Danskit inissisimanerlunnerat – Nunatsinnut iluaqutaasinnaasoq
Aningaasat naleerukkiartorput, Danmarkimilu aningaasaqarnikkut ajornartoorneq malunnarluinnarpoq, suliffeqarfiit angisuut soraarsitsiortornissamik aarlerisaaripput. Taamaalilluni sulisussarsiornissaq Nunatsinnut ajornannginnerulissaaq.
Ukrainemi sorsuttoqarnerata nunarsuarmi aamma Europami nunat aningaasaqarnermut sunniuteqarnerani, aningaasat naleerukkiartornerata aamma aningaasaqarnikkut ajornartoornerup malitsigisaanik, danskit suliffeqarfii amerlasuunik soraarsitsinissartik ilimasaaripput.
Aviisi AG taama allappoq.
Danmarkimi Naatsorsueqqissaartarfiup naatsorsuineranit akit qaffariarneri nutaat 1970-ikkunnili takuneqarsimanngitsut takutinneqarpoq. Atuisunut akit ukiup siuliani piffissamut tassunga sanilliullugit 10,1 procentinik qaffasinnerupput. Kallerup innerata, nerisassat aamma gassit akiisa qaffariarnerat aningaasat naleerukkiartornerannut pingaarnertut pissutaapput, taamatullu ineriartortoqarnera pingaartumik pisiniarfinnut mikinerusunut kinguneqarput, taakku matusariaqarput. Kisianni aamma suliffeqarfissuit ajornartoorneq maanna malugaat, amerlasuunillu soraarsitsinissaminnik ilimasaaripput.
Sulisoqarnikkut 2024-p tungaanut 100.000-nik ikileriartoqarnissaa, Danmarkimi Aningaasaqarnermut Siunnersuisoqatigiit siulittuutigaa. Inuppassuarnut suliffeeruttunut alianassaaq, taakkulu suliffeqannginnersiuteqarlutik ullormusiaqartariaqassapput. Kisianni immaqa ilaat suliffissaaleqiinnaratik avannamut saallutik Nunatsinnut suliffissarsiussapput.
Nunatsinnilu suliffissaqarniarnermi periarfissat pitsaapput. Suliffeqarfiit namminersortut piukkunnartunik sulisussanik amigaateqarnertik pissutigalugu siuariartornissartik kigaallatsittariaqartarpaat. Pisortanilu suliffeqarfiit aamma pitsaaneruallaanngillat. Tassani pingaartumik peqqinnissaqarfik annertuumik eqqugaaqqavoq.
Siuariartorneq sunneraa
Suliffeqarnermut naalakkersuisup Jess Svanep (Siumut) sulisussaaleqineq Nunatta unammilligassaasa annersaasa ilagigaat oqaatigaa. Sulisussaaleqinermillu ajornartorsiut annertooq ukiuni tulliuttuni annikinnerulernavianngilaq. Tamanna Naalakkersuisut suliffeqarfinnut 2021-mut nassuiaasiorneranni, Jess Svanep qanittukkut Inatsisartunut ilaasortanut saqqummiuteqqammisaani oqaatigineqarpoq.
Jess Svanep ernumanera Sulisitsisuni pisortap Christian Keldsenip isumaqataaffigaa. Suliffeqarfiit kattuffimmut ilaasortat maanna sulisunik 1.000-t tungaannut amerlassusilinnik amigaateqartut, taassuma nalilerpaa.
- Sulisussanik amigaateqarneq ajornartorsiutitsinni anginersaavoq. Siuariartornerup killilerneqarneranik tamanna kinguneqarpoq, suliffeqarfinnik inuussutissarsiutinillu nutaanik ineriartortitsinissatsinnut pisariaqartunik sulisussaqannginnerput sulisussanik ilinniarsimasunik amigaateqarnerup aamma kingunerai, Christian Keldsen AG-mut oqarpoq.
Aviisimi AG-mi atuarnerusinnaavutit. Aviisi uani pissarsiariuk: