Banan-gate
Bananit Pilersuisup pisiniarfiinut uteqqissapput
KNI-p pisiortornermut immikkoortoqarfiata arfininngormat bananit Pilersuisup pisiniarfiinit peerpai, bananit nerissallugit uloriananngitsut nerisassanik oqartussaasut akissuteqarnissaasa tungaanut
Inuit naapittarfiisigut siammarterunneqarmat bananit aammik HIV-mik akulimmik akoqartut arfininngormat ullaakkut KNI-p pisiortornermut immikkoortoqarfiata bananit Pilersuisup pisiniarfiinit peerpai, bananit nerissallugit uloriananngitsut nerisassanik oqartussaasut akissuteqarnissaasa tungaanut.
KNI tusagassiorfinnut nalunaarutikkut taamatut paasissutissiivoq.
Pisisartut qisuariarput
Ingerlatsivik namminersorlutik oqartussanit pigineqartoq taamaasiorpoq, pisisartut ilaasa oqaluttuaq salloqittaataasimagunartoq sakkortuumik qisuariarfigisimammassuk.
Isumannaatsuuneq salliutillugu
– Nunami tamarmi Pilersuisup pisiniarfii 66-it aqqutigalugit innuttaasunik pilersuisuugatta isumannaatsuuneq salliutittariaqarparput - tusatsiagaannaagaluarpataluunniit - aammalu pissutigalugu pisussaaffigigatsigu pisisartunut qulakkiissallugu Pilersuisumi pisiaat peqqinnissamut ulorianartuunngitsut, KNI-p pisiortornermut ussassaarinermullu pisortaa Kurt Lauritsen tusagassiorfinnut nalunaarutikkut paasissutissiivoq.
Tamatuma saniatigut tikkuarpaa pisiniarfiutileqatigiiffiup taamaasiornermigut pisiniarfinni sulisut qajassuunniarsimagai.