Broberg ugguarpoq: Uranip innuttaasunut taasissutigitinnissaa itigartissutigineqarpoq
Uranimik qalluisoqarnissaa innuttaasunik taasititsisoqarnissaanik Naleraq siunnersuuteqarpoq. Siunnersuut tusarniutigineqareerpoq, ataatsimiinnissaannut oqallisissiaq itigartitsissutigineqarpoq, Inatsisartunilu ukiaanerani oqallisigineqassanani.
Urani pillugu innuttaasut taasitinneqarnissaannik siunnersuut aasaq tusarniutigineqarpoq.
Innuttaasut najoqqutassiissummik taasitinneqarnissaat apriilip sisamaani 2023-mi pissasoq Naalakkersuisooqataasimasup Naleqqap siunnersuutigaa. Inatsisartuni inatsisip atorunnaarsinneqarnissaanik innuttaasunit taasissutigineqassasoq siunnerfigineqaraluarpoq, uranimut misissueqqaarnissamut, misissuinermut piiaanermullu inatsisip atorunnaarsinneqarnissaa siunnersuuteqartoqarluni.
Inatsisartut ukioq kingulleq ukiakkut ataatsimiinneranni uranimut piiaanissamut inerteqquteqartoqalernissaa sakkortuumik oqallisaareerluni, Naleqqamiillu akuersissutigineqareerluni, atuutilersinneqarpoq. Tamatumali kingorna Naalakkersuisooqatigiit taarserput, Naleraq maanna illuatungiliuttuulerluni.
Naleqqap siunnersuutaa tusarniutigineqarpoq aasaq, ataatsimiinnissamulli oqallisissiani peqataanngilaq.
Isornartorsiuineq
Inatsisartut Siulittaasoqarfiata siunnersuutip oqallisissianut peqataanissaanut itigartitsisimasoq Naleqqap siulittaasuata Pele Brobergip ilisimatitsissutigaa.
Itigartitsinermut tunngavilersuut Sermitsiaq.AG-mit takuneqarpoq. Inatsisartut Allattoqarfiat allappoq, siunnersuut assingusoq ukioq kingulleq oqallisigineqareersimasoq. Innuttaasut taasitinneqarnissaannik siunnersuut tassani itigartissutigineqarpoq. Inatsisartut Allattoqarfiata ilisimatitsissutigaa Inatsisartut Siulittaasoqarfiata aalajangersinnaasimagaa siunnersuutip oqallisigineqarsinnaanera akuerisinnaallugu itigartissinnaalluguluunniit. Suliami matumani siunnersuut itigartinneqarpoq.
Taamatut aalajangertoqarnera Pele Brobergimit nuannarineqanngilaq:
- Inatsisartut Siulittaasoqarfia soorlu Naalakkersuisooqatigiit politikkikkut soqutigisaat malikkaat. Paasisinnaanngilara sooq innuttaasut isumaat Inatsisartunit ersigineqarnersoq, Pele Broberg Sermitsiaq.AG-mut oqarpoq.
Atassut: Aalajangiiffigisassatut siunnersuutaasimasussaagaluartoq
Atassutip siulittaasua Aqqalu Jerimiassen Inatsisartut Siulittaasoqarfiani ilaasortaavoq.
Aqqalu Jerimiassenip uranip innuttaasunut taasissutigineqarnissaanik ukioq kingulleq siunnersuuteqartuuvoq. Naleqqap siunnersuutaa pillugu Aqqalu Jerimiassen ima allappoq:
- Innuttaasut taasitinneqarnissaat Atassummit qineqqusaarutigineqarpoq, siunissami qinersinerit uranimut tunngannginnissaat tassani siunnerfiulluni. Innuttaasut urani pillugu tunngaviusumik taasitinneqarsimasussaagaluartut isumaqarpugut.
- Naleqqap siunnersuutaa aalajangiiffigisassatut siunnersuutaasimasuuppat pitsaanerusimassagaluarpoq, inatsimmik allanngortitsinissamik siunnersuutaanani, Aqqalu Jerimiassen Sermitsiaq.AG-mut allalluni akissuteqarpoq.
Broberg: Naalakkersuisut suliarilluarsimasinnaagaluaraat
Siunnersuuteqartoqarnerani politikerit Naalakkersuisut qinnuigisarpaat aalajangiiffigisassatut siunnersuuteqassasut, taamatulli siunnersuuteqarnissaq pitsaanerusimasinnaagaluarnersoq Pele Brobergip qularaa.
- Siunnersuummi matumani aalajangiiffigisassatut siunnersuuteqarusunngilanga. Taamaattoqassappat siunnersuut sivisuumik suliarineqaqqissaaq, Naalakkersuisullu qinnuigineqassallutik inatsisissatut siunnersuuteqassasut, suliaq tusarniutigineqaqqeqqaassalluni allatigullu suliaqartoqaqqilluni.
- Naalakkersuisut siunnersuutip suliarinissaanut piffissaqarluaraluarput, Pele Broberg oqarpoq.
Inatsisartut ukiaanerani ataatsimiinnerat septembarip 24-ani aallartissaaq.