Binzer-ip tunuarnera: Suli paarlatsissaqanngilaq
Air Greenlandip siulersuisuini ilaasortaq oqarpoq, Michael Binzerip kingoraartissaanik aalajangersimasumik oqalunnissaq siusippallaartoq
- Suli Michael Binzerip paarlatsissaanik ujaasilinngilagut aatsaat soraaniumminik tusarliimmat.
Taamak Sermitsiaq.AG.-mut oqaluttuarpoq Air Greenlandimi siulersuisut siulittaasuat, Jens Wittrup Willumsen.
Tamanna tunngaveqarpoq ullumi saqqummiunneqarmat Michael Binzer Air Greenlandimi pisortatut issiavimmit qimagunnissamik nalunaaruteqarmat Tele Greenlandimi issialernissani pissutigalugu.
- Inuk qanoq ittoq Air Greenlandimi pisortassatut piukkutissavisiuk?
Taanna imaasiallaannarlunga oqaatigisinnaanngilara. Massakkut ima pisoqassaaq, siulersuisuni atorfinitsitsinissamik ataatsimiititamik pilersitsissaagut, taamaaliornermi aallarniutaasarpoq pisortaq qanoq ittoq kissaatigineqarnersoq paasiniarneqarnera. Taamaattumik maannamut oqaatigisinnaanngilara inuk qanoq ittoq ujarnerlutigu, Jens Wittrup Willumsen oqaluttuarpoq.
Siulersuit siulittaasuata Binzerip taamaatinnera uggoraa erseqqissaatigaluguli siulersuisut Michael Binzerimik pitsaasumik suleqateqarsimaneq qujamasuutigigaat.
- Michael Air Greenlandimi ineriartornermi pingaaruteqarsimaqaaq piffissami unammillernerup alliartuinnarfiani. Ingerlatsivik nunatsinni inuiaqatigiinni pitsaasumik sinniissuuffigaa suliffeqarfimmilu Air Greenlanditut ittumi pisortaasimavoq nukittooq. Nuannaarutigaarput ukiup affaanik periarfissaqaratta, Michaelip suliniutit aallartitat naammassillugit qimagunnissaa anguneqassammat, tamatumalu saniatigut paarlatsissamik nukittuumik ujaasinissatsinnut periarfissaqassagatta.
Binzer nersualaarneqarpoq
- Michael Binzerip, Air Greenlandimik qimatsinngilaataa qanoq oqaasissaqarfigaajuk?
- Suliffeqarfik atorfeqarfigiumaaligassaa ilisimasaqarfiginngilara suullu unammilligassarissanerai naluakka. Sumulluunniit nuulluni pisortanngussagaluaruni Michaelip assigiinngitsorpassuarnik piginnaasaqarnini aallaavigalugu iluaqqutissiinissaa qularutissaanngilaq. Michael piumassuseqartorujussuuvoq aamma suut suliani tamaasa angusaqarfiginiartarpai. Neriuppunga suliffeqarfigiligassaa inuttaanut tulluartuussasoq pitsaasunillu angusaqarfiussasoq. Aamma neriuutigaara Michaelip oqaloqatigiilluni aqutseriaatsini ingerlatiinnassagaa. Taanna piginnaasaq ataaseq kikkunnut tamanut iluaqqutaav suleqataaguit, aningaasaliisuuguit, pisinniartuuguit kinaagaluaruilluunniit iluaqqutigissavat. Tamannalu qularutiginngilara Michaelip nangissagaa, taamatummi pissuseqarmat, Jens Wittrup Willumsen naqissusiivoq.
Naatsorsuutigineqarpoq Michael Binzer Tele Greenlandimi atorfissaminut nutaamini apriilip aallaqqaataani 2013 issialissasoq.