Biili innaallagiatortoq malunnaatilik Nunatsinni tuniniagaalissasoq

Suliffeqarfissuup Mercedesip biili aqqulluttukkoorsinnaasutut siunnersuutigisartik – imaluunniit Tyskisut geländewagen - 1979-imi saqqummiuppaat.

Biili sakkutuunit sakkutuujunngitsunillu atorneqartussatut naatsorsuutigineqartoq, pingasunillu assigiinngissuteqartoq piumaneqarlualerpoq, taamanimiilli pisuunit tusaamasanilluunniit nuannarineqarluarluni. Vatikanip biili aamma pisiaraa, Pavep biilissaatut, taannalu ingerlaannarluni „Popemobil“-imik taagorneqalerpoq. Biili ilaatigut igalaaminermik ammarneqarsinnaasumik qaavatigut atortulerneqarluni, ingerlanerani Pave taamaalilluni nikorfasinnaalluni inunnut aalaterilluni pilluaqqusisinnaalluni.

 G-wagon – soorlumi biili aamma ulluinnarni taama taaneqartartoq – 2018-imi pitsanngoriartinneqarsimavoq, biili takinerulerlunilu silinnerulerluni, akimarpalunnerulerluni ilaatigut issiaviit amminik qallerneqarlutik, qisuimmik qitermigut atortulerneqarluni, biilinut ikisarfiit anisarfiillu ataasigut tutisarfilerneqarlutik aamma gearii assannik attornagit nikisinneqarsinnaallutik.

 Uninngavimminit nikinngingajalluni imminut kaavissinnaasoq

Nunarsuarmi biilinik saqqummersitsinerit annersaanni Kinami -Beijing International Automotive Exhibitionimi - apriilip 25-anni ingerlanneqartumi, Mercedesip G-wagon innaallagiatortoq sivisuumik utaqqineqarsimasoq saqqummiuppaa. Taassuma atortoralugit batterii 116 kWh, 588 hk-eqarluni aamma 1.164 Nm kiisalu 473 km-it angullugit ingerlaarsinnaalluni.

Biili tonsinik pingasunik oqimaassusilik sisamanik motooreqarpoq, assakaasuini tamani immikkut motooreqarluni, taamaalilluni biili aqqusineqanngitsukkut ingerlaartillugu aqukkuminarnerusarluni, aamma sakkortuumik sangoriasaarsinnaalluni – allaat uninngavimminit nikinngingajalluni imminut kaavissinnaalluni, nunamilu aqqusineqanngitsumi 720 gradit angullugit kaajallassinnaalluni. Sivingasukkut aamma ingerlasinnaavoq 45 gradit angullugit sivingatigisukkoorsinnaalluni, imermilu 85 centimeterinik itissusilikkoorsinnaaluni.

Nuummiittup Deres Autop, Mercedesinik tuniniaasuusup, innaallagiatortut geländewagenit nunami maani siulliit novembarimi tigunissaat qilanaaraa, pisortaallu Michael Østergaardip neriorsuutigaa taakku kunngeqarfimmi akikinnerpaassasut. G-Wagon innaallagiatortoq Danmarkimi 2,2 millionit koruunit missaannik akeqartussatut naatsorsuutigineqarpoq.