AUL: Sarfaq Ittuup Upernavimmut angallassinera soqutigineqarluartoq
Ilulissaniit Upernaviup tungaanut Sarfaq Ittuk ukiaq manna angalatitsimmat ilaasut katillugit 403-t ilaasimapput.
Arctic Umiaq Linemit Sarfaq Ittuk Ilulissaniit Upernaviup tungaanut misiliummik angalatitsimmat katillugit 403-t ilaasimapput.
Umiarsuaatileqatigiiffik tusagassiorfinnut taama nalunaaruteqarpoq.
Arctic Umiaq Line ilisimatitsivoq Upernaviup tungaanut angalatitsinermi sila pissutigalugu timmisartuussinernik kinguaattoortoqarsimaneranik nalunaaruteqanngitsoq. Tamanna isumaqarpoq umiarsuarmik sinersorlutik ilaasut taama angalanissamik pilersaaruteqartuusimasut.
- Immikkuullarippoq Ilulissap avannaani angalasut 2/3-ai Uummannaq aamma Upernavik aallartiffiginagulu niuffigisimanngikkaat, kisianni tikeraarusullutik kaajallaasut, Arctic Umiaq Line allappoq.
Angallassisarnissamut piareertut
Sarfaq Ittuup Ilulissaniit avannarpasinnerusumik angalatitsineq ukiaq manna misiligarpaa. Arctic Umiaq Linemi pisortaq, Jens-Jakob Sandgreen ilisimatitsivoq angalasut tassaasimasut takornariat, nunatsinneersut sulinermullu atatillugu angalasut.
- Arctic Umiaq Lineup sineriammut isumaa nutarsarsinnaanissaanut periarfissai misilittarpagut. Akunnerpassuit angalareerluni minutsit 15-innaat uninngallatsiarneq, akunnerit arlalinnik taarserlugit misilittaavigaarput. Allannguinerup ilaasutigut ersarissimavoq, kaajallaallutik nunaqqatigut takornariartut suliartortullu, apuuffinni unnuinngikkaluarlutik, kisianni ullortik atorsinnaasimallugu. Sineriammi innuttaasut inuussutissarsiortullu aamma sullissinnaalernerat ersarissimavoq, oqarpoq.
Uummannap Upernaviullu saniatigut avannamut ulluni 14-ini angallassinerni pingasuni Qasigiannguanut 105-it Kangaatsiamut 43-it aamma Nanortalik/Narsarsuarmut 51-it ilaasimapput. Uummannamut Upernavimmullu ulluni 14-ini angallassinerit sivisussusilikkat aappaagu 1. junimiit 19. oktoberimut pilersaarutigineqarput.
- Sivisunerusumik uninnganerit malunnartumik naleqarteeriartitsinnut sunniisimapput, assersuutigalugu innuttaasut umiarsuarmukarlutik pisiniartarsimapput neriniartaffittaanilu nerillutik ataatsimiittarsimaluutik, saniatigullu takornarialerisut takornariat sullittarlugit, umiarsuup uninnganerani. Isumaqartilluarparput qanoq inuuffiusoq uummarillinerusarnersoq najorniarlugit piffissaqarfigileraangatsigit. Sunneeriaat taanna siunissap tunniussinnaasaanut takutitterpasippoq, A-miit B-mukarnissaq sammiinnarnagu, kisianni alfabet tamaat sammillugu, AUL-imi pisortaq Jens-Jakob Sandgreen oqarpoq.