Avalak: Kalaallit Nunaat Danmarkilu imminnut qaninnerulersissigit
Inuusuttut amerlasuut ilinniakkaminnik naammassinnereeraangamik Danmarkimiiginnartarput. Politikkikkut patajaatsumik ingerlatsineq attaveqarnerlu pissutigalugit angerlartartut amerlanerusinnaapput.
Kalaallit Nunaanni inuit najugaqartut ikiliartorput. Arlallit tikkuarpaat pissutaasunut ilaasoq kalaallit inuusuttut Danmarkimi ilinniakkaminnik naammassinnereeraangamik angerlaqqittannginnerat. Innuttaasut ikiliartornerat unitsissagaanni inuusuttut ilinniakkaminnik naammassinnissimasut Kalaallit Nunaannut angerlartariaqassapput.
Hans Peter Mønsted, kalaallit Danmarkimi ilinniartut peqatigiiffianni Avalammi, kalaallit ilinniartut Kalaallit Nunaannut attaveqaannarnissamut suliniuteqarfiusumi, siulittaasuuvoq. Taassuma oqarnera malillugu kalaallit Danmarkimi ilinniartut naammassigaangamik, affaat Danmarkimiiginnartarput . Inuusuttut angerlaqqinnissaannut periarfissat marluk taassuma takusinnaavai. Siulleq tassaavoq Kalaallit Nunaata Danmarkillu akornanni attaveqarluarneruneq.
Angerlaqqinnissamut periarfissat pitsaanerit
- Ilinniakkap naammassineraniit qaammatit 15-it sinnerlugit Danmarkimeeqqaarsimagaanni, taava angerlarnissamut akiliutsittoqarsinnaanngilaq. Angerlanngitsoortarnermut peqqutit ilagaat taanna. Meeraanermi eqqaamasat kisimik attuumassuteqarfigigaanni angerlarnissamut suunngippallaarput, allaavorli sulinermik misilittagaqarfiusimappat allatigulluunniit ilaqutaqarfiuppat angerlarfissaq, Hans Peter Mønsted oqarpoq.
Taanna isumaqarpoq nunatsinni attaveqatigiinneq pitsaanerulerpat angerlartussat aamma amerlanerulissasut. Ilinniartut Danmarkimi Kalaallit Nunaannilu attaveqarfii qaninnerulissapput. Ilinniarnerulli nalaani attaveqarneq aamma pitsaanerusariaqarpoq. Taanna nassuiaavoq Danmarkimi ilinniartunut attaveqartoqarnerusoq, soorlu bachelorinngorniaappata kandidatiuppataluunniit suliffeqartitsillutik imaluunniit ilisimatusarnissamut neqeroortarlutik.
- Ilinniakkaminnik naammassinnittunut suliffeqarfinnik pilerinarsaasoqarsinnaappat, ilinniartullu Kalaallit Nunaanni suliffeqarfinnut attaveqarnerulersinneqarsinnaappata, taava angerlartut aamma amerlanerulissapput, Hans Peter Mønsted oqarpoq.
Naalagaaffeqatigiit qitornai
Politikkikkut patajaannerunngitsumik ingerlasoqarnera, Hans Peter Mønsted naapertorlugu angerlanngitsoortarnermut peqqutinut ilaavoq. Mittarfiit pillugit oqallinneq, tamassumalu kinguneranik politikkikkut aalassassimasoqalernera eqqaavaa.
- Uteqqikkaanni, piffissami sivisuumi najugassatut eqqarsaatigineqartarpoq. Politikkikkut aalajagingassat, siunissamut isumaqangaatsiartut tukanneri, piffissamilu kingullerpaami aalajangerneqartarneri, siunissamut nalornisitsilerput, siulittaasoq oqarpoq.
Namminiilivinnissamik oqallinneq kalaallinik Danmarkimi ilinniartunik aamma eqquivoq. Avissimasut qitornaattulli ilinniartuusut inissisimapput, angajoqqaajusut imminnut kusananngitsumik oqaluuserineranni.
- Ukiuni arlalinni Danmarkimiissimagaanni, taava soorunami aamma qallunaatut pissuseqarnarsisarpoq. Qallunaatut ilinniagaqartarpugut Danmarkimilu attaveqarfeqangaatsiarluta. Danmarkimulli qinngarsorneq takusinnaaleraangatsigu, soorlu tunngaviusumik inatsisissamut isumalioqatigiissitap sulinerani, taava ernumanarsisarpoq angerlarnermi qanoq tikilluaqquneqarnissaq, Hans Peter Mønsted oqarpoq.
Sinaakkutissat eqqortut
Pisariaqartut ilaannik pitsanngorsaanissamut Hans Peter Mønsted isumaqataavoq.
Kalaallit Nunaannut tikittunut meeqqerivinni inissanik naammattunik peqarnissaq eqqaavaa. Ilanngullugulu tikkuarlugu Kalaallit Nunaanni akissarsiat appasinneruneri pissutigalugit angerlanngitsoortoqartartoq.
Iluaqutaanerpaasartorli tassaavoq inuttut attaveqarfiit. Hans Peter Mønsted ilinniakkaminik naammassinnikkuni Uummannamut aallassamaarpoq.
- Uummannami peroriartorpunga nuannersumik, allallu uattulli perornissaat anguniarumavara. Angerlarnissannut tamanna anguniagaraara, naak nuukkuma Danmarkimi ilisarisimalersimasakka tamaasa qimallugit kiserliulertussaassagaluarlunga. Imminut akilersinnaassaaq. Tunniusseqqissinnaaneq. Tassa tamannaavoq inuit angerlaqqinnissaannut pissutaasartoq. Namminersorlutik Oqartussat sumiiffinni ikinngutinik ilioraasinnaanngillat, ikinngutilli sumiiffiinut tikeraarsinnaanerup ajornannginnerulersinnissaanut attaveqatigiinnermik pitsanngorsaasinnaavoq, Hans Peter Mønsted oqarpoq.