D mianersoqqusivoq Neqi A/S pillugu: Aaqqiissutaagallartut siunnerfigeqinagit
Demokraatit isumaqarput nunalerinermik inuussutissarsiorneq ataatsimut isigalugu tamaat nalilersoqqissaarneqartariaqartoq tamakkiisumillu aaqqiissutissarsiuunneqartariaqartoq Neqi A/S naatsorsuutimigut aannartoq ilaannakortumik tamakkiisumilluunniit namminersortunngorsarneqarnissaa pillugu "sukkavallaartumik aalajangersaaneq" siunnerfiginagu.
KNI-mi sulisut ataasiakkaat, maannamut ilisimaneqartut naapertorlugit ukiuni qulikkaani Neqi A/S-ip naatsorsuutaanik allanngortiterisarsimapput, tamanna tunngavigalugu maanna misissuisitsisoqarpoq ingerlatseqatigiiffik taanna ilaannakortumik tamakkiisumilluunniit namminersortunngorsarneqarsinnaanersoq.
Neqi A/S-ip siunissaata misissuiffigeqqissaarneqarneranut pissutaavoq KNI-mi sulisut/sulisimasut ataasiakkaat ingerlatseqatigiiffiup naatsorsuutaanik annertuumik kusassaasarsimanerat tunngavigalugu paasinneqarmat kusassaanertaqanngitsumik ingerlasimagaluaruni assiliaq suli ajornerusimassagaluartoq. Ingerlatseqatigiiffimmi sutigut tamatigut amigartoorfiulluni ingerlasimavoq, kusassaasarsimanerup ersernerlutsitaanik.
Illuatungiliuttut partiivisa ilaat Demokraatit, namminneq nunalerinermut periusissiamik 2021-2030-mik taasamik ilusilersueqataasimasut, isumaqarput ajornartosiummi qitiunngitsoq Neqi A/S, nunalerinerli tamakkiisumik isigalugu aaqqinniagassaqartoq:
- Neqi A/S piuvoq nunatsinni nunalerinermik inuussutissarsiuteqartut pillugit, imaanngilaq nunalerinermik inuussutissarsiuteqartut piusut Neqi A/S pillugu. Taamaammat isumaqarpugut, ukiorpassuarni nunalerinerup politikkikkut suliarineqarsimanera paasissutissat eqqunngitsut tunngavigalugit ingerlanneqarsimasoq, taamaammallu aaqqiissutissarsiornerit tamarmik nutaamik nalilersorneqartariaqartut, eqqunngitsumimmi tunngavilimmik ingerlatsisoqarsimammat.
Ilannakortumik tamakkiisumilluunniit namminersortunngorsaaneq arlaannaanulluunniit iluaqutissiissanngilaq
- Allaat periusissiaq taanna suleqataaffigisimasarput nalilersoqqinneqartariaqarpoq, taamaalilluta politikkikkut ataatsimoorluta piviusorsiortumik nunalerineq tamaat ataatsimut isigalugu siunnerfeqaqatigiinnissarput anguneqarsinnaammat, Demokraatit siulittaasuat Jens-Frederik Nielsen Sermitsiaq.AG-mut oqarpoq.
Jens-Frederik Nielsen taamak oqarluni Naalakkersuisunut kaammattuuteqarpoq sukkasuumik aaqqiissutissarsiortoqassanngitsoq Neqi A/S-ip ilaannakortumik tamakkiisumilluunniit namminersortunngorsarneqarnissaa pillugu:
- Pisortat ingerlatseqatigiiffiisa namminersortunngorsarneqarnissaat pillugu sulissutiginnittuuvugut, taamaattorli matumani ilaannakortumik tamakkiisumilluunniit namminersortunngorsaanissamik siunnerfeqarneq qamiteriniarnerinnaavoq inneq tamaat qamissinnaanagu nalunngikkaluarlugu, taamaammallu namminersortunngorsaanertut tamanut iluaqutissiisussatut isigineqarsinnaanngilaq.
- Neqi A/S namminersortunngorsarneqassappat, taava tamanna tunngaveqartariaqarpoq ingerlatseqatigiiffik namminersortunngorsarneqarnissaminut piareersimasoq, imaanngitsoq niuernikkut sutigut tamatigut ajorluinnartumik inissisimaneranit annaanniarneqarnissaa pillugu namminersortunngorsaasoqassasoq. Taamaammat Naalakkersuisut qinnuigaakka isumageqqullugu politikkikkut peqatigiilluta nunalerinerlu tamaat isigalugu aniguiffissanik ujartueqqaartariaqartugut, aatsaat taamaaliornikkut nunalerineq tamaat inuiaqatatigiillumi tamaasa iluaqutissinniarsinnaavagut, Demokraatit siulittaasuat, Jens-Frederik Nielsen Sermitsiaq.AG-mut oqarpoq.
Kalistat erseqqissaavoq
Sermitsiaq.AG-mit Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund apersoreerlugu allaaserinninnitta malitsigisaanik naalakkersuisoqarfia erseqqissaavoq Neqi A/S-ip aarlerinartumik inissisimanerani suna eqqornersoq sunalu eqqunnginnersoq.
Erseqqissaatigineqarpoq, inuit ataasiakkaat KNI-mi atorfeqarsimasut tassaasut naatsorsuutinik 2013-miit 2020-p tungaanut kusassaasarsimasut. Sulianik qulaajaanerup kingunerisaanik, naatsorsuutinik kusassaasimanerit politiinit paasiniagassanngorlugit KNI unnerluutiginnippoq.
KNI-p suliffeqarfik kukkunersiuisartoq PwC, eqqartuussissuserisullu qanimut suleqatigalugit annertuumik ukkatarisimavaa, pisimasullu inatsisilerituunit nalilersoqqissaarneqarsimallutik.
Kiffartuussinissamut isumaqatigiissut marloriaat sinnerlugu annertusisimavoq
Qanoq pisoqarsimanersoq ukiut marluk qaangiummata paasineqarmalli, Neqi-mi pissutsit pillugit KNI Naalakkersuisunik qanimut oqaloqateqartarpoq. Pisoq paasineqarsimatsiaannartoq Naalakkersuisut tapersersuinerisigut isumaqatigiissutigineqarpoq, KNI-p Neqi nammineq aningaasaateqalerseqqissagaa.
Neqi-p nammineq aningaasaateqaqqilernissaanut pilersaarutit KNI-p kingullertigut ukiumoortumik naatsorsuutaanni atuarneqarsinnaapput, ingerlatseqatigiiffiullu ataatsimeersuarnerini tamanut saqqummiunneqartarlutik.
Toqoraaviup 2013-imi nutarsarneqarneranut aningaasaliissutaasimasut, 2013-imit 2020 tikillugu naatsorsuutit kusassarneqarsimanerat, ukiunilu kingullerni amigartoorutit matussuserlugit akiitsunik katillugit 142,5 mio. koruuniusunik KNI-p isumakkeerinnissuteqarneratigut, ingerlatseqatigiiffik nammineq aningaasaateqaqqilerpoq.
Massakkut ingerlatat attatiinnarumallugit kiffartuussinissamik isumaqatigiissummut akiliutigineqartartut ukiuni kingullerni 5 mio. koruuninit, 13 mio. koruuninut qaffanneqarnikuupput. Neqi A/S-imut periarfissaasinnaasunik, periaasiusinnaasunillu misissuisumik suleqatigiissitamik pilersitsisoqarnikuuvoq. Naalakkersuisoqarfinnit attuumassuteqartunit KNI-miillu inuttalerneqarluni ataatsimoorussamik suleqatigiissitap naatsorsuutigaa, periaasissaq 2023/2024-p ingerlanerani naammassisimassallugu.
Suleqatigiissitaq taaneqartoq, tassaavoq Kalistat Lund-ip innersuussutigisaa periarfissanik misissuinermi ilaannakortumik tamakkiisumilluunniit Neqi A/S-ip namminersortunngorsarneqarsinnaaneranik periarfissanik misissuisussaq.