Nuummi Ilulissanilu mittarfissuit Polenimit Sri Lankamit sulisartunik
tikisitsinikkut ukiuni makkunani sanaartortoqarpoq.
Qeqqata Kommuniani aamma
Nuummi meeqqanut paaqqinnittarfinni utoqqaallu angerlarsimaffiini nunanit
allamiunik sulisartunik tikisitsinikkut sulisussaaleqineq aaqqiiviginiarlugu
sulisoqalissapput.
Nuummi Ilulissanilu mittarfissuit Polenimit Sri Lankamit sulisartunik
tikisitsinikkut ukiuni makkunani sanaartortoqarpoq.
Qeqqata Kommuniani aamma
Nuummi meeqqanut paaqqinnittarfinni utoqqaallu angerlarsimaffiini nunanit
allamiunik sulisartunik tikisitsinikkut sulisussaaleqineq aaqqiiviginiarlugu
sulisoqalissapput.
- Siullermik isumaqarpunga pingaaruteqartoq erseqqissaavigissallugu
nammineerlutik maannganngillat, uagununa nammineq tikisitagut, taamaattumik
tikisikkatsigit nammineq aamma ulluinnarni sapiginngisamik maani
inuiaqatigiinni akulerunnissaat isumagisariaqarparput qallunaajuppata,
thailandermiuuppata, polenimiuuppata kikkuugaluarpataluunniit uagununa nammineq
tikisitagut, SIK -imi siulittaasoq Jess G. Berthelsen oqarpoq.
Innuttaasut ikiliartortut
Naatsorsueqqissaartarfiup inuttussusermut
naatsorsuusiortarneri najoqqutaralugit nunatsinni
inunngorsimasut 2050mi 39.000-inut ikileriarnissaat naatsorsuutigineqarpoq, tamatumunngalu
SIK-imi siulittaasoq isumaqarpoq inuiaqatigiittut ikiliartornerput
isummerfigisariaqaripput, akuersaanngikkutigullu ikiliartornerput taava
avataaneersut akuerisariaqarpagut.
- Taamaattumik aalajangerutta akuerinianngilarput taamatut
ikiliartornerput naleqqussarnianngilagut, taava ilaatigut allatut ajornaqaaq
avataaniit suliartortut akuerisariaqarpagut, akuerissagutsigillu
politikkeqartariaqarpugut, Jess G. Berthelsen oqarpoq nangillunilu:
- Tassalu inuiaqatigiinnut pulatinnissaat isumagisariaqarparput,
qallunaatut taallugu “inklusion”, taavalu aamma oqaatsitsinnik
ilinniartillugit, uani kingullermik oqallinnermi tupigusuutigilaartagara
uaniippoq qallunaat taamatut kalaallisut oqalussinnaanngitsut suliartoraangata
uparuarneqarneq ajorput, filipinerit sulilerpata taava oqaatsit sorpassuit
atorneqalissapput, Jess G. Berthelsen oqarpoq.
Avataaniit suliartortut qitornaasa innuttaassuseqarnerat
Naalakkersuisut suliffeqarnermut nalunaarusiaanni 2023-meersumi erserpoq
suliartortut kangianeersut nunatsinni meerartaartarmata, kisianni
naalagaaffimmi
innuttaassuseqarnatik. Nunanit allamiut suliartortut meerartaaraangata
aamma innuttaassuseqartarlernissaannut isummertoqartariaqartoq, Jess G.
Berthelsen oqarpoq.
- Isummissagutta taamatut ikiliartuinnarnissarput akuerinngikkipput,
taamatut kisitsisit kingulliit naapertorlugit 39.000nanngussaagut 2050mi taava
avataaniillunniit takkuttoqassangaluarput aap aalajangerutta ikiliartornerput
taamatut akuerinianngilarput aamma naleqqussarfiginianngilarput, taava maani
filipinerit thailandermiullu meerataarsimappata, taava maani inuiattut
allatulli inissinneqartariaqarput, Jess B. Berthelsen oqarpoq.
Avataaniit suliartortut oqaatsitsinnik ilinniartinneqartariaqartut
Nunanit allamiut sulisartut pillugit politikkeqarnermi inuiaqatigiinnut
pulatinneqarnissaannut politikkeqarnissap saniatigut oqaatsitsinnik ilinniartinneqartarnissaannut
politikkeqartoqartariaqartoq, Jess G. Berthelsen isumaqarpoq.
- Filipinerit
Thailandermiullu oqaatsitsinnik ilinniarusupput aamma maluginiarpara
oqaatsitsinnik sukkasoorujussuarmik ilinniartartut, pisiniarfinni allani
eqarivallaarnagu oqalunniarsarisartut naamik qallunaat, taamaattumik arlaatigut
politikkeqarfigilerutsigit qularivallaanngilara aamma oqaatsivut
ilinniarsinnaassagaat, Jess G Berthelsen oqarpoq.
Piffissamilu kingullermi
paaqqinnittarfinni utoqqaallu angerlarsimaffiini kangiamiunik
sulisoqalernissamut oqaatsit pillugit oqallinneq maluginiarlugu.
- Arraa, ila qallunaarpassuit maannartarput nunarput ilisimanagu,
tutisimanagu, nunatsinnilu pissutsit susoqarneraluunniit sunnguamilluunniit
ilisimasaqarfiginagu, taakkua uparuarneqarneq ajorput, taamaattumik
politikkiliortoqassappat aamma taakkua ilanngunneqartariaqarput, qallunaat
suliartortut maanga aamma inuiaqatigiinnut qanoq pulatissavagut, aamma
oqaatsinut tunngatillugu qanoq ilinniartissavagut, tassani
immikkoortitserusunngilanga. Taamatut politikkiliortoqassappat kikkulluunniit
pineqartarput aamma tassani qallunaat, avataaniit suliartorput, Jess G.
Berthelsen oqarpoq.
Inuiaqatigiinni peqataatinneqarnissaat
SIK nunanit allamiunik sulisartunik manna amerlasuunik ilaasortaqarpoq, taakku ilaasortat allat assigalugit sullinneqartarput. Suliffeqarfinni pitsaasumi sulisinneqarnissaat aamma isumaqatigiissutit naapertorlugit sulisinneqarnissaat SIK-imiit suliaraat.
Inuiaqatigiinnilu nunanit allamiut sulisartut akuunerulissappata pinaveersaartitsisariaqarpugut, Danmarkimisut ghettonik pilersitsinnginnissamik.
- Maannakkut soorlu Nuummi inissiani qaleriaallutik najugaqartinneqartarput, tassa taakkuuinnaavipput, naluara inuiaqatigiinnut qanoq peqataanersut taassuma saniatigut. Inuiaqatigiinnut pulatinneqartariaqarput, Danmarkimi ghettoliorsimaneq ajornartorsiutaavoq, tassa illoqarfinni ataasiakkaani aalajangersimasuni ineqartitsineq taamaasillutik inuiaqatigiinni pulatinngitsoorlutik, namminneq silarsuaaqqaminni inuulerlutik, taanna pinngitsoortittariaqarput, Jess G. Berthelsen oqarpoq.
- Maani ilaalersissagutsigit, nalunngilara inissaaleqisoqartoq kisianni allatuulli naliginnaasumik ineqartinneqartariaqarput aamma inuiaqatigiinnut akulerutsinneqartariaqarput taavalu aalajangersimasunik najugaqartinnagit, pitsaanerpaajussagaluarpoq nunaqarfinnut illoqarfinnut mikinernut nuutsillugit, Jess G. Berthelsen oqarpoq.
