Atuartitsinermi video nipaalu akisuallaarput
Atuartut ilinniagaqartullu videonik nipinillu internettimit tigusisinnaanngillat, atuarfiit ilinniagaqarfiillu megabyte-mut taama akiliisartillugit.
2001-p naalerneraniilli Kalaallit Nunaat atuarfinni qarasaasiakkut attaveqarfeqarsimavoq.
Taanna ateqarpoq ATTAT, www.attat.gl, ullumikkullu atuarfeqarfinnut 106-inut attaveqarluni, qarasaasiat 2000-it missaanniittut nettimut attavilerneqarsimallutik. Tamakkua tassaapput meeqqat atuarfii, inuussutissarsiutitigut ilinniagaqarfiit, ilinniarnertuunngorniarfiit qaffasinnerusumillu ilinniagaqartitsiviit.
Inuit attaveqarfimmi tassani katillugit 14.700-t emailikkut adressimik pilersitsisimapput, ilinniagaqartitsiviit 106-it internettimut attaveqarfiattut atortunik.
ATTAT aqqutigalugu atuisartut databaseqarfinnut atuartitsinermut attuumassuteqartunut isersinnaapput.
Akerlianik assersuutigalugu quppernernut porno-leriffinnut kiisalu quppernernut unioqqutitsisumik aningaasanoorfinnut isersinnaanngillat.
Aammattaarli inuusuttut quppernerannut »Arto«-mut matoqqapput aammalu videonik nipinillu tigutsiviusinnaanatik. Tamanna akisuvallaaqimmat, taamatut paasissutissiivoq Ole Frederiksen, Inerisaavimmi IT centerimi pisortaq.
– Artomut, videonut nipinullu aningaasassaqanngilagut, Ole Frederiksen oqarpoq.
Taassuma oqaatigaa ukioq manna attaveqarfimmik atuinissamut 6 millioner koruuninik aningaasaliissuteqartoqarsimasoq. Naatsorsuutigineqarporli atuineq 8,5 millioner koruuninik akeqarumaartoq.
Tassa qaammammut 700.000 koruuninik. Aningaasalli taakkua amerlanerujussuussapput videonut nipinullu ammaasoqartuuppat, Ole Frederiksen naliliivoq.
Sermitsiaq atuaruk...