Avammut tunisat nalingi qaffariarujussuartut

Aalisakkanik nioqqutit nunatsinnit avammut tunineqartartut akii annertusiartuinnarput. Naatsorsueqqissaartarfimmit kisitsisit nutaat tamanna takutippaat.

Naatsorsueqqissaartarfik naapertorlugu aalisakkat pingaarnerit nalingi januaarimit oktobarimut piffissamut ukiup siulianut sanilliullugit 17,3 procentinik qaffariarsimapput.

Aalisakkat pingaarnerit tassaapput raajat, saarulliit, qalerallit, saattuat aamma nipisap suai.

Avammut tunisat 2019-mit 2021-mut appariartoreernerisa kingorna, uani ataani titartakkami 2022-mi ineriartorneq pitsaalluinnartoq takutinneqarpoq:

Nedenstående graf viser, at udviklingen i 2022 er særdeles positiv, efter at eksportværdien har været faldende fra 2019 til 2021:

Kisitsisit utaaqqiisaagallartumik naatsorsuinerunerat Naatsorsueqqissaartarfiup oqaatigaa, taamaattumillu iluarsiiffigineqarsinnaanerat eqqaamaqquneqarpoq.

Kisitsisit imaapput:

• Raajat: Raajat 2022-mi januaarimiit oktobarimut avammut tunisaanerisa nalingat 17,1 pct.-imik annertuseriarsimavoq, tamanna 311 mio. kr.-nik naleqarpoq. Avammut tunisat annertussusaat 7,9 pct.-imik qaffappoq akillu 13,2 pct.-inik qaffallutik.
• Qalerallit: Qalerallit avammut tunineqartut nalingat 13,7 pct.-imik annertuseriarsimavoq, tunineqartut annertussusaat 7,0 pct.-inik annikilleriarsimasoq. Taamaalilluni kiilumut akit 22,2 pct.-inik qaffassimapput.
• Saarulliit: Saarulliit avammut tunineqartut nalingat 28,3 pct.-imik qaffariarpoq, tunineqartut annertussusaat 2,0 pct.-inik annikilleriarsimasoq. Saarulliit avammut tunineqartut kiilumut akia 31,0 pct.-inik qaffariarpoq.
• Saattuat: Saattuat avammut tunineqartut nalingat 21,8 pct.-imik annertuseriarsimavoq, tunineqartut annertussusaat 4,3 pct.-inik qaffappoq. Kiilumut akia 16,9 pct.-inik annertuseriarsimalluni.
• Nipisap suai: Nipisap suaasa avammut tunineqartut nalingat 3,3 pct.-imik annertuseriarsimavoq, tunineqartut annertussusaat 22,0 pct.-inik qaffassimallutik. Taamaalilluni kiilumut akit 15,3 pct.-inik apparsimapput.