Atuisut soqutigisaat kikkunnit isumagineqarpat
Atuisut soqutigisaannik isumaginnittussamik atuisut siunnersuisoqatigiivinik amigaateqarpugut, ilinniartitsisut kattuffianni IMAK-imi siulittaasoq Elna Heilmann oqarpoq.
- Atuisut siunnersuisoqatigiiffiannik, siusinnerusukkut atuussimasutut ittumik pisariaqartitsisoqarpoq, tassani iliuuseqarfigineqarsinnaallutik akigitinneqartut niuernermilu atugassarititaasut naapertuutinngitsut, siunnersuisoqatigiimmi atuisut politikikkut isumaat inuussutissarsiortunut Inatsisartunullu erseqqissartassammatigik.
Ilinniartitsisut kattuffianni IMAK-imi siulittaasoq Elna Heilmann taama isumaqartoq, aviisi Sermitsiaq allappoq.
Taassuma ilanngullugu oqaatigaa, atuisut siunnersuisoqatigiivisa qanoq inissisimanerat erseqqissarneqartariaqaraluartoq, taamaanngippat kommunini atuisunut siunnersuisoqatigiinnik pilersitsisoqarpat pitsaanerpaassaaq.
Sermitsiap kattuffiit angisuut SIK, AK, IMAK aamma PSS aperaai, atuisut soqutigisaannik taamalu ilaasortamik soqutigisaannik kikkut isumaginnittussaanersutut isigineraat. IMAK-imi siulittaasup Elna Heilmannip kisimi tamanna akissuteqarfigaa. Taassuma siornatigut atuussimasunik atuisut siunnersuisoqatigiiffeqarnissaat ujartorpaa Elna Heilmannilu ima nangilluni:
- Akit qaffakkiartorneri pillugit akuttunngitsumik akinik misissuisoqartarnissaa aamma amigaataavoq. Misissuinerit oqallinnernut tunngavileeqataasinnaasut, aamma illoqarfiit, nunaqarfiit nunallu immikkoortuini akit assigiinngissutaannik qulaajaasinnaasut, Elna Heilmann tikkuaavoq.
Aviisimi Sermitsiami atuarnerusinnaavutit: