Banknordik: Pissutsit allanngoraraluartut sullitat ajunngillat

Erniat qaffakkiartoraluartut aningaasaqarnikkullu pissutsit allanngoraraluaqisut bankimi sullitat ataatsimut isigalugu ajunngillat, Banknordikimit Nuummi immikkoortortaqarfeqartumit tusagassiuutitigut nalunaarummi oqaatigineqarpoq.

Aningaaseriviup pisortaa oqaluttuarpoq, Kalaallit Nunaanni niuernikkut ingerlatami eqeersimaarnerulersoqarsimasoq:

- Ukiup sisamararterutaani qaangiuttumi ineriartorneq ajunngitsutut naammaginartutullu nalilerparput, ingerlatiinnarnissaalu anguniarniarparput. Sullitat akornanni eqeersimaarneq ersernerulersimavoq, taamaammallu ukiup ingerlanerani taarsigassarsiarineqartut 17 procentimik qaffariarsimallutik, BankNordikimi pisortaaneq, Árni Ellefsen, tusagassiuutitigut nalunaarummi oqarpoq, ingerlaqqillunilu:

Taarsigassarsineq akisunerulersoq

- Sullitatta ilungersuutit akimorlugit ingerlalluarsinnaanerat nuannaarutigaarput, naak aningaasat nalikilliartornerat erniallu qaffakkiartornerat takussaagaluartoq.

Banknordik niuernikkut ingerlatami Kalaallit Nunaanni immikkoortortaani akileraarutit suli ilanngaatiginagit 21 millioner koruuninik iluanaaruteqarsimavoq. Taakkua ukioq kingulleq 27 millioner koruuniusimapput, iluanaarutillu tassa ikileriarsimallutik, aningaaseriviup ukiup sisamararterutaanut nalunaarusiaani takutinneqarpoq.

BankNordik itisiliilluni allappoq, erniat qaffakkiartornerat ilutigalugu aningaasanik taarsigassarsinissaq akitsoriartorsimasoq, tamatumali saniatigut uninngasuutinut erniat aningaasartuutaasut atorunnaarsinneqarsimasut, ileqqaakkanullu kontot ilaat iluanaarutaasumik erniaqalersimasut.

- Ukiorpassuarni erniat aningaasartuutaasut atuutereernikuusut maanna sullitat ileqqaakkaminnut, soraarnerussutisiassaminnut meeqqallu ileqqaagaannut iluanaarutaasumik erniaqarsinnaaleqqinnikuupput, Banknordik allappoq.

Qaammatinut qulingiluanut naatsorsuutit pingaarnersiukkat, Banknordikimit paasissutissiissutigineqartut

• Akileraarutit sioqqullugit inernerat tassaavoq 111 mio. kr., 2021-mi piffimmi tassani 196 mio. kr.-upput, tassannga isertitat ataasiarlutik pisussat 83 mio. kr.-iullutik

• Appartitsinerit sioqqullugit ingerlatsinerup inernera 144 mio. kr.-iuvoq, 2021-milu piffimmi tassani 125 mio. kr.-iulluni

• Taarsigassarsiarititanik appartitsinernik utertitsineq ilanngaatissat ilanngaatigereerlugit 43 mio. kr.-iuvoq, 2021-milu piffimmi tassani 36 mio. kr.-iulluni BankNordik

• Bankip taarsigassarsisitsinera 2021-mi piffimmi tassani 7,6 mia. kr.-usimasoq 8 mia. kr.-inut qaffariarsimavoq • Bankip realkreditimik taarsigassarsisitsinera 2021-mi piffimmi tassani 2,6 mia. kr.-usimasoq 2,7 mia. kr.-inut qaffariarsimavoq

• Bankip uninngatitai 2021-mi piffimmi tassani 7,4 mia. kr.-usimasut qaffariarsimapput 8,2 mia. kr.-iulerlutik • Siulersuisut naatsorsuutigaat ilanngaatissat ilanngaatigereerlugit 2022-mi inernerat 140- 170 mio. kr.-ip nalaaniissasoq

Najoqqutaq: Banknordik