Canadami aalisartut sulinermillu inuussutissarsiuteqartut peqatigiiffiata Canadap ilaani Newfoundlandimi Labradorimilu Royal Greenland saassuppaat.
– Royal Greenlandip siullermiilli nunap immikkoortuani sulilerami takutittuarsimavaa torersumik niuernikkut ingerlatserusunnani.
Canadami aalisartut sulinermillu inuussutissarsiuteqartut peqatigiiffiata Canadap ilaani Newfoundlandimi Labradorimilu Royal Greenland saassuppaat.
– Royal Greenlandip siullermiilli nunap immikkoortuani sulilerami takutittuarsimavaa torersumik niuernikkut ingerlatserusunnani.
Taama Fish, Food & Allied Workers Unionimi FFAW-imi allatsi Jason Spingle tusagassiuutinut nalunaarummi allappoq.
Sulisut kattuffiat aamma Facebook atorlugu isornartorsiuivoq.
Royal Greenlandili isumaqarpoq sulisut kattuffiat tunngavissaqanngitsumik ingerlatseqatigiiffimmut pasilliisoq.
– Royal Greenland tunngaviatigut pasilliutit taamaattut Facebook atorlugu oqaaseqarneq ajorpoq, unnerluussinerit suliamut attuumassuteqartut tunngavilersorluakkallu susassaqartunut eqqortunut nalunaarutigineqartussaammata tamanullu eqqortumik inatsisitigut eqqortumik suliarineqarlutik, Royal Greenlandimi attaveqatigiinnermut pisortaq Merete Lindstrøm Sermitsiamut allappoq.
Sulinermi najoqqutassat malinneqanngitsut
Canadami aalisartut kattuffianit Jason Spingle New Foundlandimi Royal Greenlandip pissusilersornera pillugu nangilluni oqarpoq:
– Suliffeqarfik ammasumik arlaleriarlunilu sulinermi najoqqutassanik avaqqussisinnaanngilaq, (aalisakkanik, aaqq.) suliareqqiinissamillu akuersissutertik pigiinnarlugu. Tamanna kinguneqartariaqarpoq.
Canadap kangisissortaani nunap immikkoortuani Fish, Food & Allied Workers Unionimiipput namminneq oqarnerat naapertorlugu inuit 14.000.
FFAW isumaqarpoq Royal Greenland piaaraluni New Foundland & Labradorimi maleruagassat malinnagit sulisoq isumaqatigiinniarnermilu ileqquusut avaqqullugit.
Tamanna pivoq sineriammi aalisarneq sineriammilu inuiaqatigiit pilliutigalugit.
FFAW: – Ilumuunngitsut
Ukioq manna Royal Greenland suliniaqatigiiffik naapertorlugu ilaatigut aalisartunit saarullinnik pisiumasarsimanngilaq, peqqussuarnut pisinermut uppernarsaatini ulluliinerit ilumuunngitsut atortarlugit taamaalillutik aalisartut akit minnerpaaffissaattut isumaqatigiissummit annikinnerusumik akilerlugit, inalualinnillu aalisartoq pinngitsaalillugu isumaqatigiissummik atsiortinniarsaralugu, isumaqatigiissutaareersut avaqqutaarniarlugit.
Tamatuma saniatigut aalisartut sulisartullu kattuffiata Roya Greenlandimi St. Anthonymi suliffissuarmi ingerlatseqatigiiffimmi sulinermut avatangiisit isornartorsiorpai. Suliffissuarmi aqutsisut sulisut kattuffianit pasillerneqarput sakkortuumik pissuseqarnerarneqarlutik akisussaaffeqarumanatillu sulisut isumannaatsumik peqqinnartumillu suliffeqarnissaat qulakkeerlugu.
Ministeri peqatigalugit pinasuartumik ataatsimiikkusuttut
Taamaattumik FFAW aalisarnermut, orpippassuarnut nunalerinermullu ministerimik Gerry Byrnemik kiisalu avatangiisinut, silap pissusaanut Labradorimilu pissutsinut ministerimik Lisa Dempsterimik pinasuartumik ataatsimeeqateqarusupput.
Tamanna pivoq pisutsit arlalissuit suliniaqatigiiiffiup naammaginngisai oqaluuseriniarlugit. Aalisarnissamik akuersissutit naalagaaffeqatigiinnit akisussaaffigineqarpoq taamaalillunilu nunami illoqarfiit pingaarnersaani Ottawami oqartussaasunit akuersissutaalluni, Canadami naalakkersuisoqarfiusumi.
Tunisassiornissamut akuersissutit nunap immikkoortuni akuersissutaasarput, soorlu Newfoundland& Labradorimi, suliffeqarfinnut, ilaatigut Royal Greenlandimut.
Canadallu kangiani nunap immikkoortuata suliffissanik pilersitsinissaq soqutigisupilussuuaa. Naggataagut ima kinguneqarsinnaavoq tunisassiortup tassalu suliffissuup tunisassiornissamut akuersissutaa atorunnaarsinneqarluni.
– Aalisakkanik tunisassiornissamut akuersissut immikkut pisinnaatitaaffiuvoq, pisinnaatitaaffiuinnarani, Newfoundlandimilu aamma Labradorimi innuttaasunut iluaqutaasumik akuersissutiminnik eqquutsitsiumanngitsunut kinguneqartitsisoqartariaqarpoq, Jason Spingle Fish, Food & Allied Workersimiittoq oqarpoq.
Royal Greenland 2016-imiilli New Foundlandimi Labradorimilu aalisarnermi peqataavoq ingerlatseqatigiiffissuup Quin-Sea-Fisheries pisiasisimallugu.
– Kingorna sumiiffimmi inuiaqatigiinni annertuumik aningaasaliisimavugut, nunap immikkoortuani aalisakkanik suliffissuaqarnermi pitsaassutsimut najoqqutaasut qaffallugit ilinniartitaanerullu peqqinnissamullu tunngatillugu sumiiffimmi suliniutinik piorsaaqataalluni.
– Quin-Sea aamma Royal Greenland New Foundlandimi Labradorimilu aalisarnermi akuunerminnik pimoorussipput. – Nunap immikkoortuani pitsaassutsimut, piujuartitsinermut ingerlatsinermullu najoqqutat qaffassaaffigiuarniarpavut, anguniagarput anguniartillugu tassalu Kalaallit Nunaannut sumiiffimmilu inuiaqatigiinnut naleqartumik pilersitsinissaq, attaveqatigiinnermut pisortaq Merete Lindstrøm oqarpoq.
Sulisartut kattuffiat Royal Greenlandimut kamassimavoq 2016-imi New Foundlandimi Labradorimilu ingerlatseqatigiiffik sulilermalli.
Nunani tamalaani internetimi tusagassiuutit soorlu Intrafish aamma Undercurrent News, Danmarkimi Fiskeritidende aamma Fiskeriforum kiisalu Canadami naalagaaffiup radiua CBC aamma sulisut kattuffiata Royal Greenlandimik isornartorsiuineranik saqqummiussaqarput.
