Blue Water Greenland avammut nassiussalerinissamut piareersarpoq

Siunissamut isumannaarpugut ineriartornissarlu naatsorsuutigalugu, Blue Water Greenlandimi nunami pisortaq Lars Vajse oqarpoq.

Nuummi maqiteriviusimasup Nuuk Imerup illutaa Blue Water Greenlandip 100 millionit koruuninik aningaasaliiffigaa.

Suliffeqarfiup umiarsuakkut assartugalerinermik suliaqarfiusup Nuummi maanna illuanit sisamariaammik anginerusoq.

Avammut tuniniaanerup, takornariaqarnerup sullitallu pisariaqartitai pissutaallutik quersuarnik pisariaqartitsinerup annertusiartornissaanik ilimasunneq aningaasaliissuteqarnermut pissutaasoq Blue Water Greenlandimi pisortaq oqarpoq.

– Siunissarput qulakkeerinnikkumalluta illorsuarmut aningaasaliivugut. Ineriartornissaq naatsorsuutigaarput. Nuummi sanaartortoqaannavippoq. Siulittuutigineqarpoq innuttaasut amerliartorumaartut, takornariaqarnerlu aamma ineriartuinnassasoq. Aappaagu umiarsuarnik takornariartaatini ilaasut maanga paarlaakkiartortalissapput, tassa ilaasut siulliit niullutik allat nutaat umiarsuarmut ikillutik. Ilaasullu nassataat mittarfimmut mittarfimmiillu uagut assartuuttassavagut. Umiarsuit taakku aamma taquassaannik pilersorneqartussaapput, taamalu sullissineq ineriartornermut tapertaassalluni, Blue Water Greenlandimi pisortaq Lars Vajse Nuuk Imiusimasumi, maanna immiaaqqanik sodavandinillu imaarneqarsimasoq containerinut, nassiussanut nioqqutinullu quersuanngortussami takornariartitsereerluni oqarpoq.

Tamanna Blue Waterip Danmarkip avataani aningaasaliiffigisaasa annersaraat, suliffeqarfiup oqaluttuarisaanerani aningaasaliiffigineqartut annersaasa pingajuat, Lars Vajse oqarpoq Blue Water Internationalilu nunani 34-ni 80-inik allaffeqarfeqartoq 2500-nillu sulisulik ilanngullugu paasissutissiissutigalugu.

– Atlantikup avannaa Blue Waterip soqutigiuarsimavaa, oqartoqarsinnaavoq tassani annertuumik aningaasaliisartugut aamma Ilulissani aningaasaliinikuuvugut. Tamatumunnga pissutaavoq tassaniinnissamut pissutissaqarluarneq ilimagilluinnaratsigu, Lars Vajse oqarpoq.

Allanngortiterineq aappaagu naammassineqassaaq

Inuplan sanaartorluni allanngortiterinermik pilersaarusiortuusoq, tassanilu biilinut assartuutinut usilersortarfinnik arlalinnik sanaartornissaq aamma sulisunut allaffik ammasoq suliarineqassasut Lars Vajse nassuiaavoq. Illorsuulli 9.800 kvadratmeteriusup ilaa Blue Waterip quersuartut atulereersimavaa.

– Nioqqutissat quersuarmut iliorarlugit aallartikkiartuaarpugut, kisianni iluarsaassineq allanngortiterinerillu sivisunerusumik suliarineqassapput. Ilitsivinnik ikkussuissaagut, nuunnissarpulli sioqqullugu iluarsaassinerit arlallit naammasseqqaassapput, Lars Vajse oqarpoq, nassuiaallunilu 2025-p qaammataani siullerni pingasuni iserternissaq naatsorsuutigineqartoq. – Ilitsiviit palletsit 4.000-it missaanniittut quersuup iluani kiattumiissinnaanngorlugit sanaartorneqassapput, qerititsiviliornissaq aamma anguniarparput tassani palletsit 600-t missaanniittut inissaqartissallugit. Silaataanilu nunataq pigisanut containerinut silamiissinnaasunut ilitsivigissallugu, Lars Vajse oqarpoq.

Blue Water Greenland sullitanik quersuarnik pisariaqartitsisunik oqaloqateqarluni aallartereerpoq. Illorsuup allanngortiternerata saniatigut sulisunik arlalinnik atorfinitsitsisimapput nassiussanik anginerusunik suliaqarsinnaasunik, sukkasuumik apuuffissaannut suliaqarsinnaasunik taamaasilluni atuisunut toqqorsivissaqarluartoqassalluni:

– Naatsorsuutigaarput suliffeqarfippassuit iluaqutigiumaaraat, taakkumi sinerissami sumi tamaani pisiniartartullit nioqqutissaatiminnik toqqorsiveqanngitsut pilersorsinnaagatsigit. Taamaalilluni Danmarkimit nassiussat utaqqinagit sukkanerusumik pilersuisoqarsinnaalissaaq, Lars Vajse oqarpoq.

Silaannakkut assartuineq annertusisoq

Blue Water Greenlandip illorsuartaava nutaaq Royal Arctic Linep umiarsualivianit lastbilimik minutsinik tallimanik ungasitsigisumiippoq, Royal Greenlandip allaffeqarfissaata suliffeqarfiillu allat eqqaanni, nunanullu tamalaanut mittarfissamut ungasinngitsumiilluni

- Sumiiffik pingaaruteqarluinnarpoq. Poortukkanik assartuinermi sullissivipput tassunga aamma nuussavarput, illoqarfiullu qeqqaniippoq.

Containerinik assartuineq minutsini tallimaannarni pisassaaq. Qeqertani sanaartorfigineqaleraluttuinnarpoq. Royal Greenland allaffeqarfittaassaaq Arctic Importilu aamma nutaamik sanaartussalluni, taamaattumik suliffissuaqarfimmi eqqortumiippugut, Lars Vajse oqarpoq Blue Water Greenlandillu illorsuaq timmisartukkut nassiussanik annertunersunik suliaqarsinnaanngorlugu aqqissuutissagaa ilanngullugu oqaatigalugu.

– Timmisartukkut nassiussalerivimmik pilersitsissaagut, tassanilu ullut tamaasa avammut annertuumik nassiussalerisinnaanngorluta. Uagut, aalisartut Air Greenlandilu neriuutigaarput aalisakkanik avammut tunisaalernissaat. Taamaalilluta timmisartup nunamit aallarnissaanik aamma nassiussalerisinnaanngorluta, Lars Vajse oqarpoq, taassumalu illoqarfimmi atuisut suleqatigisallu Blue Water Greenlandip illutaata pisortatigoortumik atoqqaartinneqarneranut 2025-p aallartinnerani qaaqqunissai qilanaaraa.