Benziina: Ukiumut 45.000 koruuninik aningaasartuuteqarnerulissaaq

Angutivik Filemonsenip inuttanilu Kristian Krusep imaq maningaarami tarrarsuutitullusooq ilisimasoq Poca 770-imik ingerlaarfigaat.

Nipisannut qassutinut Nuummiit avannamut 30 sømilit missaannik ungasitsigisumiittunut amuariarneranni nattoralik qulaatillattaarpoq.

Nuulli upernarniaasaamik upernallaqqaarmat aalisartunut piniartunullu nutaarsiassamik tusarluarnanngitsumik takkuttoqarpoq. Ikummatissat akii qaffanneqassasut KNI-p nalunaarutigeqqammerpaa. Benziina liiterimut 85 oorimik akitsorpoq, liiterimut 5 koruunimiit 5,85 koruuneqalerluni. Taamaalilluni 17 procentimik akisunerulerpoq.

KNAPK-p SIK-llu akitsuineq ernumagalugu tusarliunneqaannartoq oqaaseqarfigereerpaat. Orsussallu akitsornera aalisartunit nuannaarutigineqanngeqisoq, Angutivik Filemonsenimut aamma sunniuteqarnerluttussanngorpoq.

- Naatsorsuinikka malillugit orsussaannarmut ukiumut 45.000 koruuninik aningaasartuuteqarnerulissuunga. Aallarnerimmi tamaasa orsertarpugut, Angutivik Filemonsen taama oqarpoq.

Angutivik Filemonsenip aappaa ilinniartuuvoq, taamaammat angerlarsimaffimminni kisimiunerusoq pilersuisuulluni. Akitsuinerlu imminerminut ilaquttaminullu kinguneqarnerluttussanngortoq oqaluttuaraa:

- Ernera alliartortoq annerusumik uanga pilersorpara. Aappara ilinniartuummat aamma taanna pilersorniarsarivara ilinniarnermusiat annikitsuararsuugamik. Pilersuinera ajoriffissaqartinngilara pisussaaffittut isigigakku. Kisianni ilungersornerusariaqarnera isumaqataaffiginngilara, Angutivik Filemonsen oqarpoq.

Kiffaanngissuseqarluni sulerusuttoq

24-nik ukiulik Angutivik Filemonsen sanasuni siornatigut sulinikuuvoq kilisattarnikuullunilu. Suliffissanili nammineerluni aalajangertarusukkamigit umiatsiaararsortunngorpoq. Ukiorlu ataasinngulersoq umiatsiaararsortooreerluni.

- Meeraallungali angalaarneq imaluunniit pinngortitamiinneq nuannarisuugakku. Ingammik massakkutut ililluni pinngortitaq aggeqqeqqusisutut ilisaleraangat qimassinnaasutut misigisannginnakku. Angalajuartuugama meeraallungali angallanneqalerama taanna inuussutissarsiut toqqarpara. Aamma nikallujaallunga inuussutissarsiutigaara, Angutivik Filemonsen oqaluttuarpoq.

Angutivik Filemonsen inuttaalu amuariartut peqatigigatsigit nipisat suaat 70 kiilut missaanniittut pissarsiaraat. Naak silageqimmat suna tamarmi ajorisassaanngitsutut isikkoqaraluartoq pisatik naammanngitsut umiatsiaararsortup inuusuttup oqaatigaa. Nipisat suaat kiilumut 31 koruunisissutigisarpai, taamaammat amuariarnermi tassani pisaat umiatsiaararsornermini aningaasartuutaanut naapertuutinngillat.

Qinerserngaarpoq - kingornali pakatsilluni

Angutivik Filemonsen inuttaalu amuariartut peqatigigatsigit nipisat suaat 70 kiilut missaanniittut pissarsiaraat. Naak silageqimmat suna tamarmi ajorisassaanngitsutut isikkoqaraluartoq pisatik naammanngitsut umiatsiaararsortup inuusuttup oqaatigaa. Nipisat suaat kiilumut 31 koruuneqarput, taamaammat amuariarnermi tassani pisaat umiatsiaararsornermini aningaasartuutaanut naapertuutinngillat.

Angutivik Filemonsen Kangaatsiami peroriartorpoq, umiatsiaararsortutullu Nuup eqqaa suli ilinniarujoorlugu. Amuariarnermi tassani pisani nalilersoreerlugit qassutit nuussallugit aalajangerpoq kujammullu ingerlaqqippugut. Aalisartoq inuusuttoq Inatsisartunut marsimi qinersigatta inuunermini siullerpaamik qinersivoq, Jens-Frederik Nielsenimi qineramiuk. Qinersininili ilumut eqqortuunersoq maanna isumaliutigaa.

Ikummatissat akii qaffanneqanngippata 130 mio. koruuninik naleqassasoq Naalakkersuisut siulittaasuata Jens-Frederik Nielsenip sapaatip-akunnera kingulleq oqaatigaa. Ikummatissallu akii nunarsuarmi akigititat aallaavigalugit aalajangersarneqartartut ilanngullugu erseqqissaatigalugu. Taamaakkaluartoq Angutivik Filemonsen pakatsivoq:

Jens-Frederiup imaluunniit Naalakkersuisut nipisaat suaasa akii allallu aqussinnaanngilaat. Taanna qanoq eqqarsaatigaajuk, paasinanngila?

- Paasinarpoq akinik aqutsisinnaannginnerat, nunarsuarmi akit eqqarsaatigalugit. Nunarsuarmi akigitinneqartut malinneqaramik. Kisianni sooq taava neriorsuutit taakkua iliuuseqarfigisinnaanagillu qineqqusaarutigivaat taama pitsaatigisumik? Soorunami apeqqusernarpoq, apeqqusernartippara uanga nammineerlunga. Qineqqusaarutitik sunaaffa qanoq iliuuseqarfigisinnaanagit, Angutivik Filemonsen naggasiilluni taama oqarpoq.

Angutivik Filemonsen Kristian Kruselu amuariareerlutik ningitsiartoreerlutillu aqqutaani puisinik takullattaapput, ilaannilu malersulertarlutik. Puisit takusaat pisassaanngillat. Aqagussaqarmallu angerlamut aallaannaqaat. Umiatsiaararsortuuneq Angutivik Filemonsenimut kiffaanngissuseqalersitsigaluartoq piffissaq aggersoq naleqqussartariaqassaaq, benziinammi akia qaffammat inooqataaffigiinnartariaqalerpaa.