BankNordikip sinneqartoornerunissani naatsorsuutigigaa
BankNordikip naatsorsuutitigut angusassanut ilimagisani qanittukkut qaffappai kvartalillu pingajuannut naatsorsuutit Savalimmiormiut aningaaserivianni isumalluarnermik allanngortitsinngillat
BankNordikip naatsorsuutigaa, 2019-imut ilanngaatissat peereerlugit naatsorsuutitigut angusat 170-210 millioner koruunit akornanniissasut, siusinnerusukkut ilimagisatut missingiunneqaretut 150-180 millioner koruunit akornanniinnatik.
Aningaaserivik kvartalit pingajuannut naatsorsuutinik ullumi saqqummiussivoq, taakkua sullitat eqeersimaarluarnerat nalikillilikkanillu utertitsineq kiisalu erniat suli appasinnerat tunngavigalugit naammagisimaarnartutut oqaatigineqarlutik.
- Kvartali sullitat eqeersimaarluarnerannik siuariartornermillu malunnaateqarluarsimavoq, tamannalu pingaartumik realkreditimit taarsigassarsianik allanngortitsinerit qaffariarnerannik, sillimmasiissutinit isertitat amerliartornerannik 9 mio. kr.-nillu nalikilliinernik utertitanik pissuteqarnerulluni, BankNordikip pisortaanera Árni Ellefsen tusagassiuutitigut nalunaarummi paasissutissiivoq.
Aningaaseriviup soraarnerussutisiaqalernissamut aningaasaateqarfimmut SISA-mut isumaqatigiissut kvartalimi qaangiuttumi Kalaallit Nunaanni niuerfimmi pisimasut pingaarnersaattut oqaatigaa.
Aamma atuaruk: Banknordik utoqqalinersianut katersanik aqutsissaaq
Kvartalit pingajuanni kisitsisit pingaarnerit:
Akileraarutit suli ilanngaatiginagit angusat 201 mio. kr.-nik amerlassuseqarput 2018-imi piffissami tassani 286 mio. kr.-nik amerlassuseqarsimallutik. Nikingassutip taama annertutigineranut pissutaanerpaavoq 2018-imi pingaartumik ataasiaataasumik isertitat suliffeqarfissuup Savalimmiuni qullersaqarfianik tunisinermut attuumassuteqartut.
Nalikilliinerit suli pitinnagit ingerlatsinermi angusat 130 mio. kr.-nik amerlassuseqarput 2018-imi piffissami tassani 137 mio. kr.-nik amerlassuseqarsimallutik.
Taarsigassarsiarititani nalikilliliinerit 80 mio. kr.-nik utertitanik amerlassuseqarput 2018-imi piffissami tassani 93 mio. kr.-nik amerlassuseqarsimallutik.
Ingerlatsinermi angusat 211 mio. kr.-nik amerlassuseqarput siorna piffissami tassani 230 mio. kr.-nik amerlassuseqarsimallutik.
Aningaaseriviup taarsigassarsiarititai 10 mia. kr.-nik amerlassuseqarput taamaalillutillu 2018-imut amerlassuseqarlutik.
Aningaaserivimmi uninngasuutit 2018-imi kvartalit pingajuanni 13,2 mia. kr.-nit 13,5 mia. kr.-nut amerleriarsimapput.
Aningaaseriviup realkreditimut tunngasunik ingerlateqqitai 2018-imi kvartalit pingajuanni 12,1 mia. kr.-nit 12,9 mia. kr.-nut amerleriarsimapput.
Akiliisinnaassueq 2018-imi kvartalit pingajuanni 17,6%-imit 21%-imut qaffariarsimavoq.
Aqutsisut nalikilliinerit sioqqullugit 2019-imi ukiumut naatsorsusiorfiusumut ingerlatsinermi angusat 160-200 mio. kr.-nik amerlassuseqarnissaannik ilimasunneq aalajangiusimavaat (1.-3. kvartal 2019: 130 mio. kr.).