Canadami Newfoundlandimi Labradorimilu naalakkersuisut Quinlan Brothers Limited, nunami saattuanik tunisassiorfiit annersaannik piginnittuusoq, sisamanik immikkoortulinnik unnerluutigaat. Tunisassiorfiup saattuanik toqungasunik tunisassiorsimasutut saattuallu pisortanit tigummigallarneqartut nussorsimanerannik unnerluussisoqarluni.
Canadami Newfoundlandimi Labradorimilu naalakkersuisut Quinlan Brothers Limited, nunami saattuanik tunisassiorfiit annersaannik piginnittuusoq, sisamanik immikkoortulinnik unnerluutigaat. Tunisassiorfiup saattuanik toqungasunik tunisassiorsimasutut saattuallu pisortanit tigummigallarneqartut nussorsimanerannik unnerluussisoqarluni.
Tamanna nunap immikkoortuani aalisarnermut, orpippassuarnut nunalerinermullu naalakkersuisoqarfimmit tusagassiuutinut nalunaarummi atuarneqarsinnaavoq.
Unnerluutiginnissutit nunap immikkoortuani aalisakkanik nakkutilliinermut inatsit naapertorlugu saqqummiunneqarput. Siorna saattuarniarfiup nalaani suliffeqarfiup suliffissuani Bay de Verdemi Labradorimiittumi, Newfoundlandip illoqarfiisa pingaarnersaannit St. Johnimit 200 kilometeringajannik ungasitsigisumiittumi, unioqqutitsinerit pisimapput, unnerluutiginnissutit allassimavoq.
Newfoundlandimi Labradorimilu aalisarnermut, orpippassuarnut nunalerinermullu naalakkersuisoqarfimmit aalisarnermut nakkutilliisut aalisakkanik tunisassiorfimmi maajip 29-aniit juunip 30-anut misissuinerminni paasivaat saattuat pitsaassusaat pitsaanngitsoq. Tassa saattuat suliarineqartigatik toqusimammata, naalakkersuisoqarfik allappoq.
Tusagassiuutinut nalunaarut naapertorlugu ukioq manna saattuat 200.000 pundit missaat iginneqaqqammerput, 2023-milu 300.000 pundit missaat iginneqarsimallutik. Katillugit 227 tonsiupput.
Nioqqutissiortut kattuffiat: - Malittarisassat pisoqalisimapput
Nunap immikkoortuani malittarisassat pisoqaavallaartut taamaammallu aalisakkanik qalerualinnillu tunisassiortunut unioqqutitsinermut tunngavilersuutigineqarsinnaanngitsut Canadami nioqqutissiornermi niuernermili kattuffik, Association of Seafood Producers, ASP, isumaqarpoq.
- Nakkutilliisut saattuanik toqungasunik sanngiillisimasunillu aalajangersaasarnermi periutsit atortagaat pisoqaavallaarput allanngortittariaqarlutillu, ASP-mi pisortaaneq Jeff Loder tusagassiuutinut nalunaarummi oqarpoq.
Piffissami nerisassat nunarsuarmi tamarmi ajornartorsiutaaneranni malittarisassat nakkutilliisunit malinneqartartut pissutigalugit nerisassat pitsaasut pisariaqanngitsumik iginneqassasut suliniaqatigiiffik isumaqarpoq.
Nunap tusaamaneqarnera navianartorsiorpoq
Nunap immikkoortuani Newfoundlandimi Labradorimilu saattuanik tunisassiat pitsaalluinnartutut nioqqutigineqartuarnissaat qulakkeerniarlugu nunap immikkoortuani naalakkersuisut saattuanik aalisartut aalisakkanillu suliarinnittartut tapersersortuarpaat.
- Newfoundlandip Labradorillu aalisakkanik qalerualinnillu nunarsuarmi tuniniaanermi tusaamaneqartuarnissaannut pitsaassuseq pingaaruteqarnerpaavoq. Saattuat imaanit qaqinneqarnerannit suliarineqarnerannut, eqqortumillu toqqortaasivimmiinnissaat pitsaassussaannut tamanut sunniuteqartarput, Neew Foundlandip Labradorillu aalisarnermut, orpippassuarnut nunalerinermullu naalakkersuisoqarfia allappoq.
Royal Greenland saattuanik tunisassiorfissuaq
Aalisarnermut nakkutilliisut Newfoundlandimi Labradorimilu aalisakkat qaleruallillu pisat, suliarineqartut tunineqartullu nunarsuarmi tunisassiortut pitsaanerpaat unammillersinnaanissaat qulakkeerniarlugu ilungersortut ilanngullugu nalunaarutigineqarpoq.
- Tunisassiat pitsaasuunissaat tunisassiarineqarnerallu iluatsinnissaat anguniarlugu aalisakkat qaleruallillu pinngortitami pisanut tukertitsivimmiittunullu nunap immikkoortuani inatsisit malillugit immikkoortortaqarfiup pitsaassusaanik qulakkeerinninnissaq ingerlatissavaa. Nunap immikkoortuani aalisakkanik tunisassiorfiit tusaamaneqarnerat illersorniarlugu, nunap immikkoortuani aalisakkanik tunisassiorfinni aalisakkanik suliarinninnermi, toqqorsivimmiititsinermi assartuinermilu pitsaanerpaamik periaaseqarnerup tapersersorneqarneratigut qulakkeerneqassaaq, nunap immikkoortuani naalakkersuisut nalunaarutaanni aamma allassimavoq.
Royal Greenlandip, Canadami saattuanik tunisassiorfillit annersaasa ilaata, ingerlatseqatigiiffik Quinlan Brothers 2020-mi pisiariniaraluarpaa. Tamannali piviusunngorani.
Royal Greenland Newfoundlandimi ingerlatseqatigiiffimmik Quin-Sea Fisheriesimik piginnittuuvoq, taassumalu tunisassiaasa annersaat pingaarnersaallu tassaapput saattuat. Royal Greenland Amerika Avannarlermi saattuanik, assersuutigalugu peqqussuarnik, raajanik, saarullinnik qaleralinnillu, tunisaqarluartarpoq.
