KL

DK

Christian Pihlblad Jerimiassen: Sammisaq nutaaq annertuumik periarfissaqartoq

AdvenToursip Kangerlussuup eqqaani Sisimiunullu ATV-nik aqqusinermi nutaami misigisassarsiornissamut takornarianut cykelinik attartortitsinissamut annertuumik periarfissaqarsoraa.

Christian P. Jerimiassen, Unesco World Heritage Site Aasivissuit - Nipisani Park Rangerip suliffeqarfini AdvenTours.gl aqqutigalugu suliffimmi saniatigut Kangerlussuarmi cykelinik attartugassanik neqerooruteqartarpoq.
Poul Krarup Freelance Journalisti
Saqqummersinneqarpoq

Qanittumi cykelernermik nuannarisallit marluk Sermersuarnit Sisimiunut Mountainbikeminnik cykelereerneranni, Christian Pihlblad Jerimiassenip Kangerlussuarmi cykelinik attartortitsinissamut annertuumik periarfissaqarsoraa.

Ingerlaarneq Thomas Steinthalip Jørgen Wibellu ulluni arfineq marlunni naammassisaat, katillugu 206,5 kilometerinik isorartussusilik Point 660-imit, sermersuup eqqaani piffik kangillermiittup Russel Blacierillu kangiani 10 kilometerisut ungatsitsigisumit Sisimiut tungaanut ungasinnerpaamit aallartittoq, ATV-nut aqqutikkut suli naammassineqanngitsukkut ingerlaffigineqarpoq.

Tour de Kang

Taassuma nunatsinni Sermersuarmit sineriammut kisiartaalluni ingerlaarfiusinnaanera Christian P. Jerimiassenip pingaartuutippa.

Ullualunnguit matuma siorna Naalakkersuisut Siulittaasuata Múte B Egedep Qeqqatalu Kommuniani borgmesterip Malik Berthelsenip Sisimiunit ATV-nut aqqut misilillugu cykelerfigaat.

Politikerit nammineerlutik suliamik alapernaaserlutik aaqqusinikkut oktobarimi atoqqaartinneqartussatut ilimagineqartukkut cykelernissaat Christian P. Jerimiassen pingaartutut isigaa.

- Qanittumi Tour de Kang piareersalissagaat siunnersorusuppakka, Jerimiassen oqarpoq.

Suliffeqarfiutaa AdvenTours cykelinik innaallagiatortunik, efat bikesinik taaneqartunik, Kangerlussuup eqqaani nunatami atugassatut piukkunnarluartunik pisivoq.

- Aqqummik naammassillugu ingerlaarnerat tupaallaatigaajuk?

- Ilungersornerata angusaqarfiulluarnera nuannaarutigisorujussuuara. Akuusut tamarmik aqqutip suli naammassinnginnera aallaqqaammulli ilisimareerpaat. Ilungersunartuusoq nalunagu ingerlaarput. Naak ullormut sivikitsumik ingerlaartaraluarlutik taamak pilertortigisumik apuunnerat tupaallaatigaara, Christian P. Jerimiassen, ingerlaarnissamik pilersaarusioqataasoq oqarpoq.

Sammisassat nutaat

- Ingerlaarnerminnik naammassinninnerat suliffeqarfiutinnut periarfissiisutut isigiaajuk?

- Aap, taamaassorivippara. Takornarianik misigisaqartitsinernut allanut sanilliullugu nutaajullunilu piujuartitsineruvoq. ATV-nut aqqusernup naammassinerani periarfissat nutaat qilanaarisorujussuuakka. Bikepacking feeriariaatsitut annertusiartortumik soqutigineqartoq internetimi takusinnaavarput. Aap, ATV-nik ingerlaarnernut, pisunnernut allanullu cykelernissaq periarfissaqarluartutut isigaara.

- Minnerunngitsumik ilaasunut unnuisussanut piffimmilu misigisaqarusuttunut cykelitsinnik takuniaanissamut periarfissaqarpoq, Christian P. Jerimiassen oqarpoq.

Aqqusineq ujaraaqqanik qalligaq 100 kilometeri

Kangerlussuup eqqaani cykelersinnaanermut tunngatillugu tamanna timigissarusuttunut feeriarnerminni periarfissaasoq nittartakkakkut quppernermini allappoq.

- Tamanna timaani nunamik aqqut sinerlugu nunaqarfimmi takujuminartunik amerlasuunik takuniaaffiulluartoq taanna isumaqarpoq. Nunaannakkut aqqusiaq 100 kilometerimik isorartutigisoq takusassanik ulikkaarpoq.

AdvenTours.gl qulinik cykeliuteqarpoq batteriissamaatinillu tallimanik peqarluni, multi-cykelit ullunilu arlalinni attartornissaq periarfissaavoq. Ualikkut takuniaatitsisoqarluni angallanneqarnissaq aamma periarfissaavoq.

AdvenTours.gl nunaqavissunit pigineqartoq august 2022-mili Kangerlussuarmi efatbikesinik attartortitsinermik neqerooruteqarpoq.

Christian P. Jerimiassen taamanikkut Unesco World Heritage Site Aasivissuit – Nipisani Park Rangeritut atorfinitsinneqarpoq. Tassunga atatillugu suliffimmi saniatigut aamma Kangerlssuarmi efatbikesinik attartortitsinissamik neqeroorfigineqarpoq. AdvenTours.gl ungasinnerusoq isigalugu takornariartitsinermi neqeroorutinik assigiinngitsunik arlalinnik neqerooruteqartassaaq.

Cykelit immikkuullarissut

Cykeli ”fatwave beach cruisers” taaneqartoq Californiameersuuvoq. Kalaallisut qallunaatulluunniit qanoq taaneqartarnersoq naluarput, taaguutaatali silittunik sioqqatigut ingerlaarnissamut pikkunnartoq oqaluttuaraa, sioqqatigoorlunimi kiviartorneq ajorpoq.

Beach cruiser elcykeli piffimmi maniittumi assorluni qummukajaakkulluunniit kiisalu asfaltimi aputikkullu ingerlaarluni atussallugu piukkunnartoq AdvenTours.gl nittartakkakkut quppernermini allappoq. Fatwave elcykel sukkulluunniit ingerlaarsinnaasoq, AdvenTours.gl allappoq.

Oqaatigineqareersutut cykelit 26x4 tommer assakaasoqarput fælgiilu immikkut qajannaallisagaapput. Motori 500 watt assakaasumut aqorlermut atasoq pisariaqartitsinerpaaffimmi ikiuuttarpoq, nalunaaquttallu akunnerani 25 kilometerisut sukkatigisinnaalluni, suliffeqarfik nittartakkakkut quppernermini allappoq.

Elcykelit Kalaallit Nunaanni ileqqoreqqusaq nutaaq, ulloq 1. Juni 2024-mi atulersoq naapertorlugu sukkassutsimikkut akuerisaapput.

samfund qeqqata kommunia cykel inuussutissarsiutit kangerlussuaq vej mellem sisimiut og kangerlussuaq mountainbikes

ATORFIIT Se alle jobs

Powered by Labrador CMS