BankNordik oqaatsinut paasinanngitsunut toortakkamik atuutilersitsivoq
Aningaaserivinni oqaatsit paasiuminaatsut BankNordikip nungutinniarpai. Aningaaserivik tusagassiuutinut nalunaarummi, oqaatsinik paasiuminarpallaanngitsunik allakkami taama allappoq.
BankNordik atuisunut oqaatsinik paasiuminarnerusunik oqalunniarpoq.
Aningaaseriviup nittartagaani oqaatsinut paasiuminaatsunut toortagaq matumani atortut ilagaat. Paasinngisaqaraanni toortagaq toorneqartassaaq.
Taassuma suliniutillu allat paatsooqatigiinnerit aamma toqqissisimannginnerit nungusassavai.
- Isumaqarpugut sullitavut tamarmik aningaasaqarnertik pillugu pitsaanerpaamik aala- jangertarnissaannut periarfissinnissaat akisussaaffigalugu. Illumik, biilinik angallammil- luunniit pisineq imaannaanngeqaaq, taamaammat paaseqatigiilluarluta attaveqaqatigiinnissarput assorsuaq pingaaruteqarpoq. Tamanna atuuppoq sullitavut allakkatigut nalunaarfigigaangatsigit, aammalu nittartakkami allakkaangatta, René Sørensen, BankNordikimi atuisunut siunnersortinut pisortaasoq, tusagassiuutinut nalunaarummi oqarpoq.
Tassanilu suli suliassaqartoq takuneqarsinnaannguatsiarpoq. Aningaaseriviup tusagassiuutinut nalunaarutaata atuaruminassusaa (lixtal) Sermitsiaq.AG-p qallunaaruuani uuttortarpaa. Tassani kisitsit 51-imiippoq, taamaalillunilu qaffasinnerpaap tulliani inissilluni: atuaruminaatsoq.