Breximut killigititaq sioqqullugu: Vivian angusaqarniarsarivoq

Tuluit Nunaannut pilerinarsarluni sunniiniarluni sulineq ingerlallualeruttorpoq. IA-mit Sofia Geislerimut paragraf 37 naapertorlugu apeqqutinut Vivian Motzfeldtip akissutaani tamanna atuarneqarsinnaavoq.

Aasaanerani tikeraarneq

Europa-Kommissionimi siulittaasup, Jean-Claude Junckerip, aasaanerata ingerlanerani Nunatsinnut tikeraarnissaa Vivian Motzfeldtip neriuutigaa. Taamaalilluni kalaallit soqutigisaat EU-mi atorfilittat sunniuteqarnerpaat ilaannut ingerlatinneqarniassammata.

Vivian Motzfeldt aammattaaq juulimi Bruxellesimut isumaqatiginninniarnernut ajornakusoorluinnartunut naammassiuminaattunut sunniiniarluni angalanissani pilersaarutigaa, tassani nunat anginerit soqutigisaat oqaluuserineqakkajuttarput.

Akitsuusigaanngitsut

Brexit pillugu EU-mut isumaqatigiissutini kalaallit isaanni aalajangiisuullunilu pingaaruteqartoq tassaavoq, aalisakkanik tunisassianik Tuluit Nunaannut akitsuusersugaanngitsumik tunisinerup ingerlatiinnarneqarnissaata qulakkeerneqarnissaa.

- Suleqatigiinnissamik isumaqatigiissutip, aalisarneq pillugu suleqatigiinnissamik isumaqatigiissutip Nunanit nunallu immikkoortunit imarpiup akianiittunullu (OL T) ilaanera Brexitimit pitsaanngitsumik tamakku sunnerneqannginnissaat immikkut soqutiginaateqarpoq, Vivian Motzfeldt akissummini allappoq.

Diplomatit suliaqartut

Kalaallit diplomatit tuluit attaveqarfigigaat, taamaalilluni Kalaallit Nunaata siunissami akitsuusersugaanngitsumik tunisisinnaanissamut kissaataa ilisimaneqarniassammat, nunanut allanut nalakkersuisoq naqissusiivoq.

- Matumani ilanngullugu Tuluit Nunaata Brexitip kingorna illugiilluni isumaqatigiissuteqarnissamik Kalaallit Nunaata soqutiginninnera.

Suleqatigiissitat

Namminersorlutik Oqartussat Brexitimut Immikkut Suliassaqarluni Suleqatigiissitamik (Task Force) naalakkersuisoqarfinnit attuumassutilinnik peqataaffigineqartumik pilersitsisoq aammaoqaatigaa, taakku kalaallit Brexitimut tunngatillugu soqutigisaannik sulissuteqarput. Tamatuma saniatigut Nunanut Allanut ministeeriaqarfiup Brexitimut Immikkut Suliassaqarluni Suleqatigiissitaanut (Task Force) Nunanut Allanullu Naalakkersuisoqarfik sinniisoqarpoq.

Brexitimut tunngatillugu Kalaallit Nunaata soqutigisaanut tunngatillugu allakkiaq suliarineqarsimasoq, Vivian Motzfeldt allappoq:

- EU-mut Brexitimut isumaqatiginninniartut qullersaannut 2017 -imi allakkiaq tunniunneqarpoq, taamaalilluni Kalaallit Nunaata Brexittimut tunngatillugu soqutigisaat ingerlateqqinneqarput. Allakkiaq Inatsisartuni ataatsimiititaliamut suliaq pillugu sammisalinnut ingerlateqqinneqarnikuuvoq. Tamannali paasisariaqanngilaq, EU-p Brexit pillugu ullormut oqaluuserisassaani Kalaallit Nunaat pingaarnersaasoq, taamaammat pingaaruteqarpoq, kalaallit soqutigisaasa ingerlaavartumik sakkortuumik sunniiniutiginissaat, soorlu Kalaallit Nunaata EU-mut isumaqatigiissutaanut pissutsit tunngassuteqartut EU-mi suliniuteqartunut attuumassuteqartunut malugitinniarnissaat, taamaaliortoqarporlu, taanna apeqquteqartumut neriorsuvoq.