BDO-p Nunatsinni Deloitte pisiaraa
Kukkunersiuisoqarfik Deloitte ukiuni arlalinni Namminersorlutik Oqartussat suliffeqarfiutaannik angisuunik atuisunik annaasaqartarsimasoq, maanna nunani tamalaani suliffeqarfissuusumit pisiarineqarpoq.
Suliffeqarfiup siunnersuisartup kukkunersiuisoqarfiusullu BDO-p novembarip 15-anni Deloittep Nuummi allaffeqarfia pisiaraa. Ingerlatseqatigiiffik tusagassiuutinut nalunaarummi taama ilisimatitsivoq.
BDO-mi piginneqataasoq aamma kukkunersiuinermut sillimmasiisarnermullu pisortaq, Claus Bonde Hansen, Kalaallit Nunaanni najukkami siunnersuisartut kukkunersiuisartullu nutaanik pikkorissunillu suleqateqalernissaat qilanaarai.
- Deloittep aamma BDO-p immikkut Kalaallit Nunaanni suliatigut tunngaviit pilersissimasaasa ataatsimut ineriartorteqqinnissaat qilanaaraarput, taanna tusagassiuutinut nalunaarummi oqarpoq.
BDO nunatsinni niuerfimmi siunnersuisartuni kukkunersiuisoqarfinnilu anginerpaat ilaanniilernissaannik pisineq kinguneqarpoq. Deloittep ukiuni kingullerni Namminersorlutik Oqartussat suliffeqarfiinik annaasaqareernerata kingorna pisineq pivoq.
Arlallit annaagaat
2018-miilli Deloittep atuisut Air Greenland, Tusass (siornatigut Tele Greenland), KNI, Great Greenland aamma RAL annaavai. Taamaattoqarnerani Grønlands Revision A/S aamma PwC Namminersorlutik Oqartussat suliffeqarfiutaannit atugaanerulerput.
BDO Danmarkimi siunnersuisarfiit kukkunersiuisoqarfiillu annersaasa sisamaraat, taannalu tamakkiisumik danskinit pigineqarlunilu aqunneqarpoq. Suliffeqarfik 2013-imili Nuummi allaffeqarfeqarpoq, kisianni ukiut 30-t sinnerlugit Kalaallit Nunaanniippoq, suliffeqarfillu tassani inuussutissarsiortunut pisortallu suliffeqarfiinut arlalinnut siunnersuinermik kukkunersiuinermillu suliaqartarpoq.
Nunatsinni allaffeqarfik Danmark tamakkerlugu BDO-p suliffeqarfissuanut ilaalissaaq, tassani nuna tamakkerlugu 1.400-nit amerlanerusunik sulisoqarpoq, Danmarkimilu 32-inik allaffeqarfeqarluni. Nunarsuaq tamakkerlugu BDO nunani 160-nit amerlanerusuni allaffeqarpoq, sulisullu 100.000-t missaanniittut sulisoralugit.