Atuakkiortup tusaamasap innersuussinera ”Bestiarium Groenlandica”-mik tuniniaaneq qaffassaasoq
Maria Bach Kreutzmann, atuakkanut ”Bestiarium Groenlandica”-mut aamma ”Mytiske Monstre fra Grønland”-imut atuakkiortuusoq ilimaginngisaminik J.K. Rowlingimiit, kalaallit oqaluttuatoqaannik nuannarinnilluartumit, aggustimi malugineqarpoq
– Taamtut pisoqarnissaa ilimaginikuunngisaannarpara. Taannali uumasorujussuarnik oqaluttuatoqqanillu nuannarinnittuuvoq, taamaammat Nuummi najugaqartunga paasigamiuk naapissinnaanersugut aperivoq, Maria Bach Kreutzmann oqaluttuarpoq.
Assiliisoq: Maria Bach Kreutzmann
– Taamtut pisoqarnissaa ilimaginikuunngisaannarpara. Taannali uumasorujussuarnik oqaluttuatoqqanillu nuannarinnittuuvoq, taamaammat Nuummi najugaqartunga paasigamiuk naapissinnaanersugut aperivoq, Maria Bach Kreutzmann oqaluttuarpoq.
J.K. Rowling, Harry Potter pillugu atuakkiaminik 500 millionit sinnerlugit tunisaqarsimasoq, juulimi aggustimilu uini Neil Murray ilagalugu umiarsuaminut nuannaariummut Samsaramut ilaalluni Kalaallit Nunaata kitaata sineriaani angalaarpoq. Aappariit aqqutaani illoqarfiit nunaqarfiillu arlallit Nuullu tikippaat.
Atuagaq malinnaasuminut 14,2 millioniusunut innersuukkaa
Maria Bach Kreutzmann naapertorlugu J.K. Rowling maniguullunilu, ajunngisaarlunilu kalaallit kulturiat oqaluttuaallu pillugit alapernaatsupilussuuvoq. Kalaallit Nunaanny tikinnikuusaani kusanarnerpaallunilu ingasannerpaasoq aamma isumaqarpoq.
J. K. Rowlingip kalaallit oqaluttuatoqaannik paasisaqarumagaanni Maria Bach Kreutzmannip atuakkiaa ”Bestiarium Groenlandica” atuaqqullugu inuit nittartakkatigut naapittarfiatigut X-ikkut innersuuppaa. Tamanna atuakkap nunani tamalaani tunineqarneranut sunniuteqarpoq, saqqummersitsivik Eye of Newt oqaluttuarpoq.
J. K. Rowlingip Maria Bach Kreutzmannimut pulaarnermi saniatigut atuagaq ”Bestiarium Groenlandica” inuit nittartakkakkut naapittarfianni X-imi malinnaasuminut 14,2 millioniusunut pisiareqqullugu innersuuppaa, nunanilu tamalaani tuniniaanermut tamanna qanoq sunniussimanersoq apeqqutaaginnalerpoq. J.K. Rowlingimi nuannarinnitserpassuaqarmat innersuutaa ilaatigut nuannarinnittut nittartagaanni Hogwartsprofessor.com-imi siammarterneqareerpoq.
– Tunisaqarnerulaarnissaq neriuutiginarpoq, Maria Bach Kreutzmann oqarpoq.
Tunisat sisamariaammik qaffattut
Milik Publishing atuakkamik”Bestiarium Groenlandica”-mik Kalaallit Nunaanni Danmarkimilu saqqummersitsisuuvoq, taakkunanilu tunisat amerleriarnerannik malugisaqartoqanngilaq. Saqqummersitsiviulli tuluttut saqqummersitsisinnaanermut piginnaatitaaggiit Canadami Inhabit Mediamut, saqqummersitsivimmik Eye of Newt-imik piginnittuusunut, tuninikuuai. Tassanilu atuakkamik tunisinerit aggustimiit ullumikkumut 454,5 procentimik qaffasismasut, tassa J. K. Rowlingip innersuussinera sioqqullugumiit atuakkat tunineqartut sisamat-tallimariaataannik qaffassimasut, paasinarsivoq.
Soorlu Lene Therkelsenip Milik Publishingimeersoq oqaatigigaa: ”Sunniuteqarsimannguatsiarpoq!”
