Avammut niuerneq: Tunisat amerleriarujussuartut akilli appariartut
Kisitsisit utaqqiisaagallaq naatsorsukkat takutippaat ukiup qaammataani pingasuni siullerni avammut tunisat 27 procentinik amerleriarsimasut. Tunisat amerleriangaatsiarsimapput kiilumullu akit appariarsimallutik.
Annonse
Aalisakkat avammut tunisat nalingi qaffariangaatsiarsimasut Naatsorsueqqissaartarfiup utaqqiisaagallaq kisitsisaataani takuneqarsinnaapput.
Januaarimiit marsi ilanngullugu avammut tunisat nalingi katillugit 1.148 mio. koruuniusimapput.
Ukiup siulianut sanilliullugit 247 mio. koruuninik annertunerupput, annertuseriarnerlu katillugu 27,4 procentiulluni. Ukiut arfinilli ingerlaneranni ukiup aallartinnera aatsaat taama pitsaatigisoq takussutissami ataani takuneqarsinnaapput.
Kisitsisit utaqqiisaagallaq naatsorsuinerummata taamaattumillu paasissutissat tamakkiinerusut pigineqalerpata kingusinnerusukkut iluarsiiffigineqarsinnaasut Naatsorsueqqissaartarfiup naqissuserpaa.
Tunisat amerleriartut - akit annikillisut
Tunisat malunnaatilimmik amerleriangaatsiarsimasut naatsorsuinerit takutippaat.
Assersuutigalugu raajat avammut tunisat 16,3 procentinik amerleriarsimapput akilli 1,2 procentinik apparsimallutik.
Qalerallit tunisat 63 procentimik amerleriarsimapput, kiilumulli akigitinneqartut 10,7 procentimik appariarlutik.
Naatsorsueqqissaartarfiup imarmiut assigiinngitsut pillugit kisitsisaatai imaapput:
Raajat: Januaarimiit-marsimut 2024-mi avammut tunisaanerisa nalingat 14,9 procentimik annertuseriarsimavoq, tamanna 83 mio. koruuninik naleqarpoq. Avammut tunisat annertussusaat 16,3 procentimik annertuseriarsimasoq akillu 1,2 procentimik apparlutik.
Qalerallit avammut tunineqartut nalingat 46,0 procentimik annertuseriarsimavoq, tunineqartut annertussusaat 63,5 procentimik annertuseriarsimasoq. Taamaalilluni kiilumut akit 10,7 procentinik appariarsimapput.
Saarulliit avammut tunineqartut nalingat 61,6 procentimik qaffariarpoq, tunineqartut annertussusaat 72,0 procentimik annertuseriarsimallutik. Saarulliit avammut tunineqartut kiilumut akia 6,0 procentimik appariarpoq.
Saattuat avammut tunineqartut nalingat 24,1 procentimik annikilleriarsimavoq, tunineqartut annertussusaat 2,2 procentimik apparpoq. Kiilumut akia 22,4 procentimik annikilleriarsimalluni.
