuma aallartinneqarneranut atatillugu, Cecilie Vahl nunatsinni nunalerinerup aallartinnera pillugu paasissutissanik piviusunik tunngavilinnik aammalu ilisimannittut oqaluttuaannik katersinermigut annertuumik suliaqarpoq.
- Ukiut arlallit paasissutissanik katersinermut atorpakka, piffissami ittuma nalaani pisarsimasut pillugit taamaalillunga annertuumik ilisimasama qaavatigut ilisimasaqalerlunga, tamatumalu saniatigut iluanaarlunga inuit ilisimannittut taamanilu inuunermik angumersisimasut oqaluttuartittarnerisigut paasissutissanik annertuunik aamma katersivigaakka.
Cecilie Vahl atuakkiorluni aallarteqqaarami avataaniit isiginnittutut paasissutissat katersukkani tunngavigalugit ilusilikkamik atuakkiorluni aallarteqqaarsimagaluarpoq, allaqqaagaalu paniisa ilaannit atuarneqarlunilu nalilerneqarsimalluni.
Paniata anaanani kaammattorpaa atuakkiami piviusulersaarutaasumi inuit ilanngunneqartut uumassusinitsillugit atuakkiani ilusileqqullugu, siunnersuullu taanna Cecilie Vahl-ip malippaa, naak aallaqqaammut nalornissuteqartarsimagaluarluni, taamaattorli maana nangittussiatut atuakkiaralugu naammasivaa, maannalu atuakkap siulliup naqiterivimmit naammassineqarnissaa utaqqisaaginnaleqqavoq.
Cecilie Vahl-ip siunnerfigisimagaluarpaa atuagaq ataasiussasoq, taamaattorli paasissutissarpassuit katersorsimasani aammalu pisarsimasunik oqaluttuarpassuit katersani sapinngisamik tamaasa inissaqartikkumallugit atuakkat nangittussianngorlugit saqqummersinneqartussanngorlugit naammassisimavaa, atuagarlu siulleq juullertinnagu saqqummersinneqassappat imaassinnaavoq juullimi orpiup ataaniikkumaartoq.